37
Chay rayokunapa qaparisqanta
uyariptiymi sonqollaypas tukukuruchkanña.
Chay rayokunata uyariptiymi
sonqollaypas qasqoymanta pawaruchkanña.
2 Qamkunaqa uyariychikyá
Diospa llumpa-llumpay qaparisqanta.
Qamkunaqa uyariychikyá
paypa siminmanta lloqsimuq qapariyta.
3 Payqa cielokunapa tukuy ukunpim
llipityarichin.
Payqa kay pachapa cantonkamam
llipityarichin.
4 Chay llipyaykunapa qepantañataqmi
Diospa qaparisqan uyarikun.
Paypa qaparisqanmi
manchakuyllapaqña uyarikun.
Paypa vozninqa
mana taniqmi uyarikun.
5 Llumpay admirakuypaqmi
Diospa vozninpa tunrururusqanqa.
Mana entiendey atinanchikkunatam
ruran payqa.
6 Paypuni lastatapas kamachiptinmi
kay pachaman wichimun.
Paypunim nisyullataña
paratapas chayachimun.
7 Dios chaynata ruraptinmi
runakunapas wasillankupi qeparunku.
Chaykunataqa Diospuni
rurasqantam yachanqaku.
8 Purun animalkunapas
machayninmanmi yaykurunku.
Pakakunankupim yachanku.
9 Surlawmantam vientokuna qespiramun.
Norte lawmantam chirikuna qespiramun.
10 Dios pukuykuptinmi
yakukunapas rankachurun.
Dios pukuykuptinmi
hatun qochakunapas ritiyarun.
11 Payqa puyukunatapas
yakuwanmi huntaykachin.
Chaypa ukunkunamantam
llipyaykunata cheqechin.
12 Llapa llipyaykunam cielokunapi
qewi-qewillaña muyurichkanku.
Diospa dirigisqan hinaspa kamachisqanmi
chaynataqa rurachkanku.
Tukuy kay pachapim
chay kamachisqanta rurachkanku.
13 Wakin kutipiqa Diosmi
chaykunata apamun castigananpaq.
Wakin kutipiñataqmi apamun
allpanta parqonanpaq.
Wakin kutipiñataqmi apamuntaq
kuyapayakuyninta qawachikunanpaq.
14 Tayta Job,
qamqa sayaykuspayá uyariway ñoqata.
Qamqa qawariyá Diospa admirakuypaq rurasqankunata.
15 ¿Yachankichum qamqa
imaynatam Dios kaykuna kamachisqanta?
¿Yachankichum qamqa
puyu ukupi imaynam llipyachisqanta?
16 ¿Yachankichum qamqa
imaynam puyukunapa altokunapi takyasqanta?
Chaykunaqariki qawachiwanchikmi Diosqa
admirakuypaq hatu-hatun yachayniyoq kasqanta.
17 Qamqa pachaykipa ukunpim rupapakurunki.
Surlawmanta rupamuspan allpata
susunkarachiptinmi qamqa rupapakurunki.
18 ¿Yaqachum qamqa
cielota Dios mastariptin yanapawaq?
¿Yaqachum cielota fundisqa espejota hina ruraysiwaq?
19 Diosta imam ninaykupaqyá
yachachiwayku.
Manam paywanqa churanakuymankuchu
ñoqaykuqa tutayaypi kachkaq hina
mana yachaq kasqaykurayku.
20 ¿Ñoqapa rimarisqayqa
Diosman willasqaraqchum kanman?
¿Runaqa chaynapi chinkachisqa
kananpaqchum kikinraq mañakunman?
21 Wayrakuna puyuta aparuspanmi
rikurirachin cielopi achkiyta.
Chaymi sumaqllataña achkiriptin runakunaqa
manaña rikuyta atinkuchu chay achkiyta.
22 Norte lawmantam hamuchkan
qori hina kancharichkaq sumaq antaqa.
Mancharikuypaq sumaqllaña
kanchariymi muyuriykun Diostaqa.
23 Tukuy Atiyniyoq Diostaqa
manam haypayta atichwanchu.
Llumpa-llumpay kallpayoq kasqanraykum
paytaqa mana haypayta atichwanchu.
Allin arreglo ruraq kasqanraykum
payqa mana pitapas ñakarichinchu.
Siemprepuni allin ruraq kasqanraykum
payqa mana pitapas ñakarichinchu.
24 Chayraykum runakunaqa
respetanku Diostaqa.
Diosqa manam kaqpaqpas hapinchu
yachaysapa tukuq runakunataqa.