Yapamanta Tayta Dios contraton rurasqanmanta
10
—Chaymantam Tayta Dios niwarqa:
“Iskay tabla rumikunatayá labramuy puntapi kaqkunaman rikchakuqta,
ruramuytaqyá tablamanta baultapas hinaspam orqoman hamunki ñoqapa kasqayman.
2 Chay pakisqayki punta tabla rumikunapi qellqasqay palabrakunatam qellqasaq chay rumikunapipas hinaptinmi chay rumikunataqa churanki baulman” nispa.
3 —Rurarqanimá baulta acacia tablamanta hinaspam labrarqanitaq iskay tabla rumikunatapas puntapi kaqkunaman rikchakuqta.
Chaymantam rirqani orqota iskaynin tabla rumikunata aparikuspay.
4 Hinaptinmi chay rumikunapi Tayta Dios qellqarqa chunkantin kamachikuyninkunata imaynam puntata qellqasqanman hina chaynataq huñunakusqanchik punchawpi rupachkaq orqomanta rimamusqanman hina.
Qoykamuwaptinñataqmi
5 orqomanta uraykamuspay chay tabla rumikunata churarqani rurasqay baulman Tayta Diospa kamachiwasqanpi hina.
Chaypim kachkan kunankama.
6 Jacaanpa mirayninkunapa pozonkunamantam Israelpa mirayninkuna pasarqaku Mosera lawkama.
Chaypi Aaron wañukuptinmi pamparurqaku.
Hinaptinmi churin Eleazarña taytanpa rantinpi sacerdote karqa.
7 Mosera lawmantam rirqaku Gudgoda lawman,
Gudgoda lawmantañataqmi rirqaku Jotbata lawman,
chay allpapiqa kachkanmi yakukunapas.
8 Chay tiempopim Tayta Dios akllarqa Leviy aylluta chaynapi paykunaña contraton baulta apanankupaq chaynataq payta servispa paypa sutinpi bendicioninta mañakunankupaq.
Kay libro qellqasqa kanankamapas hina chaynallatam rurachkanku.
9 Chayraykum Leviy casta runakunapaqa wakin ayllukunapa hinaqa mana kanchu herencia chakrankupas.
Paykunapa herencianqa kikin Tayta Diosmi yupaychasqanku Tayta Diospa nisqanpi hina.
10 —Ñoqaqa orqopimá kamurqani puntapi kamusqayta hina tawa chunka punchaw hinaspa tawa chunka tutan.
Chaypipas Tayta Diosqa uyariykuwaspanmi manaña wañuchisurqankichikchu.
11 Aswanqa paymi niwarqa:
“Alistakamuyá runakunata pusanaykipaq,
chaynapi rispaykichik abueloykichikkunaman jurasqay allpata dueñochakamunaykichikpaq” nispa.
Imam Tayta Diospa munasqanmanta
12 —Israel casta runakuna ¿imatataq Tayta Diosqa qamkunamanta munan?
Payqa munan payta respetaspaykichik paypa tukuy munasqanman hina kawsanaykichiktam.
Chaynataqmi munan tukuy sonqoykichikwan tukuy vidaykichikwan payta kuyaspa adoranaykichikta.
13 Munantaqmi kunan kamachisqay kamachikuyninkunata hinaspa decretonkunata kasukunaykichiktapas chaynapi alli-allinña kanaykichikpaq.
14 Amayá qonqaruychikchu cielokunaqa chaynataq cielokunapa hawanpi tukuy ima kaqpas chaynataq kay pachapa hinaspa tukuy ima chaypi kaqkunapas yupaychasqanchik Tayta Diosllapa kasqanta.
15 Chaywanpas Tayta Diosqa abuelonchikkunata kuyaspam akllarqa,
chaymantam kunan qawasqaykichikpi hinapas paykunapa mirayninkunata akllasurqankichik,
wakin nacionkunatam ichaqa mana akllarqachu.
16 —Cuerpoykichikpi señalakuchkaq hinayá sonqoykichikta Tayta Diospaq chuyanchaychik,
amañayá rumi sonqoqa kaychikchu.
17 Yupaychasqanchik Tayta Diosqa sapallan Diosmi,
sapallan Señormi.
Payqa hatun munayniyoq,
tukuy atiyniyoq chaynataq respetana Diosmi.
Payqa manam pimanpas sayapakunchu nitaqmi pimanpas sayapakunanpaqqa regalokunatapas chaskikuykunchu.
18 Payqa allin arreglotam ruraykapun mana tayta-mamayoqkunapaqpas chaynataq viudakunapaqpas.
Payqa forasterokunatapas kuyaspanmi mikuykachin chaynataq pachaykachin.
19 Qamkunaqa kuyaychikyá forasterokunata,
qamkunapas Egipto nacionpim forastero karqankichik.
20 —Yupaychasqanchik Tayta Diosta respetaspayá payllata adoraychik,
payllata qatiychik chaynataq paypa sutillanpi juraychik.
21 Payllatam qamkunaqa alabanaykichik,
payllataqmi Diosnikichik kaspan qamkunarayku hatun manchakuypaq kaqkunata rurarqa,
chaykunataqa rurarqa qamkuna qawachkaptikichikmi.
22 Abuelonchikkuna Egipto nacionman yaykuspankuqa qanchis chunka runakunallam karqaku ichaqa yupaychasqanchik Tayta Diosmi kunankama mirarachisunkichik cielopi lucerokunata hinaña.