40
Tayta Diosqa Jobtam nirqataq:
2 ¿Ñoqa Tukuy Atiyniyoq Dioswan atipanakuq
runaqa anyawanmanraqchum?
¿Ñoqa Dioswan qaqchanakuq runaqa
contestawanmanraqchum?
3 Jobñataqmi Tayta Diosta nirqa:
4 Mana imapaq valeqmi kallaniqa.
¿Imataraqtaq nillaykimanqa?
Upallakurusaqñayá ñoqaqa.
5 Achka kutikamañam
rimarqani ñoqaqa.
Kunanqa manam imatapas
rimaymanñachu ñoqaqa.
Atiyninta Tayta Dios qawachikusqanmanta
6 Jobtam Tayta Dios sinchillaña wayra ukumanta kaynata nirqa:
7 Peleananpaq kaq qari hinayá
alistakuy sumaqta.
Ñoqam tapusqayki
hinaptinmi contestawanki sumaqta.
8 Qamqa ¿sentencia rurasqaytachum
mana kaqpaqpas hapinki?
¿Mana huchayoqpaqña hapikunaykipaqchum
qamqa mana allin ruraqpaqña hapiwanki?
9 Qampas ¿ñoqa hina
atiyniyoqchum kanki?
¿Rayopa qaparisqanta hinachum
qampas ñoqa hina qaparinki?
10 Chaynaqa qampas atiyniyoq
hinayá hatunchakuy.
Chaynaqa qampas atiyniyoq
hinayá altopi churakuy.
Chaynaqa qampas kancharichkaq
hinayá lliwwan reqsichikuy.
11 Chaynaqa qampas sinchi
piñakuynikitayá cheqerichiy.
Llapa hatun tukuqkunata
qawarispayá humillaykachiy.
12 Qawarispallayá humillaykachiy
paykunataqa.
Maymi kasqanpiyá saruparuy
mana allin ruraq runakunataqa.
13 Paykunataqa allpapiyá
pamparuy llapallanta.
Paykunataqa wañuqkunapa kasqanpiyá
pakaruy llapallanta.
14 Hinaptinqa ñoqapas
qamtam alabasqayki.
Kallpallaykiwan salvakurusqaykimantam
razonta qosqayki.
15 Qawariyá qamtawan unanchasqay
abehemot sutiyoq animalta.
Payqariki bueyeskuna hinam
mikun pastokunata.
16 Qawariyá mayna kallpayoqmi
paypa wasanqa kasqanta.
Qawariyá mayna kallpayoqmi
wiksa qaranqa kasqanta.
17 Cedro sacha kuyuchkaqta
hinam chupantapas kuyuchin chay animalqa.
Piernankunapi ankukunapas
simpay-simpaymi kachkan paypaqa.
18 Chay animalpaqa tullunkunapas kachkan
broncemanta tubo hina kallpasapam.
Chay animalpa piernankunapas kachkan
fierro hina kallpasapam.
19 Llapan animalmantapas kallpasapatam
unancharqani chay animaltaqa.
Chaynaqa ñoqallam unanchasqayrayku
espadawan asuykuyman paymanqa.
20 Orqokunapi pastokunapas
paypaqmi wiñachkan.
Chaypitaqmi purun animalkunapas
pawaykachachkan.
21 Ichaqa chaywanpas tankar kichkapa
ukunpim waqtapakun.
Ichaqa chaywanpas soqosllaña
cienegakunapim pakakun.
22 Chay animaltaqa tankar kichkakunam
llantuykun.
Chay animaltaqa mayupa patanpi wiñaq
kiswarkunam muyuriykun.
23 Jordan Mayu yapakuptinpas
manam payqa manchakunchu.
Jordan Mayuqa siminmanña
haypaptinpas payqa manam manchakunchu.
24 Qawakuchkaqtaqa ¿yaqachum
pipas hapirunman?
¿Yaqachum pipas senqanta toqoruspan
lazowan pasarachinman?