Diospa rurasqankunaqa admirakuypaqmi.
Takiqkunapa maestronpaq, Diosman takinapaq
66
Kay pachapi llapallan kaqkunaqa
Diosmanyá takisunchik.
Kusikuywan qaparispayá
payman takisunchik.
2 Allin reqsisqa sutinmantayá
payman takiychik.
Allin reqsisqapaq ruraspayá
payman alabaychik.
3 Diostayá niychik qamkunaqa:
“Manchakuypaqmi imapas rurasqaykikunaqa.
Llumpay atiyniyoq kasqaykiraykum
qonqorakusunki enemigoykikunaqa.
4 Kay pachapi llapallan kaqkunam
qamta adorasunki.
Kay pachapi llapallan kaqkunam
qanman takipusunki.
Kay pachapi llapallan kaqkunam
sutikimanta takipusunki.”
(Samariy)
5 Hamuspayá qawaychik
Diospa rurasqankunata,
runakunapaq manchakuypaq
kaqkuna rurasqankunata.
6 Payqa lamar qochatam
chakirachirqa.
Pasanankupaqmi mayutapas
chakirachirqa.
Chayraykuyá kusikusunchik
ñoqanchikqa.
7 Atiyninwanmi wiñaypaq
gobiernan payqa.
Payqa qawachkanmi
llapallan nacionkunataqa.
Mana kasukuqkunaqa manam hatarinqakuchu
paypa contranpiqa.
(Samariy)
8 Llapallan runakunayá,
Diosniykuta alabaychik.
Qamkunaqa llapallaykichikyá,
takikunawan payta alabaychik.
9 Paymi ñoqaykutaqa
kawsachiwarqaku.
Mana urmanaykupaqmi
sumaqta hapiwarqaku.
10 Diosnillayku,
ñoqaykutaqa qanmi
pruebaman churawarqankiku.
Qollqeta chulluchichkaq hinam
ñoqaykutaqa chuyanchawarqankiku.
11 Qamqa mallamanmi
wichiykachiwarqankiku.
Llasaq qepitam
qepiykachiwarqankiku.
12 Umaykupim runakunawan
saruparachiwarqankiku.
Mayu ukuntam
pasachiwarqankiku.
Nina ukuntam
pasachiwarqankiku.
Chaywanpas tukuy imapa
kasqanmanmi horqoykuwarqankiku.
13 Lliw kañapunaypaqmi animalkunata
temploykiman apamullasaq.
Chaynapim prometekusqaykunata
qanman cumplillasaq.
14 Chaykunataqa simillaymi
qanman prometekusurqanki.
Chaykunataqa sasachakuyniypim
simillay prometekusurqanki.
15 Wira animalkunatam
lliwchanta kañapusqayki.
Ñoqaqa qampaqmi
carnerokunata qosnichipusqayki.
Ñoqallayqa torokunatam
qanman ofrecesqayki.
Ñoqallayqa chivatokunatam
qanman ofrecesqayki.
(Samariy)
16 Diosta llapallan respetaqkunayá,
hamuspa uyariwaychik.
Ñoqapaq Dios imam rurasqanmantamá
qankunaman willasqaykichik.
17 Ñoqam qaparispay qayakurqani.
Ñoqam rimaspay qayakurqani.
18 Sonqoypi kaq huchata
kuyakuywan qawaptiyqa
Señorqa manach ñoqataqa
uyariwanmanchu karqa.
19 Diosqa cheqaptam uyariykuwarqa.
Ruegakusqaytam payqa uyariykuwarqa.
20 Alabasqayá kachun Diosqa.
Payqa mañakusqaytam
mana negawarqachu.
Payqa kuyapayakuynintam
mana qechuwarqachu.