Kasukuqkunaqa Tayta Diospa bendecisqan kanankumanta
28
—Cheqaptapunipas yupaychasqanchik Tayta Diosta kasuspaykichik kunan willasqay kamachikuyninkunata ruraptikichikqa paymi kay pachapi llapallan nacionkunamanta aswan reqsisqata rurasunkichik.
2 Tukuy kaykunawan bendecisqam kankichik yupaychasqanchik Tayta Diosta kasukuspaykichikqa.
3 Llaqtapipas chaynataq chakrapipas bendecisqam kankichik.
4 Tayta Diosmi bendecinqa churikichikkunata,
cosechaykichikkunata chaynataq vacaykichikkunapa,
ovejaykichikkunapa hinaspa tukuy animalnikichikkunapa uñankunatapas.
5 Bendecisuptikichikmi canastaykichikpas huntallaña kanqa chaynataq masa poqochinaykichik artesapas.
6 Maymi risqaykichikpim Tayta Diospa bendecisqan kankichik.
7 —Enemigoykichikkuna contraykichikpi peleaptinkupas Tayta Diosmi vencechisunkichik.
Allin formasqam contraykichikpi hamunqaku ichaqa cheqeruspankum qamkunamanta ayqenqaku.
8 —Yupaychasqanchik Tayta Diosmi bendecisunkichik taqekichikpi kaq kawsaykunapas mana tukunanpaq,
bendecisunkichiktaqmi tukuy ima llamkasqaykichikkunapipas hinaspam hawka kusisqata kawsachisunkichik qosunaykichik allpapi.
9 —Sichu kamachikuyninkunata cumplispa munasqanman hina kawsaptikichikqa prometesusqaykichikman hinam payllapaqña sapaqchasqan runankunata hina yupaychasqanchik Tayta Dios hatallisunkichik.
10 Hinaptinqa kay pachapi llapallan runakunam yachanqaku Tayta Diospa runankunawan sutichasqa kasqaykichikta hinaspam manchakusunkichik.
11 Tayta Diosmi llimparichkaqta tukuy imatapas qosunkichik,
qosunkichikmi achka churikunata,
mirachinqataqmi animalnikichikkunatapas,
qosunkichiktaqmi sumaqllaña cosechakunatapas.
Chaynatam ruranqa abuelonchikkunaman prometesqan qosunaykichik allpapi.
12 Kapuqninkunata kicharichkaq hinam allpaykichikman tiempollanpi cielokunamanta parachimunqa hinaspam tukuy rurasqaykichikpi yanapasunkichik.
Achka nacionkunamanmi prestankichik,
qamkunam ichaqa mana pimantapas prestakunkichikchu.
13 Tayta Diosmi munaychakuqta rurasunkichik,
qamkunapim ichaqa mana pipas munaychakunqachu.
Chaynataqa rurasunkichik yupaychasqanchik Tayta Diospa kunan willasqay kamachikuyninkunata kasukuspa ruraptikichikmi
14 ichaqa chayna kanaykichikpaqqa amam karunchakunkichikchu ñoqapa kunan kamachisqaymanta hinaspapas amataqmi taytacha-mamachakunataqa adoranaykichikpaq qatinkichikchu.
Mana kasukuqkunapaq Diospa castigonmanta
15 —Sichu yupaychasqanchik Tayta Diosta mana kasuspaykichik kunan willasqay kamachikuyninkunatapas chaynataq decretonkunatapas mana ruraptikichikqa castigasqam kankichik.
16 Ñakasqam kankichik llaqtapi chaynataq chakrapipas.
17 Ñakasqa kaspam canastaykichikpas mana imayoq kanqa,
hina chaynallam kanqa masa poqochinaykichik artesapas.
18 Ñakasqam kanqa churi-wawaykichikpas,
cosechaykichikpas,
vacaykichikkunapas,
ovejaykichikkunapas chaynataq tukuy animalnikichikkunapa uñankunapas.
19 Ñakasqam kankichik maymi risqaykichikpipas.
20 —Tayta Diosmi tukuy rurasqaykichikpi ñakasunkichik,
muspachisunkichik,
llakichisunkichik.
Mana allinkunata ruranaykichikpaq paymanta rakikusqaykichikraykum manapas unaypi pasaypaqta chinkarachisunkichik.
21 Dueñochakunaykichik allpapi kachkaptikichikmi Tayta Dios kachamunqa peste onqoyta tukurusunaykichikpaq.
22 Tayta Diosqa kachaykamunqataqmi tisis onqoytapas,
ñakarichikuq calenturatapas,
inflamaciontapas,
nisyu rupaytapas,
usyay tiempotapas chaynataq chakraykichikpi trigopaq polvillotapas,
chaykunam qatisunkichik chinkanaykichikkama.
23 Cielokunamantapas manañam chikallantapas paramunqachu hinaptinmi allpaykichikpas pasaypaqta taqrayarunqa.
24 Tayta Diosmi parapa rantinpi parachimunqa ñutu allpatawan aqotaña chinkachisqa kanaykichikkama.
25 Tayta Diosmi entregaykusunkichik enemigoykichikpa vencesqan kanaykichikpaq.
Enemigoykichikpa contranpi allin formasqa richkaspapas pasaypaqta cheqeruspam paykunamanta ayqekunkichik,
qamkunaqa rikurirunkichik kay pachapi nacionniyoq runakunapa mancharikunanñam.
26 Ullachkukuna chaynataq purun animalkuna ayaykichikta mikuptinpas manam pipas manchachiqnin kanqachu.
27 —Egipto nacionpi runakunata hinam ñakarichisunkichik chupuwan,
amoqllowan,
sarnawan chaynataq seqsipakuykunawanpas mana hampikuypas atinaykichikkama.
28 Tayta Diosqa castigasunkichitaqmi locoyaywan,
ñawsayaywan chaynataq muspaypi hinaña kaywanpas
29 hinaptinmi chawpi punchaw kachkaptinpas tutayaypi llapchakachastin ñawsa hinaña purinkichik.
Manam ima rurasqaykichikpas allinqa lloqsinqachu.
Runakuna ñakarichisuspaykichikmi tukuy imaykichiktapas qechurusunkichik ichaqa manam pipas yanapaqnikichik hamunqachu.
30 Casarakunaykipaq rimapayasqayki sipastapas hukmi abusarunqa.
Wasitam ruranki ichaqa manam chaypi yachankichu.
Uvas huertatam plantanki ichaqa manam rurunta mikunkichu.
31 Toroykitam qayllaykipi nakanqaku ichaqa manam aychanta mikunkichu.
Wasikimantam asnoykita pusanqaku ichaqa manam kutichimusunkichu.
Ovejaykikunatam enemigoykikuna qechusunki ichaqa manam pipas yanapaqniki hamunqachu.
32 Qawachkaptikipunim churikikunatapas huklaw nacioniyoq runakunaman entreganqaku.
Imay horapas paykunawan tupaykuytam anchallataña munanki ichaqa manam imata ruraspapas atinkichu.
33 Chakraykimanta cosechasqaykikunatam otaq anchata llamkaspayki huñusqaykikunatam mana reqsisqayki runakuna mikukunqaku.
Qamqa sarutyasqa kaspam chaylla-chaylla ñakarinki.
34 Tukuy chaykuna pasasuptikim locoyarunki.
35 Tayta Diosmi ñakarichisunki moqoykikunapi,
piernaykikunapi chaynataq umaykikama mana hampiy atina chupukunawan.
36 —Qampapas chaynataq abueloykichikkunapapas mana reqsisqan nacionmanmi qamtapas chaynataq reynikitapas Tayta Dios pusachisunkichik.
Chaypim kullumanta chaynataq rumimanta rurasqa taytacha-mamachakunata adoranki.
37 Tayta Diospa pusachisusqayki llapallan nacionkunapim qamqa rikurirunki pipapas manchakunan,
asipayanan chaynataq burlakunan runaña.
38 Achkatam tarpunki ichaqa langostakuna tukurusqanraykum pisillata cosechanki.
39 Huertaykipi uvasta plantaspaykim llamkanki ichaqa manam vinota tomankichu nitaqmi uvasnintapas pallankichu urukuna tukurusqanrayku.
40 Llapallan chakraykikunapim aceituna sachaykikuna kapusunki ichaqa rurunmanta kaq aceitewanmi mana untakunkichu rurunkuna kikillanmanta wichirusqanrayku.
41 Churikikuna kaqpas manam qanwanchu yachanqaku huklaw nacionkunaman presota pusaruptinku.
42 Langostakunam tukurunqa llapallan sachaykikunatawan llapallan tarpukuynikikunatapas.
43 Qamkunawan yachaq forasterokunam qamkunamantapas aswan-aswan munayniyoq kanqaku,
qamkunañataqmi aswan-aswan menosyankichik.
44 Paykunam prestasunkichik,
qamkunañataqmi paykunamanqa mana ima prestaytapas atinkichikchu.
Paykunam munaychakusunkichik,
qamkunañataqmi paykunata servinkichik.
45 —Chaynaqa chay castigokunamá hayparuspa wañurachisunkichik.
Chaynaqa kankichik yupaychasqanchik Tayta Diosta mana kasukusqaykichikraykum chaynataq willasusqaykichik kamachikuyninkunatapas hinaspa decretonkunatapas mana cumplisqaykichikraykum.
46 Tukuy chay castigokunam qamkunapa contraykichikpi chaynataq miraynikichikpa contranpipas admirakuypaq señal hina wiñaypaq kanqa.
47 Chaykunaqa chayamusunkichik tukuy imapas qowaqninchik yupaychasqanchik Tayta Diosta kusikuywan hinaspa tukuy sonqowan mana adorasqaykichikraykum.
48 Contraykichikpi Tayta Diospa kachamusqan enemigoykichikkunatam servinkichik yarqaymanta,
yakunayasqa,
pachamantapas qalatullaña hinaspa tukuy imamantapas wakchayasqa.
Wañunaykichikkamam paykunata Tayta Dios servichisunkichik fierro yugota apachkaqta hina.
49 Kay pachapa cantonpiraq kaq nacionmantam contraykichikpi runakunata Tayta Dios pusamunqa.
Paykunam hamunqa imapas hapinanpaq anka pawachkaq hinaraq,
chay runakunam rimanqaku mana entiendesqaykichik idiomata.
50 Manchakuypaq rikchayniyoq runakunam kanqaku.
Yuyaqkunapas mana respetaq nitaq wawakunapas mana llakipayakuq runakunam kanqaku.
51 Wakchayanaykichikkamam paykuna mikukunqaku animalnikichikkunata chaynataq kawsaynikichikkunatapas.
Manañam puchupusunkichikchu trigota,
vinota,
aceiteta nitaq vacakunapa hinaspa ovejakunapa uñankunatapas chaynapim qamkunaqa wañunkichikña.
52 —Llapallan llaqtaykichikkunapa muyuriqninpim campamentonkuta sayachinqaku.
Harkachisqa alto-alto amparakunaykichik murallakunatam tuñichinqaku.
Yupaychasqanchik Tayta Diospa qosunaykichik allpapi llapallan llaqtaykichikkunapimá muyurusunkichik.
53 Llaqtaykichikkunata enemigoykichik muyuruptinmi yarqaymanta kankichik yupaychasqanchik Tayta Diospa qosusqaykichik churikichikkunatapas mikunaykichikkama.
54 Qamkunawan yachaq allinlla mikukuq hinaspa llampu sonqo runapas mikuchkaspam michakunqa wawqentapas,
kuyay warmintapas chaynataq wasinpi kaqraq churinkunatapas
55 chaynapi wañusqa churinpa aychan mikusqanta mana partiykarinanpaq.
Llapallan llaqtakunata enemigoykichikkuna muyuruptinqa manam imapas mikunaykichikpaq kanqachu,
paykunaqa llumpayllatañam ñakarichisunkichik.
56 Qamkunawan yachaq allinlla mikukuq hinaspa llampu sonqoyoq añañanka warmipas mikuchkaspam michakunqa kuyay qosantapas chaynataq wawankunatapas
57 chaynapi wachakusqan wawan mikusqantapas chaynataq kikinpa madren mikusqantapas mana partiykarinanpaq.
Tukuy chaykunatam pakasqallapi kikillan mikurunqa.
Llaqtaykichikkunata enemigoykichik muyuruptinqa manam imapas mikunaykichikpaq kanqachu.
Paykunaqa llumpayllatañam ñakarichisunkichik.
58 —Sichu kay libropi qellqasqa kay llapallan yachachikuykunata mana kasukuptikichikqa nitaq ancha reqsisqa manchakuypaq yupaychasqanchik Tayta Diostapas mana respetaptikichikqa
59 paymi qamkunaman chaynataq miraynikichikkunamanpas kachaykamunqa admirakuypaq manaña tukuy atiq hatun castigokunata hinaspa manchakuypaq mana hampiy atina onqoykunata.
60 Egipto nacionpi ancha manchakusqaykichik llapa castigokunatam qankunamanpas kachaykamusunkichik hinaptinmi chaykunawan ñakarinkichik.
61 Chaynataqmi kay yachachikuy libropi mana tarikuq onqoykunatapas chaynataq castigokunatapas Tayta Dios kachaykamusunkichik puchukachisunaykichikkama.
62 Chaynaqa Israelpa mirayninkuna,
cielopi lucerokuna hina achkallaña kachkaspapas aschallañam puchurunkichik yupaychasqanchik Tayta Diosta mana kasukusqaykichikrayku.
63 Tayta Diosmi kusikurqa tukuy imapi bendecisuspaykichik chaynataq mirachisuspaykichikpas,
chaynallataqmi kusikunqa castigasuspaykichikpas chaynataq wañuchisuspaykichikpas chaynapim qamkunaqa qarqosqa kankichik dueñochakunaykichikpaq yaykunaykichik allpamanta.
64 Hinaptinmi Tayta Dios cheqechisunkichik llapallan nacionkunaman kay pachapa cantonmanta huknin cantonkama.
Chaypim adorankichik qampapas nitaq abueloykikunapapas mana reqsisqan taytacha-mamachakunata,
chay dioskunaqariki kanqa kullumanta hinaspa rumimanta rurasqam.
65 Chay nacionkunapi kaspaykichikqa purisqallaykichikpi kaspam samaytapas mana tarinkichikchu.
Tayta Diosmi kawsachisunkichik mancharisqallataña,
weqe ñawiyoqllataña hinaspa llakisqallataña.
66 Vidaykichikpas wañuypa patanpi hinaña kaptinmi tutapas-punchawpas mancharisqalla kankichik.
Manataqmi yachakunkichikchu wañunaykichikta otaq kawsanaykichiktapas.
67 Ancha mancharisqallaña hinaspa desgraciallata qawaspaykichikmi sapa madrugaw ninkichik:
“Amalaya tutaykurunmanña” nispa.
Tutaykuruptinñataqmi ninkichik:
“Amalaya achikyarunmanña” nispa.
68 Tayta Diosmi nisurqankichik Egipto nacionman amaña kutinaykichikpaq ichaqa kikinmi buquekunapi kutichisunkichik hinaptinmi sirviente kanaykichikpaq enemigoykichikkunaman munachikunkichik ichaqa manam pipas rantisuqnikichik kanqachu.