Manukuqkuna pampachana watamanta
15
—Sapa qanchis watam manukuqnikichikta pampachankichik.
2 Chay manukuqkunawanqa kaynatam rurankichik:
Runamasikichikman imatapas manuykuspaqa pampachaykuspaykichikmi amaña mañankichikchu.
Israelpa mirayninkuna kaptinpas otaq mayqan runamasikichik kaptinpas amañam mañapayankichikchu pagasunaykichikpaq.
Chay watapim Tayta Diospa sutinpi willakusqa kanqa:
“Kunan wataqa Manukuqkuna Pampachana Watam” nispa.
3 Forasterokunamantaqa mañawaqchikmi prestasqaykichikta.
Castamasikichikmantam ichaqa amaña mañankichikchu prestasqaykichikta.
4 Chaynapiqa manañam wakchakunapas qamkuna ukupiqa kanqachu,
aswanqa Tayta Diosmi bendecisunkichik dueñochakunaykichikpaq qosunaykichik allpapi,
5 chaynataqa bendecisunkichik yupaychasqanchik Tayta Diosta uyariptikichikmi chaynataq kunan kamachisqankunata kasukuspaykichik cumpliptikichikmi.
6 Yupaychasqanchik Tayta Diosmi bendecisunkichik prometesusqaykichikman hina chaymi prestankichik achka nacionkunamanpas.
Qamkunam ichaqa mana prestakunkichikchu.
Achka nacionkunapim munaychakunkichik.
Qamkunapim ichaqa mana pipas munaychakunqachu.
7 —Yupaychasqanchik Tayta Diospa qosunaykichik allpapi,
sichu huk kaqnin llaqtapi kanqa qamkuna castamanta wakchayaruq runa hinaptinqa sonqoykichikta ama rumiyaykachispam chay runata yanapaykunkichik.
8 Llakipayaspaykichikmi prestaykunkichik necesitasqanman hina.
9 Sonqoykichikta rumiyaykachispaqa amam piensankichikchu:
“Manukuqkuna Pampachana qanchis kaq watam hichpamuchkanña” nispaqa.
Yanqañataq chay wakchayaq castamasikichikta mana allin ñawikichikwan qawaspa imallawanpas mana yanapaykuwaqchikchu,
chayna kaptinqa contraykichikpi Tayta Diosta mañakuptinmi chay rurasqaykichikmanta huchallikuwaqchik.
10 Ama maqlla kaspaykichikmi chaylla yanapaykunkichik.
Chayna rurasqaykichikmantam yupaychasqanchik Tayta Dios astawan bendecisunkichik tukuy rurasqaykichikpi.
11 Wakchakunaqa manam faltanqachu kay pachapiqa.
Chaymi ñoqa kamachikichik,
castamasikichikmanta wakchayaspa yarqaymanta kaqkunawan llakipayakuq kanaykichikpaq.
Sirvientekunapa favorninpi yachachikuymanta
12 —Hebreo castamasikichikmanta qaripas otaq warmipas servisunaykichikpaq kikillanmanta rantikurusuptikichikqa,
soqta watallam servichikunkichik.
Qanchis kaq watamanqa librem lloqsikunqa.
13 Libreta kachaykuspaykichikqa amataqmi mana imayoqtaqa kachaykunkichikchu.
14 Aswanqa qoykunkichikmi animalnikichikmanta,
cosechasqaykichikmanta chaynataq vinoykichikmantapas.
Rakiykunkichikmá yupaychasqanchik Tayta Diospa tukuy qosusqaykichikmanta.
15 Yuyarinkichikmi Egipto nacionpi qamkunapas sirviente kachkaptikichik yupaychasqanchik Tayta Dios libramususqaykichikta.
Chayraykum chaynata kunan kamachikichik.
16 —Ichaqa qamtapas chaynataq familiaykitapas kuyasqanrayku chaynataq qamkunawan allin kasqanrayku chay sirvientekichik mana lloqsiyta munaptinqa
17 punkuykiman asuykachispaykim aleznawan rinrinta uchkurunki hinaptinmi wañunankama servisunki.
Chaynallatam rurankichik sirvientaykichikwanpas.
18 Sirvientekichikkuna libre kachaykuytaqa amam llakikunkichikchu.
Llamkasqanmanta partellanta pagon chaskiq peon hinam paykunaqa soqta watapuni servisurqankichik.
Chaynapim yupaychasqanchik Tayta Diospas tukuy rurasqaykichikpi bendecisunkichik.
Animalkunapa punta kaq orqonkunata Tayta Diospaq sapaqchanankumanta
19 —Vacaykikunamantawan ovejaykikunamantam punta kaq orqo uñankunata yupaychasqanchik Tayta Diospaq sapaqchanki.
—Vacaykikunapa punta wawan torochataqa amam llamkachinkichu nitaqmi ovejaykikunapa punta wawan carnerochapa millwantapas rutunkichu.
20 Yupaychasqanchik Tayta Diospa qayllanpim chay animalkunata mikunki sapa wata,
familiaykikunawan kuskam mikunkichik paypa akllasqan sitiopi.
21 Ichaqa sichu sapaqchasqayki animal ñawsapas,
weqropas otaq imaynapas kaptinqa,
amam wañuchinkichu yupaychasqanchik Tayta Diosman ofrecenapaqqa.
22 Aswanqa yachasqayki llaqtapim mikunki chayna animaltaqa.
Mikunqakutaqmi ñoqaman asuykamuwanankupaq hina kaqkunapas chaynataq mana chaypaq hina kaqkunapas,
tarukatapas luwichutapas mikuchkaq hinam mikunkichik.
23 Chay animalkunapa yawarnintam ichaqa ama mikunkichu.
Yakuta hinam pampaman tallirunki.