Eliumi rimarin Diospa hatu-hatun kayninmanta
36
Eliu yapatawan rimarispanmi kaynata nirqa:
2 Tumpatayá suyaykuway ñoqa yachachinaypaq.
Kachkanraqmi Diospa favorninpi rimarinaypaq.
3 Ancha-ancha yachasqaykunamantam
rimarisaq.
Unanchaqniyqa razonninpi kasqantam
qawachisaq.
4 Cheqaptapunipas manam
llullachu rimasqaykunaqa.
Ñoqaqariki alli-allin yachayniyoq kaspaymi
rimapayachkaykichik qamkunataqa.
5 Diosqa atiyniyoq kasqanraykum
pitapas nanachikuntaq.
Payqa tukuy ima rurasqanpipas
atiyniyoq kasqanraykum takyantaq.
6 Manam kawsachinqachu
mana allin ruraq runataqa.
Ñakariqkunapaqmi ichaqa
allin arreglota ruraykapunqa.
7 Diosqa nanachikunmi
allin ruraq runakunataqa.
Reykunawanña tiyanankupi tiyaptinkupas
nanachikunmi paykunataqa.
Maypipas hoqarisqa kasqankupim
wiñaypaq takyachin paykunataqa.
8 Cadenawanña chaqnasqa kachkaptinkupas,
waskakunawanña watasqa kachkaptinkupas
9 Diosmi paykunaman reqsichin
mana allin rurasqankumanta.
Diosmi paykunaman reqsichin
orgullowan mana kasukusqankumanta.
10 Diosqa paykunatam rimapayan
wanakunankupaq.
Diosqa paykunatam rimapayan
mana allinmanta kutirikunankupaq.
11 Sichum Diosta kasukuspa
payta serviptinkuqa
kawsakunankukamam allinllaña kanqaku.
Wañukunankukamam kusisqallaña kanqaku.
12 Mana kasukuspankum ichaqa guerrapi
wañuchisqa kanqaku.
Mana kasukuspankum ichaqa mana
imata yachastin wañukunqaku.
13 Rumi sonqo runakunaqa
llumpa-llumpay piñakuqllañam kanku.
Cadenakunawan chaqnasqa kaspankupas
paypa yanapakuynin mana maskaqmi kanku.
14 Chayna rumi sonqo runakunaqa
mozollaraq kachkaspam wañukunkupas.
Penqaypaq kaqkunata
rurachkaspam wañukunkupas.
15 Ñakariqkunataqa Diosmi libraykun
chay ñakarisqanwan.
Nanaywan kaqkunataqa Diosmi rimapayan
chay nanayninwan.
16 Payqariki qamtapas tukuy sasachakuymantam
aysaypay-aysasuchkanki.
Payqariki mana ima sasachakuypa kasqanmanmi
pusasuchkanki.
Payqariki miskillaña mikuykunapa kasqanmanmi
kusikunaykipaq pusasuchkanki.
17 Mana allin ruraq runakunapa juzgasqa kanankum
qampiña cumplikuspan hapisuchkanki.
Juiciopi sentenciasqanmi hapisuchkanki.
18 Chaynaqa cuidakuyá,
yanqañataq pipas qori-qollqewan aysaykusunkiman.
Chaynaqa cuidakuyá,
yanqañataq pipas hatun regalokunawan pantarachisunkiman.
19 Sasachakuymantaqa manam
librasunkimanchu qaparisqaykipas.
Sasachakuymantaqa manam
librasunkimanchu tukuy atiynikipas.
20 Chaynaqa amayá munaychu qonqaymanta
nacionkunapa chinkarunan tutatapas.
21 Cuidakuyá amaña mana
allin rurayman kutirinaykipaq.
Qamqariki ñakariymantam akllakurqanki
mana allin ruraqña kanaykipaq.
22 Diosqa hatu-hatun atiyniyoqmi.
Payqa mana pipapas igualay atinan yachachikuqmi.
23 Manam pipas paytaqa
tapunmanchu imapas rurasqanmantaqa.
Manam pipas paytaqa ninmanchu
mana allin rurasqanmantaqa.
24 Runakuna takispam
alabanku Diospa rurasqanmanta,
chaynaqa qampas payta hatunchaspayá
alabay rurasqanmanta.
25 Llapa runakunam paytaqa qawanku.
Runakunaqa karullamantam paytaqa rikunku.
26 Diosqa hatu-hatunmi,
chayraykum mana entiendeyta atichwanchu paytaqa.
Manataqmi atichwanchu
paypa watankuna yupaytaqa.
27 Diosmi altoman yakuta waspichin.
Hinaspam chulluchispan mayukuna kallpananpaq parachin.
28 Paraqa puyumantam tallikamun.
Paraqa llumpayllatañam kay pachaman tallikamun.
29 ¿Pitaq entiendenman
puyukunapa mastarikusqanta?
¿Pitaq entiendenman Diospa yachasqanmanta
rayokunapa tunrururumusqanta?
30 Diosqa llipyaytapas
tukuy muyuriqninmanmi mastarirun.
Lamar qochapa ukuntam ichaqa pakaykurun.
31 Chaynatam Diosqa mikuchin
nacionkunaman.
Chaynatam Diosqa achkallaña mikuyta
qon paykunaman.
32 Payqa llipyaytapas makinpim hapiykun.
Payqa llipyaytapas mayman chayananpaqmi kamachikun.
33 Altopi tunrururuykunam
willawanchik paramunanmanta.
Animalkunapas willawanchikmi
wayra para hatarimunanmanta.