Sapa wata rurananku fiestakunamanta
16
—Abib sutiyoq killa chayamuptinqa yupaychasqanchik Tayta Diospaqmi Pascua Fiestata rurankichikpuni.
Paymi huk tuta chay killapi Egipto nacionmanta horqomusurqankichik.
2 —Chay fiestapim vacakunatawan ovejakunata wañuchispa yupaychasqanchik Tayta Diosman ofrecenkichik.
Chaytaqa rurankichik paypa sutin reqsisqa kananpaq akllasqan sitiopim.
3 —Wañuchipusqaykichik animalpa aychantaqa mana qonchuyoq tantatawanmi mikunkichik.
Qanchisnintin punchawmi mikunkichik chayna mana qonchuyoq tantataqa,
ñakarisqaykichikmanta yuyarinaykichikpaqmi mikunkichik chayna tantata.
Apurawllamanmi Egipto nacionmanta lloqsimurqankichik.
Chaymi kawsanaykichik punchawkama Egiptomanta lloqsimusqaykichik punchawta yuyarinkichik.
4 Chay qanchisnintin punchawmi enteron nacionnikichikpi qonchu ama kanqachu.
Chaynataqmi punta kaq punchawpa tarden lawpi wañuchipusqaykichik animalpa aychanqa ama puchunqachu paqarinnintin punchawkamaqa.
5 Yupaychasqanchik Tayta Diospa qosusqaykichik llaqtapiqa amam ofrecenkichikchu Pascuapi wañuchipunaykichik animaltaqa,
6 ofrecenkichikqa yupaychasqanchik Tayta Diospa sutin reqsisqa kananpaq akllasqan sitiollapim.
Chay animaltaqa Egipto nacionmanta lloqsimusqaykichik punchawpi hinam inti seqaykuytaña ofrecenkichik.
7 Ofrecesqaykichik aychataqa kankasqatam mikunkichik yupaychasqanchik Tayta Diospa akllasqan sitiopi.
Hinaspam paqarinnintin punchawta kutikunkichik wasikichikman.
8 Soqta punchawmi mikunkichik mana qonchuyoq tantata.
Qanchis kaq punchawpim ichaqa hatun huñunakuy kanqa yupaychasqanchik Tayta Diospaq.
Chay punchawpiqa amam imapipas llamkankichikchu.
9 —Trigo rutuy qallarisqaykichik punchawmanta qanchis semana pasaruptinmi
10 yupaychasqanchik Tayta Diospaq rurankichik Semanakuna sutiyoq hatun fiestata.
Chay fiestapim voluntad ofrendaykichikta qonkichik yupaychasqanchik Tayta Diosman tukuy imapi bendecisusqaykichikmanta.
11 Yupaychasqanchik Tayta Diospa qayllanpimá chay fiestata rurankichik churikichikkunapiwan,
sirvientekichikkunapiwan,
sirvientaykichikkunapiwan,
llaqtaykichikpi yachaq Leviy casta runakunapiwan,
forasterokunapiwan,
mana tayta-mamayoqkunapiwan chaynataq viudakunapiwan.
Chaytaqa rurankichik yupaychasqanchik Tayta Diospa sutin reqsisqa kananpaq akllasqan sitiopimá.
12 Qamkunapas Egipto nacionpi sirviente kasqaykichikta ama qonqaruspamá kasukunkichik kay decretokunata.
13 Trigo cosechaytawan uvas saruyta tukuspaykichikñam qanchis punchawnintin rurankichik chay Ramada Fiestataqa.
14 Chay fiestapim kusikunkichik churikichikkunawan,
sirvientekichikkunawan,
llaqtaykichikpi yachaq Leviy casta runakunawan,
forasterokunawan,
mana tayta-mamayoqkunawan chaynataq viudakunawanpas.
15 Chay fiestataqa yupaychasqanchik Tayta Diospaqmi rurankichik qanchis punchawpuni akllasqan sitiopi.
Paymi cosechaykichikpi chaynataq tukuy ruranaykichikpipas bendecisunkichik hinaptinmi cheqaptapunipas kusikunkichik.
16 —Sapa watapim kimsa kutita llapallan qarikuna rinqaku yupaychasqanchik Tayta Diospa qayllanman otaq paypa akllasqan sitioman.
Chaynatam ruranqaku Mana Qonchuyoq Tanta Fiestapi,
Semanakuna Fiestapi chaynataq Ramada Fiestapipas.
Amataqmi Tayta Diosmanqa pipas rinqachu mana imatapas apaspaqa.
17 Yupaychasqanchik Tayta Diospa bendecisqanman hinam sapakama ofrendankuta apanqaku.
Juezkuna allinta arreglanankumanta
18 —Yupaychasqanchik Tayta Diospa sapa aylluman qosunaykichik llaqtakunapim churankichik juezkunatawan autoridadkunata chaynapi runakunapa quejanta allinta arreglanankupaq.
19 Allin arreglo ruraytaqa amam qewirunkichikchu.
Amataqmi imaraykupas wakin runakunallamanqa sayapakunkichikchu.
Juez kaspapas amataqmi regalokunataqa chaskikuykunkichikchu.
Regalokunaqa yachayniyoqkunatapas ñawsayaykachinmi,
pantachintaqmi allin ruraqkunapa rimaynintapas.
20 Arreglotaqa rurankichik allin arregloman hinallam chaynapi mana wañuruspa yupaychasqanchik Tayta Diospa qosunaykichik allpata dueñochakunaykichikpaq.