Hatun kamachikuymanta
6
—Kaykunam chay kamachikuykuna,
decretokuna chaynataq reglamentokuna,
qamkunaman yachachinaypaq yupaychasqanchik Señor Diospa kamachiwasqankuna,
chaykunataqa cumplinkichik dueñochakunaykichik allpaman yaykuspaykichikmi.
2 Chaynata ruraspamá yupaychasqanchik Tayta Diosta respetankichik hinaspam kasukunkichik kawsanaykichik punchawkama.
Kasukunqakutaqmá churikichikkunapas chaynataq willkaykichikkunapas.
Kasukunkichikmá qamkunaman qosqay decretokunatapas chaynataq kamachikuykunatapas chaynapi unay watakuna kawsakunaykichikpaq.
3 Chaynaqa Israelpa mirayninkuna,
kasukuspayá cumpliychik hinaptinqa alli-allin kaspaykichikmi achkallaña mirayniyoq kankichik tukuy imapapas kasqan allpapi.
Chay allpataqa abuelonchikkunapa yupaychasqan Tayta Diosmi prometewarqanchik.
4 —Israel casta runakuna,
uyariychikyá:
¡Yupaychasqanchik Tayta Diosqa chullallam!
5 —Yupaychasqanchik Tayta Diostam kuyanki tukuy sonqoykiwan,
tukuy vidaykiwan hinaspa tukuy kallpaykiwan.
6 —Kay kamachisqay palabrakunaqa sonqoykipim kanqa.
7 Churikikunamanmi sapa kutilla yachachinki wasipi kaspa,
ñanpi purispa,
puñuq yaykuspa chaynataq hatarispaykipas.
8 Kay kamachikuykunataqa señalta hinam qellqasqata watakunki brazoykipi chaynataq urkuykipipas.
9 Qellqankitaqmi wasikipa punkunkunapa marconkunapipas chaynataq zaguan punkukunapipas.
Israelpa mirayninkunatam Moises kamachin kasukunankupaq
10 Abuelonchik Abrahanman,
Isaacman hinaspa Jacobman prometesqan allpamanmi yupaychasqanchik Tayta Dios yaykuchisunkichik.
Chay allpaqa kachkan hatun llaqtayoqkunam,
chay llaqtakunataqa manam qamkunachu hatarichirqankichik.
11 Chay allpapiqa wasikunapas tukuy allin kaqkunapa huntasqanmi kachkan,
chaykunataqa manam qamkunachu huntachirqankichik.
Chaypiqa kachkantaqmi toqosqa pozokunapas,
chaykunataqa manam qamkunachu toqorqankichik,
chay allpapiqa kachkantaqmi mana rurasqaykichik uvas huertakunapas,
aceituna sachakunapas,
chaykunatamá saksanaykichikkama mikunkichik.
12 Chaynaqa amamá yupaychasqanchik Tayta Diostaqa qonqarunkichikchu,
paymi horqomuwarqanchik Egipto nacionpi sirviente kachkaptinchik.
13 Yupaychasqanchik Tayta Diosllata respetaspayá adoraychik,
imatapas juraspaykichikqa paypa sutillanpiyá juraychik.
14 Muyuriqnikichik nacionkunapi runakunapa adorasqanku sapaq dioskunataqa amam qatinkichikchu.
15 Ñoqanchikwan kaq yupaychasqanchik Tayta Diosqa paylla kuyanata munaqmi,
payqa contraykichikpi piñakuspanmi kay pachamanta pasaypaqta chinkarachisunkichikman.
16 —Masah sutiyoq lawpi pruebaman churasqaykichikta hinaqa amam pruebaman churankichikchu yupaychasqanchik Tayta Diostaqa.
17 Kasukuychiktaqyá yupaychasqanchik Tayta Diospa kamachisqankunataqa chaynataq paypa kamachikuyninkunatawan decretonkunatapas.
18 Tayta Diospa qayllanpiyá ruraychik imam kaqta chaynataq agradaqninkunata chaynapi allin kanaykichikpaq hinaspa abuelonchikkunaman Tayta Diospa jurasqan sumaq allpaman yaykuspa dueñochakunaykichikpaq,
19 chaynapitaq prometewasqanchikpi hina enemigoykichikkunatapas qayllaykichikmanta Tayta Dios qarqonanpaq.
20 —Sichu hamuq punchawkunapi miraynikichik tapusunkichikman:
“¿Imapaqtaq yupaychasqanchik Tayta Dios kamachisurqankichik kay kamachikuykunata,
decretokunata hinaspa reglamentokunataqa?”
nispa.
21 Hinaptinqa qamkunam ninkichik:
“Ñoqaykum Egipto nacionpi Rey Faraonpa sirvientenkuna karqaniku hinaptinmi Tayta Dios horqomuwarqaku hatun atiyninwan.
22 Ñoqaykum rikurqaniku Egipto nacionpi Faraonpa chaynataq castankunapa contranpi Tayta Diospa hatun hinaspa mancharikuypaq milagrokuna rurasqanta,
rikurqanikutaqmi admirakuypaq kaq rurasqankunatapas.
23 Ñoqaykutañataqmi horqomuwarqaku abuelonchikkunaman jurasqan allpaman qamkunatawan kuskata yaykuchiwananchikpaq.
24 Yupaychasqanchik Tayta Diosqa kamachikurqataqmi llapallan kay decretonkunata cumplinanchikpaq hinaspa payta respetananchikpaq chaynapi sapa punchaw allinlla kananchikpaq hinaspa kunan punchaw hina kawsachiwananchikpaq.
25 Chaynaqa kamachiwasqanchikman hina yupaychasqanchik Tayta Diospa qayllanpi tukuy kay kamachiwasqanchikkunata kasukuspaqa allintam rurachkanchik” nispa.