13
—Sichum qamkuna ukupi rikurirunman Diosmanta willakuq tukuq otaq revelacionninpi qawaq runa hinaspa nisunkichikman milagrota rurananmanta otaq admirakuypaq kaqta rurananmanta
2 hinaptin milagro chaynataq admirakuypaq kaq cumplikuruptinñataq nisunkichikman:
“Rispayá mana reqsisqanchik dioskunata adoramusunchik” nispa
3 hinaptinqa amam payta kasunkichikchu.
Chaywanqa yupaychasqanchik Tayta Diosmi pruebayta munasunkichik cheqapchus tukuy sonqoykichikwan,
tukuy vidaykichikwan pay kuyasqaykichikta yachananpaq.
4 Yupaychasqanchik Tayta Diosta qatispa payllata respetaychik.
Kamachisqankunata cumpliychik,
nisqankunata kasukuspa payllata adoraychik,
payllata qatispayá kawsaychik.
5 Diosmanta willakuq tukuq otaq revelacionninpi qawaq runaqa wañuchisqam kanqa,
chay runaqa consejasurqankichik Egipto nacionpi sirviente kachkaptikichik librasuqnikichik Tayta Diosmanta rakisunaykichikpaqmi.
Yupaychasqanchik Tayta Diospa kamachisusqaykichikman hina manaña kawsanaykichikpaqmi chay runaqa rakisunaykichikpaq hikutasurqankichik.
Chaynapimá chay mana allintaqa qamkuna ukumanta chinkachinkichik.
6-8 —Sichu wawqekipas otaq qari churikipas otaq warmi churikipas otaq kuyay warmikipas otaq kuyay amistadnikipas pakasqallapi hikutasunkiman mana reqsisqayki otaq abuelonchikkunapapas mana reqsisqan taytacha-mamachakunata adoranaykipaq hinaptinqa amamá kasunkichu nitaq uyarinkichu.
Amamá uyarinkichu chay taytacha-mamachakunaqa muyuriqnikipi kaq runakunapa diosnin kaptinpas otaq maylaw runakunapa diosnin kaptinpas.
Amam chay hikutasuqniki runataqa llakipayankichu nitaqmi wañuchinankumantapas harkakunkichu nitaq pakankipaschu.
9 Aswanqa chay runataqa wañuchinkipunim,
qanmi puntata wañuchiyta qallarinki,
chaymantañam wakin runakunapas chaynata ruranqaku.
10 Rumiwanmi chamqaparunki wañunankama Egipto nacionpi sirviente kasqaykimanta libramusuqniki yupaychasqanchik Tayta Diosmanta rakiy munasusqaykirayku.
11 Chaynapim Israelpa llapallan castankuna uyarispa manchakunqaku yapatawanqa amaña huchallikunankupaq.
12-13 —Sichum uyariruwaq yachanaykipaq yupaychasqanchik Tayta Diospa qosusqayki mayqen llaqtapipas huk kaqnin pantachikuq runapa kayna nisqanta:
“Hakuchik sapaq dioskunataña adoramusunchik,
chay dioskunataqa manam reqsinkichikchu” nispa.
14 Hinaptinqa qamkunam sumaqta averiguankichik.
Sichu rimasqankuman hina chay millakuypaq hucha rurasqa kaptinqa
15 chay llaqtapi runakunatam llapa animalnintinta guerrawan wañuchinkichik hinaspam chay llaqtapi tukuy imatapas chinkachinkichik pasaypaqta.
16 Chay llaqtapa llapa kapuqninta plazapa chawpinpi huñuruspaykichikmi kañaykunkichik llaqtantinta,
kañasqa ofrendata hinamá yupaychasqanchik Tayta Diospaq kañaykunkichik.
Chaynaqa chay llaqtam wiñaypaq purmachisqa kanqa,
manañam yapamanta hatarichisqañachu kanqa.
17 —Chay pasaypaq chinkachisqa kananpaq kaqkunamantaqa amam imatapas hapikuykunkichikchu,
chaynapim Tayta Diosqa qamkunawan mana piñakunqachu aswanqa qamkunata kuyapayaykususpaykichikmi achka-achkamanraq mirachisunkichik imaynam abuelonchikkunaman jurasqanman hina.
18 Chaynataqa ruranqa kunan kamachisqayman hina yupaychasqanchik Tayta Diosta kasukuspa kamachisqankunatapas cumpliptikichikmi chaynataq paypa munasqanman hina kawsaptikichikmi.