Tayta Diosta ama qonqanankumanta
8
—Kunan kamachisqay kamachikuykunatayá kasukuychik chaynapi kawsaspaykichik achka runakuna kanaykichikpaq hinaspa abuelonchikkunaman Tayta Diospa jurasqan allpaman yaykuspa dueñochakunaykichikpaq.
2 Yuyariychik tukuy chunniq ñankunapi tawa chunka wata purimusqanchikta.
Yupaychasqanchik Tayta Diosmi chaynataqa purichimuwarqachik humillachisunaykichikpaq chaynapi pruebasuspaykichik piensasqaykichik yachananpaq chaynataq kamachikuyninkunatapas kasukunaykichikta otaq mana kasukunaykichiktapas yachananpaq.
3 Ñakarichispa yarqaymanta kachiwaspanchikpas “maná” sutiyoq mikuytam mikuchiwarqanchik,
mikuchiwarqanchikqa abuelonchikkunapapas nitaq ñoqanchikpapas mana reqsisqanchik mikuytam,
chaynapim ñoqanchikqa yacharqanchik:
runaqa kawsanqa manam mikuyllawanchu aswanqa Tayta Diospa llapa rimasqankunawanmi.
4 Chay tawa chunka watapiqa manam pachanchikpas tukurqachu nitaqmi chakinchikpas punkirqachu.
5 Cuentatayá qokuychik:
Yupaychasqanchik Tayta Diosmi corregisurqankichik churinta taytan corregichkaq hina.
6 Yupaychasqanchik Tayta Diospa kamachikuyninkunata kasukuspaykichikyá payta respetaychik hinaspataq munasqanman hina kawsaychik.
7 Yupaychasqanchik Tayta Diosmi yaykuchisunkichik allin allpaman,
mayukunapa kasqan allpaman,
qechwakunapipas chaynataq orqokunapipas pukyuyoq hinaspa qochayoq allpaman.
8 Chay allpaqa trigopa,
cebadapa,
uvaspa,
higospa,
granadapa,
aceituna sachapa hinaspa mielpapas kasqan allpam.
9 Chay allpapiqa manam usunkichikchu mikuymantaqa nitaq imamantapas,
rumikunamantam horqonkichik fierrota,
orqokunamantañataqmi horqonkichik cobreta.
10 Saksanaykichikkama mikuspaykichikqa yupaychasqanchik Tayta Diostamá alabankichik chay allin allpa qosusqaykichikmanta.
11 —Yupaychasqanchik Tayta Diostaqa amamá qonqarunkichikchu.
Kasukuychikyá kunan kamachisqay kamachikuyninkunatapas,
reglamentonkunatapas chaynataq decretonkunatapas.
12 Saksanaykichikkama mikuspaykichikqa chaynataq hatarichisqaykichik sumaq wasikunapi yachaspaykichikqa
13 chaynataq vacaykichikkunapas,
ovejaykichikkunapas miraruptinqa,
qori-qollqekichikpas achkayaruptinqa chaynataq tukuy imaykichikkunapas achkayaruptinqa
14 amamá hatun tukuqqa karunkichikchu.
Chayna kaspaqa yupaychasqanchik Tayta Diostaqa amamá qonqarunkichikchu,
payqariki Egipto nacionpi sirviente kasqaykichikmantam horqomusurqankichik.
15 Paymi mana yakupa kasqan manchakuypaq hatun chunniqninta pusamuwarqanchik.
Pusamuwarqanchiktaqmi kachukuq culebrakunapa kasqan chaynataq atoq-atoqkunapa kasqan lawninkunatapas.
Paytaqmi qaqa rumimanta yakutapas toqyachimuspan tomachiwarqanchik.
16 Chunniqpimá mikuchiwarqanchik “maná” sutiyoq mikuyta,
abuelonchikkunapa mana reqsisqanku mikuyta.
Chaykunatam rurarqa humillachisunaykichikpaq hinaspa pruebaman churasunaykichikpaq chaynapi chay pruebakuna tukusqa kaptin allinnikichikpaqña kananpaq.
17 —Yanqañataq sonqoykichikpi niwaqchik:
“Kay llapa kapuqninchiktaqa kallpanchikwanmi armakurqanchik” nispa.
18 Aswanqa yupaychasqanchik Tayta Diostam yuyarinkichik.
Paymi kallpanchasurqankichik kapuqnikichikta armakunaykichikpaq chaynapi abuelonchikkunaman jurasqan contratonta qamkunawan kunan hina cumplinanpaq.
19 —Sichu yupaychasqanchik Tayta Diosta qonqaruspaykichik mana reqsisqaykichik dioskunata qonqorakuspa adoraptikichikqa ñoqam kunan contraykichikpi nikichik,
cheqaptapunipas chinkachisqa kanaykichikmanta.
20 Imaynam qamkunapa qayllaykichikmanta Tayta Dios chinkachinqa nacionkunata,
chaynam qamkunapas chinkachisqa kankichik yupaychasqanchik Tayta Diospa palabran mana kasukusqaykichikrayku.