Diosllapim tarinchik yanapakuyta
Takiqkunapa maestronpaq, Diosman Davidpa takisqanta Jedutunpa allichasqan
62
Diosnillaymi hawkalla kawsachiwaqniyqa.
Payllam ñoqallayta salvaykuwaqniyqa.
2 Payllam hatun rumi hina
harkaykuwaqniyqa.
Payllam salvaykuwaqniyqa.
Payllam pakaykuwaqniyqa.
Manam ancha wichisaqchu ñoqaqa.
3 ¿Haykapikamataq wichiykuchkaqña
perqata hina
tanqaypaq-tanqawankichik?
¿Haykapikamataq kuyuchkaq
cercota hina
tanqaypaq-tanqawankichik?
4 Allin reqsisqa kasqaymanta
wichichiwanaykichikpaqmi
tanteanakunkichik.
Llullakuyllatam munankichik.
Simillawanmi alabawankichik.
Sonqoykichikwanñataqmi ñakawankichik.
(Samariy)
5 Diosnillaymi hawkalla kawsachiwaqniyqa.
Payllam confianzawan suyanayqa.
6 Payllam hatun rumi hina
harkaykuwaqniyqa.
Payllam salvaykuwaqniyqa.
Payllam pakaykuwaqniyqa.
Manam ancha wichisaqchu ñoqaqa.
7 Diosllam salvaykuwaqniyqa.
Payllam hatunchawaqniyqa.
Diosllam hatun rumi hina
takyachiqniyqa.
Payllam amparaykuqniyqa.
8 Llapallan runakuna,
qamkunaqa payllapiyá
tukuy tiempo confiakuychik.
Qamkunaqa tukuy sonqowanyá
payta rimapayaychik.
Diosnillanchikmi
ñoqanchiktaqa amparawanchik.
(Samariy)
9 Wakcha kaspapas samay hina
waspiruqllam runakunaqa.
Apu kaspapas llulla hina
yanqallam runakunaqa.
Iskayninkuta balanzapi pesaptinkupas
manam imaniraqtapas llasankuchu.
Kuskankuta balanzapi pesaptinkupas
samay hinallam mana llasankuchu.
10 Imapas daño rurasqaykichikpiqa
amayá confiakuychikchu.
Imapas suwakusqaykichikmantaqa
amayá alabakuychikchu.
Apuyayta hayparuspaykichikqa
amayá chaypiqa hapipakuychikchu.
11 Diosmi nirqa kaynata,
ñoqam uyarirqani kaynata:
“Ñoqamantam hamun atiyqa” niqta.
12 Señorlláy,
qamllam kuyapayakuqqa kanki.
Sapakamamanmi qamqa pagapunki.
Rurasqankuman hinam pagapunki.