Taytacha-mamachakuna ama adoranamanta
7
—Yupaychasqanchik Tayta Diosmi dueñochakunaykichik allpaman yaykuchisuspaykichik,
qayllaykichikmanta wischunqa qanchis nacionkunata,
qamkunamantapas aswan hatun chaynataq atiyniyoq nacionkunata,
kaykunam chay qarqonan nacionkunaqa:
Het casta runakuna,
Gerges casta runakuna,
Amor casta runakuna,
Canaan casta runakuna,
Ferez casta runakuna,
Hiv casta runakuna chaynataq Jebus casta runakuna.
2 Yupaychasqanchik Tayta Dios chay nacionkunata qoykusuptikichik paykunata venceruspaqa pasaypaqtam chinkarachinkichik,
amam paykunawanqa ima contratotapas rurankichikchu nitaqmi llakipayankichikchu.
3 Amam paykunataqa aylluchakunkichikchu.
Amam paykunapa churinkunawanpas churikichiktaqa casarachinkichikchu.
4 Yanqam paykunaqa churikichikta Tayta Diosmanta karuncharachispa,
taytacha-mamachakunataña adorachinmanku hinaptinqa Tayta Diosmi contraykichikpi piñakuspan qayllanmanta chaylla chinkarachisunkichikman.
5 Aswanqa paykunapa altarninkunatam tuñichinkichik,
adoranankupaq rumimanta rurasqanku pilarkunatapas pasaypaqtam pakipankichik.
Qorurunkichikmá Asera sutiyoq kullumanta mamachakunatapas hinaspam kañankichiktaq llapa taytachankutapas hinaspa mamachankutapas.
6 Qamkunaqa yupaychasqanchik Tayta Diospa sapaqchasqan runakunam kankichik.
Kay pachapi wakin runakunamantamá yupaychasqanchik Tayta Dios akllasurqankichik kikinpa runankunaña kanaykichikpaq.
Israelpa mirayninkunapa imam ruranankumanta
7 —Manam qamkunataqa wakin nacionkunamanta aswan achka kasqaykichikraykuchu Tayta Diosqa kuyasurqankichik hinaspa akllasurqankichik,
akllasurqankichikmá wakin nacionkunamanta aschachalla kachkaptikichikpas.
8 Tayta Diosmi qamkunata kuyaspa chaynataq abueloykichikman jurasqanta cumplispa,
Egipto nacionpi sirviente kasqaykichikmanta horqomusurqankichik hinaspam libramusurqankichik hatun atiyninwan Rey Faraonpa munaychakuyninmanta.
9 Reqsiychikyá yupaychasqanchik Tayta Diosqa cheqap Dios kasqanta.
Payqa kuyaqninkunawanqa chaynataq kamachikuyninkunapas kasukuqkunawanqa waranqantin miraykamapas kuyapayarikuspa contraton cumpliqmi.
10 Ichaqa pipas cheqniqninmanqa kikinpuni pagapuspam wañurachinqa,
chaypunillam cheqniqninkunamanqa kikinpuni pagapunqa.
11 Chaynaqa kasukuychikyá kunan kamachisqay kamachikuykunata,
decretokunata chaynataq reglamentokunatapas.
Kasukuqkunata Dios bendecisqanmanta
12 —Sichu kay uyarisqaykichik reglamentokunata kasukuspa ruraptikichikqa yupaychasqanchik Tayta Diosmi cumplinqa abuelonchikkunaman kuyapayaspan jurasqan contratonta.
13 Payqa kuyasunkichikmi,
bendecisunkichikmi hinaspam achkayachisunkichik.
Bendecisunkichikmi achka churi-wawakunawanpas,
mirachinqataqmi allpaykichikpa ruruntapas otaq trigoykichiktapas,
vinoykichiktapas,
aceitekichiktapas,
vacaykichikpa hinaspa ovejaykichikpa criankunatapas.
Chaynataqa ruranqa abuelonchikkunaman juraspa qonan allpapim.
14 Qamkunaqa llapallan nacionkunamantapas aswan bendecisqam kankichik.
Qamkuna ukupiqa qaripas,
warmipas chaynataq animalnikichikpas miraqmi kanqa.
15 Tayta Diosmi karunchachinqa qamkunamanta tukuy onqoykunata chaynataq rikusqaykichikpi hina Egipto nacionman kachamusqan onqoykunatapas.
Aswanqa llapallan cheqnisuqnikichik runakunatam chay onqoykunawan ñakarichinqa.
16 Qamkunam ichaqa wañuchinkichik yupaychasqanchik Tayta Diospa entregasusqaykichik llapallan runakunata.
Amamá paykunataqa llakipayankichikchu nitaqmi taytacha-mamachankutapas adorankichikchu,
yanqam qamkunapaq urmachisuqnikichik kanman.
17 —Ichapas qamkuna ninakuwaqchik:
“Kay nacionkunaqa ñoqanchikmantapas aswan achkam ¿imaynataqsi qarqoytaqa atichwanchik?”
nispa.
18 Aswanqa amamá paykunataqa manchakunkichikchu.
Yuyariychikyá Rey Faraonta chaynataq llapa Egipto runakunatapas yupaychasqanchik Tayta Diospa tukuy rurasqanta.
19 Yuyariychikyá hatun sasachakuykuna pasasqanchiktapas.
Egipto nacionmanta yupaychasqanchik Tayta Dios horqomuwaspanchikmi hatun atiyninwan hinaspa hatun castigowan milagrokunata rurarqa chaynataq admirakuypaq señalkunatapas.
Chaynatapunim payqa ruranqa manchakusqaykichik nacionkunatapas.
20 Puchuqkunamanwan pakakuqkunamanmi yupaychasqanchik Tayta Dios wayliskunata kacharimunqa anchata mancharichispa chinkachinankama.
21 Chaynaqa amayá katkatataychikchu paykunapa qayllanpiqa.
Qamkunawan kaq yupaychasqanchik Tayta Diosmi manchakuypaq hatu-hatun Diosqa.
22 Yupaychasqanchik Tayta Diosqa chulla-chullallamantam chay nacionkunata qayllaykichikmanta qarqonqa.
Llapallan nacionkunata qonqaymanta qarqoruynikichikqa manam valenmanchu,
purun animalkunam contraykichikpi mirarunman.
23 Aswanqa yupaychasqanchik Tayta Diosmi chay nacionkunata vencechisunkichik hinaspam chinkachinankama pasaypaqta chaqwarunqa.
24 Paymi reyninkunatapas entregasunkichik paykunapi munaychakunaykichikpaq.
Wañuchispaykichikmi sutinkutapas chinkachinkichik kay pachapi manaña pipas yuyanankama.
Manam mayqanninkupas qamkunawan peleaytaqa atinqachu chinkachinaykichikkama.
25 Taytacha-mamachankutam kañankichik,
ichaqa amam munapayankichikchu chay taytacha-mamachanku qarachasqanku qori-qollqetaqa,
yanqam urmachisunkichikman,
chaykunaqa millakuypaqmi yupaychasqanchik Tayta Diospa qayllanpiqa.
26 Chaynaqa amam wasikichikman apankichikchu imapas millakuypaq kaqkunataqa,
yanqam qamkunapas chinkachisqa kawaqchik.
Chay millakuypaq kaqkunaqa chinkachisqa kanankupaqmi churasqa kachkan,
chayraykum chaykunataqa millakuypaqta hinaña qawankichik.