Tukuy imamantapas allinqa Diospa kuyakuynillanmi.
Juda law chunniqpi kachkaspan Diosman Davidpa takisqan
63
Diosnilláy,
qamllam Diosniyqa kanki.
Tutapaymantam maskasqayki.
Yakunayachikuq hinam
tukuy sonqoywan
qamta maskallachkayki.
Yakunayachikuq hinam
tukuy kallpaywan
qamta maskallachkayki.
Mana yakupa kasqan
chaki allpapi hinam
qamta maskallachkayki.
2 Santuarioykipim rikuykurqayki qamta.
Chaypim rikuykunaypaq
qawarirqani atiynikita.
Chaypim rikuykunaypaq
qawarirqani kanchariynikita.
3 Kuyapakuynikim kawsakusqaymantapas
aswanraq allinqa.
Simillaywanmi qamtaqa
alabasqayki ñoqallayqa.
4 Wañukunaykamam
qamtaqa alaballasqayki.
Makillayta hoqarispaymi
mañakullasqayki.
5 Wirasapallaña
aycha mikuchkaq hinam
saksaykusaq ñoqallayqa.
Ancha-ancha kusikuywanmi
alabasunki simillayqa.
6 Camaypi waqtapaykuspaymi
qanmanta yuyarini.
Tukuy tutam ñoqallayqa
qanmanta yuyaymanani.
7 Qamllam kanki
ñoqallayta yanapaykuwaqniyqa.
Mamanpa rapranpi chiwchicha hinam
kusikullani ñoqallayqa.
8 Ñoqapa vidayqa
qanman hapichisqam kachkan.
Qampa alleq makillaykim
ñoqallaytaqa hapiwachkan.
9 Wañuchiwaqniy munaqkunaqa
pasaypaq puchukachisqam kanqaku.
Wañuchiwaqniy munaqkunaqa
uku pachamanmi wichiykunqaku.
10 Espadawan wañuchisqam kanqaku.
Atoqkunapa mikusqanmi kanqaku.
11 Reymi ichaqa
Diosrayku kusikunqa.
Diosrayku juraqkunaqa
paytam alabanqaku.
Llulla rimaqkunam ichaqa
siminkupas wichqasqa kanqaku.