Tayta Diosqa ancha hatun kasqanmanta
11
—Yupaychasqanchik Tayta Diosta kuyaspaykichikyá tukuy tiempopi kasukuychik encargasusqaykichikta,
decretonkunata,
reglamentonkunata hinaspa kamachisqankunata.
2 Yachankichikmi yupaychasqanchik Tayta Diospa corregisusqaykichiktaqa,
chaykunataqa manam yachanchu churikichikkunaqa nitaqmi rikurqakuchu.
Paykunaqa manamá yacharqakuchu Tayta Diospa hatun kaynintaqa nitaq hatun atiyninwan hinaspa hatun castigowan rurasqantapas.
3 Manataqmi paykunaqa qawarqakuchu Egipto nacionpi Rey Faraonpa contranpi chaynataq allpanpa contranpi milagrokuna rurasqankunatapas.
4 Nitaq Egipto nacionpi tropankunapa,
caballonkunapa hinaspa carretankunapa contranpi rurasqantapas.
Chaykunatam Puka Lamar Qochapi pamparurqa,
chaynataqa rurarqa ñoqanchikta qatimuwachkaptinchikmi,
chaynapimá paykunataqa Tayta Dios wiñaypaq chinkarachirqa.
5 Manataqmi churikichikkunaqa qawarqakuchu kay sitioman chayamunaykichikkama chunniqpi tukuy ima Diospa rurasqankunataqa.
6 Qamkunapa churikichikkunaqa manataqmi yachankuchu Ruben ayllumanta kaq Eliabpa churinkunata imam pasarusqanta,
chay churinkunaqa karqa Datanwan Abiranmi.
Paykunatam Israel casta runakunapa chawpinpi allpa kicharikuykuspan millpururqa familiantinta,
ganadontinta,
tukuy imankunatawan kuskata.
7 Qamkunam ichaqa rikurqankichik Tayta Diospa tukuy chay hatun rurasqankunata.
Canaan allpapi bendecisqa kanankumanta
8 —Kasukuychikyá kunan willasqay llapallan kamachikuykunata chaynapi kallpanchakuspa allpaman yaykunaykichikpaq,
dueñochakunaykichikpaq
9 hinaspa chay allpapiqa unay watakuna kawsanaykichikpaq.
Chay allpataqa abuelonchikkunaman hinaspa paykunapa mirayninman qonanpaqmi Tayta Dios jurarqa,
chay allpaqariki tukuy imapapas kasqan allpam.
10 Dueñochakunaykichikpaq yaykunaykichik allpaqa manam lloqsimusqaykichik Egipto nacionpi allpa hinachu.
Chay Egipto nacionpiqa yuyu huertakunapi hinam muhuta tarpuspaykichik chakikichikwan parqorqankichik.
11 Chay dueñochakunaykichik allpam ichaqa orqokunapa-qechwakunapa kasqan allpa,
chay allpaqa parapapas chayanan allpam.
12 Yupaychasqanchik Tayta Diospa nanachikusqan allpam chay allpaqa,
chay allpataqa watapa qallarisqanmanta tukunankamam qawachkan.
13 —Sichu kasukunkichik kunan punchawpi qosqay kamachikuykunata chaynataq yupaychasqanchik Tayta Diosta kuyaspaykichik tukuy sonqoykichikwan hinaspa tukuy vidaykichikwan adoraptikichikqa,
14 paymi tarpuy paratapas chaynataq poqoy paratapas tiempollanpi allpaykichikman parachimunqa chaynapi tarpusqaykichikkunata cosechanaykichikpaq,
kapusunkichiktaqmi kawsaykunapas,
vinopas hinaspa aceitepas.
15 Wiñachinqataqmi pastokunatapas animalnikichikkunapaq hinaptinmi mikunkichik saksanaykichikkama.
16 Chaynaqa cuidakuychikyá amapuni engañachikunaykichikpaq.
Amam Tayta Diosmanta rakikunkichikchu mana reqsisqaykichik taytacha-mamachakunata adoranaykichikpaq nitaqmi chaykunapa qayllanpiqa qonqorakunkichikchu.
17 Chaynata ruraptikichikqa Tayta Diosmi contraykichikpi piñakuspan manaña parachimunmanchu hinaptinqa allpaykichikmantapas manañam cosechawaqchikchu,
chayllataqmi wañuruwaqchik Tayta Diospa qosunaykichik allin allpapipas.
18 —Chaynaqa kay kamachikuykunatayá sonqoykichikpi churaychik hinaspa yuyaymanaychik,
kay kamachikuykunataqa señalta hinam qellqasqata watakunkichik brazoykichikpi chaynataq urkuykichikpipas.
19 Churikichikkunamanmi sapa kutilla yachachinkichik kay palabrakunata wasipi kaspaykichik,
ñanpi purispaykichik,
puñuq yaykuspaykichik chaynataq hatarispaykichikpas.
20 Qellqankichiktaqmi wasikichikpa punkunpa marconkunapipas chaynataq zaguan punkuykichikkunapipas
21 chaynapi abueloykichikkunaman qonanpaq Tayta Diospa jurasqan allpapi qamkunapas chaynataq miraynichikkunapas mana chinkaruq cielokuna hina otaq kay pacha hina unay watakunata kawsanaykichikpaq.
22 —Sichu kasukunkichik llapallan willasqay kamachikuykunata chaynataq Tayta Diostapas kuyaspa paypa munasqanman hina kawsaptikichikqa hinaspa payta qatiptikichikqa
23 paypas wischunqam qayllaykichikmanta llapallan nacionkunata hinaptinmi qamkunapas dueñochakunkichik aswan achka hinaspa aswan atiyniyoq runakunapa nacionninta.
24 Llapallan sarusqaykichik allpam qamkunapaq kanqa.
Chay allpaykichikpa linderonmi kanqa surlawpi chunniqmanta qallarispa Libano Orqokunakama chaynataq Eufrates Mayumanta qallarispa intipa seqaykunan lawpi lamar qochakama.
25 Manam pipas qamkunawan peleaytaqa atinqachu,
prometewasqanchikman hinam maylawman riptikichikpas chaypi kaq runakunata yupaychasqanchik Tayta Dios mancharichispan katkatatachinqa.
26 —Kunan punchawyá akllakuychik bendecisqa kanaykichikpaq otaq ñakasqa kanaykichikpaqpas.
27 Kunan willasqay yupaychasqanchik Tayta Diospa kamachikuyninkunata kasukuspaqa bendecisqam kankichik.
28 Mana reqsisqaykichik sapaq dioskunata qatinaykichikpaq yupaychasqanchik Tayta Diospa kamachikuyninkunata mana kasukuspaqa chaynataq kunan kamachisqayman hina mana kawsaspaqa ñakasqam kankichik.
29 —Yupaychasqanchik Tayta Dios dueñochakunaykichik allpaman yaykuchisuptikichikqa Diospa bendecisqan kanaykichikmantam Gerezim Orqopi rimankichik,
ñakasqa kanaykichikmantañataqmi rimankichik Ebal Orqopi.
30 Chay orqokunaqa kachkan Jordan Mayupa waklaw chimpan otaq intipa seqaykunan lawman rinapim,
chayqariki kachkan Canaan casta runakunapa allpan Gilgal llaqtapa chimpanpim otaq encina sachakunapa kasqan More sutiyoq lawpim.
31 Ñam Jordan Mayutaqa chimpankichikña chaynapi yupaychasqanchik Tayta Diospa qosusqaykichik allpata dueñochakunaykichikpaq.
Chay allpata dueñochakuruspaykichikqa chaynataq chaypiña yachaspaqa
32 kunan willasqay decretokunatawan reglamentokunatam kasukunkichik.