Enemigonkunamanta amparananpaq Diosta mañakusqan
Takiqkunapa maestronpaq, Diosman Davidpa takisqan
64
Diosnilláy,
qanman willakusqaytayá
uyariykullaway.
Diosnilláy,
enemigoykunapa manchachikuyninmantayá
waqaychaykullaway.
2 Mana allin ruraqkunapa tanteanakusqanmantayá
pakaykullaway.
Nana-nanaq chaqwa ruraqkunamantayá
pakaykullaway.
3 Espada filochachkaq hinam
rimanankupaq lisollaña kachkanku.
Paykunaqa flechachkaq hinam
qatqe palabrakunata rimarqarinku.
4 Mana culpayoq runatam
pakakusqankumanta flecharunku.
Paykunaqa qonqaymantam
mana manchakuspa flecharunku.
5 Kikinpuram kallpanchanakunku
mana allinkunata ruranankupaq.
Rimanakunkum tranpakunata
pakasqallapi churanankupaq.
“Manam pipas rikunchu”
nisparaqmi piensanku.
6 Mana allinllatam
kaynata tantearqaku:
“Allinsutam tantearunchik”
nispam tantearqaku.
Runakunaqa sacre sonqoyoqmi.
Runakunaqa sacre piensayniyoqmi.
7 Diosmi paykunataqa flecharunqa.
Qonqaymantam flecharunqa.
8 Paykunaqa imam rimasqankuwanmi
kikillanku wichiykunqaku.
Pipas chayta qawaqkunañataqmi
umankuta kuyuchispa kusipayanqaku.
9 Hinaptinmi Diostaqa
llapallan runakuna
chayraq respetanqaku.
Chayraqmi runakunaqa
Diospa tukuy rurasqanmanta
allinta yuyaymananqaku.
10 Allin ruraq runaqa
Tayta Diosraykum kusikunqa.
Allin ruraq runaqa
Tayta Diospim amparakunqa.
Llapallan allin piensaqkunaqa
Diosllapim alabakunqa.