39
Qamqa ¿yachankichum ima tiempopim
purun cabrakuna wachasqanta?
Qamqa ¿qawarqankichum
luwichu wachachkaqta?
2 Qamqa ¿yuparqankichum
wiksayakusqan killankunata?
Qamqa ¿yachankichum
haykapim wachananta?
3 Chay animalkunaqa
chuychuykuspam wacharunku.
Chaynapim nanayninkunaqa
samarunña wacharuptinku.
4 Chaynapim wawankunapas
sumaqllataña purunkunapi hatunyanku.
Chaynapim wawankunapas
mana kutimuqña ripukunku.
5 Yachaptikiqa ¿pitaq purun
asnota munasqanpi purinanpaq kachaykurqa?
Yachaptikiqa waskanmanta kachaykuchkaq hina
¿pitaq purun asnota kachaykurqa?
6 Chay asnokunamanmi yachananpaq
qorqani Araba sutiyoq chunniqkunata.
Chay asnokunamanmi yachananpaq
qorqani qollpakunapa kasqan qechwata.
7 Chay asnokunaqa asikunmi
llaqtakunapi chaqwakunamantapas.
Chay asnokunaqa manam kasukunchu
arrieropa qaparisqantapas.
8 Chay asnokunaqa moqokunapim
pastota maskanku.
Verde kaqkunata maskastinmi
purinku.
9 Purun toroqa ¿munanmanchum qampaq llamkayta?
Purun toroqa ¿munanmanchum
corralnikipi artesapa waqtanpi samayta?
10 Chay torotaqa ¿yaqachum
yapunaykipaq coyundawan wataruwaq?
¿Qepaykita qatisuptikichum
chay qechwa allpata rastrillachiwaq?
11 ¿Yaqachum qamqa kallpasapa kasqanrayku
chay toropi confiakuwaq?
¿Kallpasapa kasqanraykuchum chay torotaqa
llamkapusunaykipaq dejaykuwaq?
12 Qamqa ¿yaqachum chay toroman
hapipakuwaq payña cosechapusunaykipaq?
Qamqa ¿yaqachum chay toroman
hapipakuwaq payña eraykipi huñupusunaykipaq?
13 Avestruz sutiyoq animalmi raprankunata
kuyuchin kusikuymanta.
Cigueña sutiyoq pawaq animalpa raprankunaqa
aswan allinraqmi avestruzpamanta.
Chay cigueñapa purankunaqa
aswan allinraqmi avestruzpamanta.
14 Chay avestruz animalqa
allpapim runtunkunata saqerun.
Ñutu allpapi qoñichkaqtam saqerun.
15 Payqa manam yachanchu
qonqayta sarurusqa kanantaqa.
Payqa manam yachanchu
purun animal ñuturunantaqa.
16 Manapas wawanchu kanman hinam
payqa ñakarichin wawankunatapas.
Manam imapas qokunchu
yanqapaq rurasqanpas.
17 Arí,
paymanqa manam yuyayta qorqanichu.
Arí,
paymanqa manam entiendeyta qorqanichu.
18 Ichaqa sayariykuspanqa,
ichaqa raprankunata kallpananpaq hoqarispanqa
caballokunamantapas asikunmi,
sillakuqmantapas asikunmi.
19 Chaynaqa caballomanqa ¿qamchum
kallpanta qorqanki?
¿Qamchum matankanpi orqochakuq
pelonkunata churarqanki?
20 ¿Aqarway uru pawaykachachkaqta hinachum
caballota pawaykachachinki?
Senqanwan qorqoryaspa manchakuypaq caballotaqa
¿qamchum pawaykachachinki?
21 Caballoqa kallpanpi kusisqa kaspanmi
aspikachanraq qechwapi allpatapas.
Mana mancharikuspam
kallpan guerrapi peleananpaqpas.
22 Enemigopa manchachisqanmantapas
asikunmi caballoqa.
Enemigopa espadanmantapas
manam manchakuymantachu
kutirikun caballoqa.
23 Flechakuna apananku taqraqyaptinpas
caballoqa manam manchakunchu.
Hatun lanzawan taksa lanza llipipipiptinpas
caballoqa manam manchakunchu.
24 Corneta waqaykuptinqa katkatataspam
manaña sayayta atispa kallpaytaña qallaykun.
Samay chinkay kallpaspam
pampataqa mikuypaq-mikuykun.
25 Corneta waqaykuptinmi
contestaq hinaraq weqeqeqen caballoqa.
Karullamantaraqmi guerratapas
musyaykun caballoqa.
Capitankunapa kamachikusqantawan
peleaqkunapa qaparisqantam
uyarinpuni caballoqa.
26 ¿Qam yachaysapa kasqaykiraykuchum
wamanpas yachan pawayta?
¿Qam yachaysapa kasqaykiraykuchum
wamanpas surlawman mastarin raprankunata?
27 ¿Qam kamachiptikichum ankapas
altoman hoqarikun?
¿Qam kamachiptikichum ankapas
orqokunapi qesanta rurakun?
28 Chay ankaqariki
yachan qaqakunapim.
Chay ankaqariki
tutapas puñun qaqakunapim.
Chay ankaqariki
orqopa puntankunapim wasichakun.
Chay ankaqariki
mana seqay atinakunapim yachakun.
29 Chaymantaraqmi mikunanpaq
hapinanta wateqamun.
Karumantaraqmi payqa
qaway-qawamuspan rikuramun.
30 Paypaqa mallqonkunapas
yawartam soqon.
Wañusqakunapa kasqanpim
ankakunaqa tarikun.