Tayta Diospuni Jobta contestasqanmanta
38
Jobtam Tayta Dios rimapayarqa sinchillaña wayra ukumanta:
2 ¿Pitaq qamqa kanki
tanteasqaykunata yanqachanaykipaqqa?
¿Pitaq qamqa kanki
mana yachaywan yanqakuna rimanaykipaqqa?
3 Peleananpaq kaq qari hinayá
alistakuy sumaqta.
Ñoqam tapusqayki hinaptinmi
contestawanki sumaqta.
4 ¿Maypitaq karqanki
kay pachata qallarichiptiyqa?
Kunanyá contestaway
cheqaptapuni yachaspaykiqa.
5 Sichum yachaptikiqa
¿pitaq chaypa sayayninta tupurqa?
Sichum yachaptikiqa
¿pitaq cordelta chutarirqa?
6 ¿Imapa hawanpitaq kachkan
takyachisqa kay pachaqa?
¿Pitaq churarqa esquinanpi
hapiq rumitaqa?
7 ¿Maypitaq karqanki
llapallan achikyaq lucerokuna takiptinkuqa?
¿Maypitaq karqanki
llapallan angelkuna qaparillawanña kusikuptinkuqa?
8 Allpa ukumanta lamar qocha toqyaruptinqa
¿pitaq punkukunawan wichqarurqa?
9 Lamar qochamanqa puyukunatam
qorqani chaywan pachakunanpaq.
Lamar qochamanqa yanay-yanay tutayaytam
qorqani chaywan chumpikunanpaq.
10 Ñoqaqa churarqanim
lamar qochapa maykamam rinanta.
Hinaspam churarunitaq
punkunkunatawan cerrojonkunata.
11 Ñoqaqa lamar qochatam nirqani kaynata:
“Kaykamallam chayamunki qamqa.
Amapunim pasankichu kaymantaqa.
Hatun tukuq olaykikunapas kayllapim sayanqa.”
12 ¿Yaqachum haykapipas achikyamunanpaq
kamachikurqanki?
¿Yaqachum haykapipas achikyamuyman
sitionta qawachirqanki?
13 ¿Yaqachum kamachirqanki achikyay paqarinanpaq
chaynapi llikllapa patankunamanta chaspichkaq hina
mana allin ruraqkunata wischurunaykipaq?
14 Hinaptinmi chay achikyayqa
kay pachata sumaqllataña rikuriykachin.
Sumaqllaña pachasqata hinam rikuriykachin.
15 Mana allin ruraqkunapa
achkiyninqa tutayaymi.
Ichaqa chaytapas paykunamantaqa
qechurun achkiymi.
Amenazakuq atiyninkupas chinkarunmi.
16 Lamar qochapa toqyanan pukyukunakamaqa
¿yaqachum yaykurqanki?
Uku-uku lamar qochapa mana reqsiy atinankunapi
¿yaqachum kaynaman-waknaman purirqanki?
17 Qanmanqa ¿yaqachum rikuykachisurqanki
wañuqkunapa kasqanpa punkunta?
Qamqa ¿yaqachum rikuykurqanki
sinchi tutayaypa punkunkunata?
18 Qamqa ¿yaqachum entiendenki
mayna ancho-anchom kay pachaqa kasqanta?
Sichum chayta yachaspaykiqa
niykuwayá ñoqata.
19 ¿Maynintataq rina
achkiypa kasqanmanqa?
¿Maypitaq kachkan
tutayaypa kasqanqa?
20 ¿Chaynapi chay achkiytaqa
mayman chayanankama pusanaykipaq
chaynapi chay achkiytaqa
wasinman chayanankama pusanaykipaq?
21 Tukuy chaykunataqa seguroch
yachankipuni qamqa.
Achka-achka watayoqñamiki
kachkanki qamqa.
22 Ritikunapa qallarisqanmanqa
¿yaqachum qamqa yaykurqanki?
Runtu parapa qallarisqantaqa
¿yaqachum rikurqanki?
23 Chaykunataqa ñoqam
waqaychani ñakarichina tiempokunapaq.
Chaykunataqa ñoqam waqaychani
guerrapi peleana tiempokunapaq.
24 Yachaptikiqa ¿maylaw ñanninkunatataq
achkiyqa cheqerin?
Yachaptikiqa ¿maylaw ñanninkunatataq
intipa qespimunan lawmanta pukumuq
wayraqa cheqerin?
25 ¿Pitaq loco parapa ñanninkunata kicharqa?
¿Pitaq rayopa toqyasqallanña
wayra parapa ñanninta kicharqa
26 chaynapi mana pipa yachananman
chayachinanpaq,
chaynapi mana runapa kasqan
chunniqman parachinanpaq?
27 Chaynapim ñoqaqa chaki allpakunaman
saksanankama paraykachini.
Chaynapim ñoqaqa llullu pastokunata
sumaqllataña wiñarichini.
28 Yachaptikiqa ¿parapaqa
kapunchum taytanqa?
Yachaptikiqa ¿sullapaqa
kapunchum taytanqa?
29 Yachaptikiqa ¿pitaq ritipa mamanqa?
Yachaptikiqa ¿pitaq qasataqa wachakurqa?
30 Yachaptikiqa ¿pitaq yakukunata
ritiyarachispan rumiman tikrarun?
Yachaptikiqa ¿pitaq uku-uku lamar
qochapa hawanta ritiman tikrarun?
31 ¿Yaqachum qamqa Suchu sutiyoq
lucerokunapa watakunta churaykuwaq?
¿Yaqachum qamqa Qalalu sutiyoq
lucerokunapa watakunta paskaruwaq?
32 ¿Qamchum huñunasqa lucerokunata
sapa tuta lloqsichimunki?
¿Qamchum Suwapa Corralnin
sutiyoq lucerokunata pusanki?
¿Qamchum chaypa qatiqnin
lucerokunatapas michinki?
33 Qamqa ¿reqsinkichum
cielokunapi gobiernaq decretokunata?
¿Yaqachum kay pachapipas servikunanpaq
churanki chay decretokunata?
34 ¿Yaqachum qamqa puyukunata kamachiwaq
chaynapi sinchi parawan nuyurusunaykipaq?
35 Qamqa ¿kamachinkichum
llipyaykunatapas maylawmanpas pasanankupaq?
Hinaptinqa ¿yaqachum
chay llipyaykunaqa nisunkiman:
“Qamta kasukunaykupaqmi
kaypi kachkaniku” nisparaq?
36 Yachaptikiqa ¿pitaq qoqan sutiyoq
pawaq animalman yachayta qorqa?
Yachaptikiqa ¿pitaq utulluman
entiendeyta qorqa?
37 Puyukunata yupananpaqqa
¿pitaq yachayniyoq kanman?
¿Pitaq puyñumanta tallichkaq hina
cielokunamanta parachimunman
38 chaynapi allpapas mituyarunanpaq,
chaynapi kurpakunapas laqanakurunanpaq?
39 ¿Qamchum china leonpa mikunantapas hapipunki?
¿Qamchum malta leonkunamanpas saksaykachinki?
40 ¿Chaynatachum ruranki
leonkuna unchupakuykuspa
machayninpi kaptinku?
¿Chaynatachum ruranki
leonkuna uchkunpi
laqakuykuspa wateqaptinku?
41 ¿Pitaq ullachkupaq
mikunanta churapun?
Mallqonkunapas qayakuwaptinqa
hinaspa yarqaymanta pawaykachaptinkuqa
¿pitaq mikuyninta churapun?