Diospa santuarionqa chullalla kasqanmanta
12
—Abuelonchikpa yupaychasqan Tayta Diosmi qosunkichik dueñochakunaykichikpaq allpata,
chaynaqa kaykunamá kawsanaykichikkama chay kasukunaykichik decretokunaqa chaynataq reglamentokunaqa.
2 Vencenaykichik runakunapa taytacha-mamachanku adorana llapallan capillankutam tuñichinkichik,
tuñichinkichiktaqmá orqokunapa puntankunapi kaqkunatapas,
moqokunapi kaqkunatapas chaynataq rapisapa sachakunapa llantuyninpi kaqkunatapas.
3 Altarninkunatapas tuñichispam pakipankichiktaq adorananku rumimanta pilarkunatapas,
kañankichiktaqmi kullumanta Asera sutiyoq mamachankutapas.
Chaynaqa taytacha-mamachankutapas pasaypaqtamá pakipankichik hinaspam chinkachinkichiktaq taytacha-mamachankupa sutintapas chay sitiokunamanta.
4 —Yupaychasqanchik Tayta Diostaqa amam paykuna hinachu adorankichik.
5 Aswanqa llapallan ayllukunapa allpanmantam yupaychasqanchik Tayta Dios akllanqa sitiota,
chaypim sutinta reqsichispa yachanqa,
chaynaqa chayman rispamá adoramunkichik.
6 Chaypim paypaq animalkunata wañuchispa lliwta kañankichik,
chaynallatamá rurankichik wakin kañanapaq ofrendakunatapas.
Chaymanmi apankichik diezmoykichikkunata chaynataq prometekusqaykichik ofrendakunatawan voluntad ofrendaykichikkunatapas.
Apankichiktaqmi vacaykichikpa chaynataq ovejaykichikpa punta criankunatapas.
7 Hinaspam yupaychasqanchik Tayta Diospa qayllanpi chay sitiopi mikunkichik,
qamkunaqa familiaykichikwan kuskamá kusikunkichik llamkasqaykichikpa rurun kasqanrayku,
chaykunawanmi yupaychasqanchik Tayta Dios bendecisurqankichik.
8 —Chay allpapiqa amañam kaypi rurasqanchikkunata hinaqa rurankichikñachu.
Kaypiqa sapakamam rurakuchkanchik allinpaq rikchakapuwasqanchikta.
9 Samanaykichikpaq yupaychasqanchik Tayta Diospa herencia qosunaykichik allpamanqa cheqaptapunipas manaraqmi chayachkankichikchu.
10 Aswanqa Jordan Mayuta chimparuspa yupaychasqanchik Tayta Diospa qosunaykichik allpapiña kaspaykichikqa chaynataq muyuriqnikichikpi enemigoykichikkunamanta paypa librasqan seguroña kaspaykichikqa
11 yupaychasqanchik Tayta Diospa sutin reqsisqa kananpaqmi kikinpa akllasqan sitiopi ofrecenkichik imaynam kamachisqayman hina,
chaynaqa ofrecenkichikmá lliw kañana animalkunata,
wakin kañanapaq ofrendakunata,
diezmoykichikkunata,
ofrendaykichikkunata chaynataq payman prometesqaykichik allinnin kaqkunatapas.
12 Hinaspam yupaychasqanchik Tayta Diospa qayllanpi fiestata rurankichik churikichikkunawan,
sirvientekichikkunawan,
llaqtaykichikpi yachaq Leviy casta runakunapiwan,
Leviy casta runakunaqa manam qamkuna hinachu chakrakunata chaskinqaku.
13 —Amamá munasqaykichik sitiopichu Tayta Diospaqqa animalkunata wañuchipunkichik.
14 Chaytaqa rurankichik huk kaqnin aylluykichikpa allpanmanta Tayta Diospa akllasqan sitiollapim,
chaypimá kañankichik lliw kañana ofrendakunata hinaspam rurankichiktaq tukuy kamachisqaykunatapas.
15 —Chaywanpas llaqtaykichikkunapiqa yupaychasqanchik Tayta Diospa bendecisusqaykichikman hinam munaspaykichikqa animalnikichikta nakaspa mikunkichik.
Chay aychataqa llapallaykichikmi mikunkichik.
Mikunqakum ñoqaman asuykamuwananpaq hina kaqkunapas hinaspa mana chaypaq hina kaqkunapas.
Luwichupa otaq tarukapa aychanta mikuchkaq hinam mikunkichik.
16 Yawarnintam ichaqa ama mikunkichikchu,
yakuta hinam pampaman tallirunkichik.
17 —Llaqtaykichikkunapiqa amam mikunkichikchu kawsaykunamanta diezmoykichiktaqa nitaq vinomanta,
aceitemanta diezmoykichiktapas nitaq vacaykichikpa otaq ovejaykichikpa punta kaq criantapas.
Amataqmi mikunkichikchu Tayta Diosman prometesqaykichik ofrendakunatapas chaynataq voluntad ofrendaykichiktapas.
18 Chaykunataqa yupaychasqanchik Tayta Diospa akllasqan sitiollapim mikunkichik.
Paypa qayllanpim fiestata rurankichik llamkasqaykichikpa rurunmanta,
kusikunkichikmá churikichikkunawan,
sirvientekichikkunawan chaynataq llaqtaykichikpi yachaq Leviy casta runakunawanpas.
19 Chay allpapi kawsanaykichikkamaqa Leviy casta runakunata yanapaspamá ama qonqarunkichikchu.
20 —Prometesusqaykichikman hina yupaychasqanchik Tayta Dios allpaykichikta masyarachiptinqa,
aychanayasusqaykichik punchawpiyá aychata mikukuychik.
21 Sutin reqsisqa kananpaq yupaychasqanchik Tayta Diospa akllasqan sitio qamkunapa yachasqaykichikmanta karupiraq kaptinqa Tayta Diospa qosusqaykichik vacaykichitayá otaq ovejaykichiktayá llaqtaykichikpi nakakuspa kamachisqayman hina munasqaykichikta mikukuychik.
22 Luwichupa otaq tarukapa aychan mikuchkaq hinamá llapaykichik mikunkichik,
mikunqakum ñoqaman asuykamuwanankupaq hina kaqkunapas hinaspa mana chaypaq hina kaqkunapas.
23 Yawarnintam ichaqa imaraykupas ama mikunkichikchu.
Yawarqa animalpa vidanmi,
chaynaqa amam mikunkichikchu animalpa vidantaqa aychantawan kuskataqa.
24 Ama mikuspamá yakuta hinalla pampaman tallirunkichik.
25 Yawarta mana mikuspaqa allinmi kankichik,
allintaqmi kanqa churikichikkunapas.
Mana mikuspaqa Tayta Diospa qayllanpim paypa munasqanta rurachkankichik.
26 Aswanqa Diospaq sapaqchasqaykichik ofrendakunatawan prometesqaykichik ofrendakunataqa Tayta Diospa akllasqan sitiopim presentankichik.
27 Yupaychasqanchik Tayta Diosman animalkunata ofrecespaqa altarninpim animalkunata wañuchispa kañapunkichik.
Chay ofrecesqaykichik animalkunapa yawarnintaqa altarninpa waqtanmanmi tallinkichik,
aychantam ichaqa mikunkichik.
28 —Chaynaqa tukuy kay kamachisqaykunatayá kasukuychik,
chaynapi qamkunapas chaynataq miraynikichikkunapas wiñaypaq allin kanaykichikpaq,
chaynaqa kankichik yupaychasqanchik Tayta Diospa qayllanpi allinta ruraspam chaynataq munasqanman hina kawsaspam.
Taytacha-mamachakunataqa ama adoranankumanta
29 —Dueñochakunaykichik nacionpi runakunata yupaychasqanchik Tayta Dios chinkarachiptinqa chaynataq paykunapa allpankunapi yachaspaykichikqa,
30 cuidakunkichikmi paykunapa urmachisqan kanaykichikmanta,
chay runakuna chinkachisqaña karuptinqa diosninkumantam ama tapunkichu:
“¿Imaynatataq kay nacioniyoq runakunaqa diosninkuta adoranku?
Chaynatayá ñoqapas adorasaq” nispa.
31 Paykunapa adorasqanman hinaqa amamá yupaychasqanchik Tayta Diostaqa adorankichikchu.
Chay nacionniyoq runakunaqa taytacha-mamachankuta adoranankupaqmi Tayta Diospa millakusqanta hinaspa cheqnisqanta ruranku,
paykunaqa churinkutapas chay taytachankumanmi kañapunkuraq.
32 —Chaynaqa tukuy kamachisqaykunatamá kasukunkichik mana yapaspa nitaq menosyachispa.