Tayta Diosllatam yupaychanaqa.
Takiqkunapa maestronpaq, Diosman Davidpa takisqan
65
Sion llaqtapi kaq Diosnilláy,
qamllam yupaychasqaqa kanayki.
Sion llaqtapi kaq Diosnilláy,
qamllam prometekusqankutaqa chaskinayki.
2 Qamqa pipapas mañakusqanta
uyariykuqmi kanki.
Llapallan runakunam
qanmanqa asuykamusunki.
3 Mana allin rurasqaykum
ñoqaykutaqa venceruwanku.
Ichaqa mana kasukusqaykutam
qamqa pampachaykuwankiku.
4 ¡Mayna kusisqam
temploykipa pationkunapi yachananpaq
akllasqayki runaqa!
¡Mayna kusisqam
temploykipa pationkunapi yachananpaq
pusamusqayki runaqa!
Wasikipi allin kaqkunawanmi
ñoqaykuqa saksaykusaqku.
Sapaqchasqa temploykipi
allin kaqkunawanmi
ñoqaykuqa saksaykusaqku.
5 Salvaq Diosnillayku,
allin rurasqaykiman hinam contestaykuwankiku.
Admirakuypaq kaqwanmi contestaykuwankiku.
Kay pachapi tukuy ima kaqkunapas
qamllapim confiakunku.
Lamar qochapi tukuy imakunapas
qamllapim confiakunku.
6 Qamqa atiynikiwanmi
orqokunata takyachirqanki.
Chumpikuchkaq hinam
qamqa kallpanchakurqanki.
7 Qamqa upallachinkim
lamar qochapa qaparisqanta.
Qamqa upallachinkim
olankunapa qaparisqanta.
Qamqa upallachinkim
runakunapa qaparisqanta.
8 Karullay-karu llaqtakunapi yachaqkunam
manchakunqaku milagroykikunamanta.
Intipa qespimunanmanta intipa seqaykunankamam
kusikuymanta qaparichinki llapa runakunata.
9 Qamqa kay pachata cuidaspam
paraykiwan parqonki.
Qamqa kay pachatam
allin wiñaqllataña ruranki.
Qamqa yarqaykikunatam
yakuwan huntachinki.
Qamqa runakunapaqmi
kawsaykunata wiñachinki.
Chaynatam alistarqanki.
10 Qamqa chakrapa surconkunatam
yakuwan nuyuykachinki.
Surcopa orqorayaqninkunatam
yakuwan mastarirunki.
Qamqa llumpay parawanmi
chakrata tuytuykachinki.
Qamqa chayraq wiñarimuq
plantachakunatam bendecinki.
11 Qamqa cosecha tiempom
alli-allinta qespichinki.
Maypi-chaypipas
taqekunatam llimparichinki.
12 Chunniqpi pastokunapas
sumaq verdellañam.
Fiestapaq pachasqa hinam
moqokunapas kachkanku.
13 Waqtakunam animalkunawan
sumaqllataña huntarinku.
Qechwapi chakrakunam kawsaywan
sumaqllataña huntarinku.
Llapallankum qapariyllawanña
kusikuymanta takinku.