14
—Qamkunaqa yupaychasqanchik Tayta Diospa churinkunam kankichik.
Pipas wañuruptinqa amam cuerpoykichikta kuchukunkichikchu nitaqmi umaykichiktapas kachiy-kachiytaqa rutuchikunkichikchu.
2 Qamkunaqa yupaychasqanchik Tayta Diospaq sapaqchasqa runakunam kankichik.
Kay pachapi kaq wakin runakunamantam akllasurqankichik paypa runankunaña kanaykichikpaq.
Mikuna chaynataq mana mikuna animalkunamanta
3 —Amam mikunkichikchu millakuypaq animalkunataqa.
4 Mikunaykichikpaq animalkunaqa kaykunam kanqa:
bueyeskuna,
ovejakuna,
cabrakuna,
5 tarukakuna,
luwichukuna,
monte cabrakuna,
monte ovejakuna,
corzo sutiyoq animalkuna chaynataq tukuy rikchaq antilope sutiyoq animalkunapas.
6 Mikunkichikmá pallqa atakayoq hinaspa kutipaq llapa animalkunata.
7 Ichaqa amam mikunkichikchu camellota,
liebreta nitaq purun qowitapas,
chay animalkunaqa kutipaq kaspapas manam pallqa atakayoqchu.
8 —Amataqmi mikunkichikchu kuchitapas,
pallqa atakayoq kaspapas manam kutipanchu,
chaytaqa millakuypaqmi hapinkichik.
Chay animalkunapa aychantaqa amamá mikunkichikchu nitaqmi wañuruptinpas hapinkichikchu.
9 —Yakupi kaq animalkunataqa mikuwaqchikmi ichaqa chay animalkunaqa kanan llika raprayoqmi hinaspa escamayoqmi,
10 mana chayna kaptinmi ichaqa ama mikunkichikchu,
chayna animalkunataqa millakuypaqñam hapinkichik.
11 —Raprayoq limpio animalkunataqa mikuwaqchikmi.
12-18 Raprayoq animalkunamantaqa millakuypaq kasqanraykum kaykunata ama mikunkichikchu:
tukuy rikchaq aguilakunata,
tukuy rikchaq ankakunata,
aqchikunata,
tukuy rikchaq wamankunata,
tukuy rikchaq cuervokunata,
avestruzkunata,
chuseqkunata,
qewllakunata,
tukukunata,
cormorankunata,
ibiskunata,
cisnekunata,
pelicanokunata,
ullachkukunata,
cigueñakunata,
tukuy rikchaq garzakunata,
condorkunata,
abubillakunata hinaspa masukunata.
19 —Pawaspa pampanta puriq urukunaqa kanqa millakuypaq animalkunam,
chaykunataqa amamá mikunkichikchu.
20 Raprayoq mikuna animalkunatam ichaqa mikunkichik.
21 —Kikillanmanta wañuruq animaltaqa amapunim mikunkichikchu.
Chaykunataqa mikunankupaqmá qoykunkichik llaqtaykichikpi yachaq forasterokunaman otaqmi puriqkunaman rantikurunkichik.
Qamkunaqa kankichik yupaychasqanchik Tayta Diospaq sapaqchakusqa runakunañam.
—Amam cabra uñataqa mamanpa lechenpiqa yanunkichikchu.
Diezmokuna qonapaq yachachikuykunamanta
22 —Mana tipiytam watan-watan rakinkichik diezmota cosechasqaykichik kawsaykunamanta.
23 Trigomanta,
vinomanta hinaspa aceitemanta rakisqaykichik diezmotawan vacaykichikmanta hinaspa ovejaykichikmanta horqosqaykichik punta criankunatam mikunkichik yupaychasqanchik Tayta Diospa qayllanpi,
chaykunataqa mikunkichik paypa sutin reqsisqa kananpaq sitiopim payta respetay yachanaykichikpaq.
24 Sutin reqsisqa kananpaq Tayta Diospa akllasqan sitiomanraq chay bendecisusqaykichikmanta diezmokunata karupiraq kasqanrayku mana apayta atispaqa
25 rantikuruspaykichikmi qollqenpiña apankichik chay sitioman.
26 Chay sitiopiñam rantinkichik tanteasqaykichikman hina bueyeskunata,
ovejakunata,
vinota,
poqosqa aqata otaq ima mikunaykichiktapas hinaspam chaypi mikunkichik yupaychasqanchik Tayta Diospa qayllanpi.
Chaynataqmi fiestata rurankichik familiaykichikkunawan kuska.
27 —Amam saqerunkichikchu llaqtaykichikpi yachaq Leviy casta runakunataqa.
Paykunaqa manam chaskinqakuchu herencia allpataqa qamkuna hinaqa.
28 —Sapa kimsa watapim horqonkichik cosechasqaykichikmanta llapallan diezmoykichikta hinaspam waqaychankichik llaqtaykichikpi.
29 Chaynapim llaqtaykichikpi yachaq mana herencia allpayoq Leviy casta runakuna saksanankukama mikunqaku,
mikunqakutaqmi qamkunawan yachaq forasterokunapas,
mana tayta-mamayoqkunapas chaynataq viudakunapas.
Hinaptinqa yupaychasqanchik Tayta Diosmi tukuy rurasqaykichikpi bendecisunkichik.