Israelpa mirayninkunapaq Diospa kuyapayakuyninmanta
9
—Israel casta runakuna,
kaytayá uyariychik.
Jordan mayuta chimpanaykichikpaqmi tiempo chayaramunña,
qamkunam qarqonkichik qamkunamantapas aswan atiyniyoq hinaspa aswan achka runayoq nacionkunata,
dueñochakunkichiktaqmi alto-alto murallasqa hatun llaqtakunatapas.
2 Yachasqaykichikpi hinapas chaykunapi yachaq runakunaqa Anakpa mirayninkuna hina hatunkaray runakunam,
uyarirqankichiktaqmi:
“¿Pitaqsi peleanman Anakpa mirayninkunawanqa?”
nispa nisqankutapas.
3 —Kunanyá yachaychik yupaychasqanchik Tayta Dios ñawpaqnikichik risqanta.
Payqa ratachkaq nina hina rispanmi chay nacionniyoq runakunata wañuchispan humillachinqa qayllaykichikpi.
Qamkunamá qarqoruspa chaylla chinkarachinkichik Tayta Diospa nisqanpi hina.
4 Yupaychasqanchik Tayta Dios qayllaykichikmanta paykunata qarqoruptinqa,
amam sonqoykichikpi ninkichikchu:
“Allin runakuna kasqanchikraykum Tayta Diosqa qoykuwanchik kay allpata dueñochakunanchikpaq” nispa.
Sichu Tayta Dios paykunata qayllaykichikmanta qarqoruspaqa mana allinkuna rurasqankuraykum qarqorunqa.
5 Manam allin ruraq runakuna kasqaykichikraykuchu nitaq allin sonqoyoq kasqaykichikraykuchu paykunapa allpanmanqa dueñochakunaykichikpaq yaykunkichik.
Aswanqa chay runakunataqa yupaychasqanchik Tayta Diosmi qarqonqa mana allinkuna rurasqankurayku chaynataq abuelonchik Abrahanman,
Isaacman hinaspa Jacobman jurasqantapas cumplinanrayku.
6 Manamá allin ruraq runakuna kasqaykichikraykuchu yupaychasqanchik Tayta Diosqa qosunkichik chay allpataqa dueñochakunaykichikpaq.
Qamkunaqa rumi sonqo runakunam kankichik.
Israel castakuna Horeb Orqopi mana kasukusqankumanta
7 —Amam haykapipas qonqankichikchu yupaychasqanchik Tayta Diosta chunniqpi piñachisqaykichikta.
Egipto nacionmanta lloqsimusqaykichik punchawmantapunim kayman chayamunaykichikkama Tayta Diosta mana kasurqankichikchu.
8 Horeb Orqo lawpim piñachirqankichik Tayta Diosta,
chayraykum qamkunapa contraykichikpi piñakururqa chinkachisunaykichikpaq.
9 Ñoqam rirqani orqota tabla rumikuna chaskiq.
Rirqanimá qamkunawan Tayta Dios contrato rurasqanmanta tabla rumikuna chaskiq.
Chay orqopim kamurqani tawa chunka punchaw hinaspa tawa chunka tutan mana mikuspa nitaq yakutapas tomaspa.
10 Hinaptinmi Tayta Dios qowarqa iskay tabla rumikunata,
chaykunapim karqa kikinpa qellqasqan palabrakuna,
chay palabrakunaqa karqa huñunakusqanchik punchawpi rupachkaq orqopa chawpinmanta nisusqaykichik palabrakunam.
11 Chay tawa chunka punchawwan tawa chunka tuta pasaruptinmi Tayta Dios qowarqa contrato rurasqan chay iskay tabla rumikunata.
12 Hinaspam niwarqa:
“Chaylla kaymanta kutiriy,
Egipto nacionmanta horqomusqayki runakunam huchallikurunku,
manapas unaypim kamachisqaykunata mana cumplispanku fundisqa taytachata rurakurunku” nispa.
13 —Tayta Diosqa niwarqataqmi:
“Kunanmi qawani kay runakunaqa ancha rumi sonqo kasqankuta.
14 Dejaykuway wañurachispay sutinkutapas kay pachamanta chinkarachinaypaq.
Qampa miraynikimantañam paykunamantapas aswan atiyniyoqta rurasaq hinaspa achkallataña mirachisaq” nispa.
15 —Rupachkaq orqomanta uraykamuspaymi chay iskay tabla contrato rumikunata apamurqani.
16 Ichaqa yupaychasqanchik Tayta Diospa contranpi huchallikusqaykichiktam qawarqani.
Qamkunamá Tayta Diospa kamachisqankunata manapas unaypi saqeruspa malta toroman rikchakuq fundisqa taytacha-mamachataña rurakurusqankichik.
17 Chaymi apamusqay chay iskay tabla rumikunata chamqaruspay pakirurqani qamkunapa qayllaykichikpi.
18 Chaymi qonqorakuykurqani Tayta Diospa qayllanpi.
Hinaspam ñawpaq kutipi rimasqayman hina tawa chunka punchaw hinaspa tawa chunka tutan mana mikurqanichu nitaq yakutapas tomarqanichu.
Chaynatam rurarqani Tayta Diospa contranpi huchallikuspa piñachisqaykichikrayku.
19 Qamkunapa contraykichikpi anchata rabiaruspan wañuchisunaykichikpaq kaptinmi mancharikurqani,
chaywanpas Tayta Diosqa huktawanmi mañakusqayta uyariykuwarqa.
20 Aaronpa contranpipas Tayta Dios anchata piñakuspanmi wañurachiyta munarqa,
ichaqa paypaqpas mañakurqanim.
21 Huchallikunaykichikpaq rurasqaykichik malta toro taytachatapas kañaruspaymi kutarurqani polvoyanankama hinaspam orqomanta uraykamuq mayuman talliykurqani.
22 —Tayta Diostaqa piñachirqankichiktaqmi Tabera lawpipas,
Masah lawpipas hinaspa Quibrot-hataava lawpipas.
23 Cades-barnea llaqtamanta rispaykichik dueñochakunaykichikpaq qosusqaykichik allpaman yaykunaykichikpaq Tayta Dios kachasuptikichikpas kamachisqantam mana kasukurqankichikchu.
Manam paypi confiakurqankichikchu nitaqmi uyariytapas munarqankichikchu.
24 Qamkunaqa reqsisqay punchawmantapunim Tayta Dios mana kasukuq runakuna kankichik.
25 Wañuchisunaykichikpaq Tayta Dios rimasqanraykum paypa qayllanpi qonqorakuykurqani tawa chunka punchaw hinaspa tawa chunka tutan.
26 Ruegakuspaymi nirqani:
“Señor Dioslláy,
kikikipa runaykikuna kasqankuraykuyá paykunataqa amapuni chinkarachiychu.
Paykunataqa hatun atiynikiwanmi libramurqanki,
Egipto nacionmantapas hatun atiynikiwantaqmi horqomurqanki.
27 Amayá qonqaruychu serviqniki Abrahamtaqa,
Isaactaqa hinaspa Jacobtaqa.
Amayá kaqpaqpas hapiychu kay runakunapa rumi sonqo kasqankutaqa nitaq mana allin rurasqankutapas nitaq huchallikusqankutapas.
28 Yanqañataqmi horqomuwasqaykiku nacionpi kaqkuna ninmanku:
‘Tayta Diosqa manam atirqachu prometesqan allpaman yaykuchiyta.
Cheqnispanmi paykunata horqorurqa chunniqpi wañurachinanpaq’ nispa.
29 Paykunaqa kanku kikikipa runaykikunam,
paykunataqa hatu-hatun atiynikiwanmi horqomurqanki.”