2 —Sichum yupaychasqanchik Tayta Diospa qosusqaykichik huk kaqnin llaqtapi tariruwaqchik qaritapas otaq warmitapas Tayta Diospa mana munasqanman hina rurachkaqta chaynataq contratontapas mana respetaspa rurachkaqta

3 chaynataq tariruwaqchik taytacha-mamachakunataña qatispa adorachkaqta otaq chaykunapa ñawpaqninpi qonqorakuchkaqta chaynataq intita,

killata,

lucerokunatapas adorachkaqta,

chaykuna adoranataqa Tayta Diosqa manam kamachikurqachu.

4 Sichum chaykunata yacharuspaykichikqa sumaqtam averiguankichik.

Israel casta ukupi chay millakuypaq rurasqanku cheqap kaptinqa

5 chay ruraq runatam otaq warmitam pusankichik llaqtapa zaguanninpi autoridadkunaman hinaspam rumiwan choqaspa wañuchinkichik.

6 —Wañunanpaq sentenciaspaqa,

iskay otaq kimsa testigokunapa declarakusqanwanmi sentenciankichik.

Chullalla testigopa declarakusqanwanqa manam pipas wañunanpaq hinaqa sentenciasqa kanmanchu.

7 Chay testigokunam puntata chamqanqaku wañuchinankupaq.

Chaymantañam llapallan runakunapas chamqanqaku.

Chaynatam tukunkichik qamkunamanta tukuy mana allin ruraqkunata.

8 —Sichu llaqtaykichikpi kanqa wañuchinakuymanta,

pleitokunamanta,

maqanakuykunamanta otaq imamantapas sasa arreglo ruraykuna hinaptinqa yupaychasqanchik Tayta Diospa akllasqan sitiomanmi rinkichik.

9 Chaypim Leviy ayllu sacerdotekunaman chaynataq chay tiempopi juez kaqman asuntoykichikta willakunkichik hinaptinmi paykunaña nisunkichik imaynam arreglanaykichikmanta.

10 Chaynapim Tayta Diospa akllasqan sitiopi autoridad nisusqaykichikman hina rurankichik.

Kasuspaykichikmá paykunapa yachachisqanman hinalla rurankichik.

11 Chay autoridadkunapa yachachisqanta hinallam chaynataq sentenciasqanta hinallam qamkunaqa rurankichik.

Amam imayrikuqllatapas cambiankichikchu paykunapa nisqantaqa.

12 Ichaqa yupaychasqanchik Tayta Diospa qayllanpi servikuq sacerdoteta otaq jueztapas mana kasukuq orgulloso runataqa wañunanpaqmi sentenciankichik.

Chaynata ruraspaykichikmi Israelpa mirayninkunamanta chinkachinkichik tukuy mana allin ruraqkunata.

13 Hinaptinmi llapallan runakuna chayta uyarispanku manchakunqaku,

chaynapimá manaña paytukuqñachu kanqanku.

14 —Yupaychasqanchik Tayta Diospa qosunaykichik allpamanmi yaykunkichik chaypi runakunata venceruspa.

Chay allpapiña yachaspañataq niwaqchik:

“Muyuriqniykupi llapallan nacionkuna hinam gobiernawanankupaq ñoqaykupas munaniku reyniyoq kayta” nispa.

15 Hinaptinqa yupaychasqanchik Tayta Diospa akllasqallantam reynikichikpaq churankichik,

payqa kanqa castamasikichikmi.

Ichaqa amam churankichikchu forasterotaqa nitaq mana castaykichikmanta kaqtapas.

16 Ichaqa payqa amam achka caballokunata huñukunqachu.

Amataqmi Egipto nacionmanqa runakunatapas kachanqachu caballonkunata achkayachinapaq.

Tayta Diosmi nisurqankichik:

“Amam haykapipas kay ñannintaqa Egipto nacionman kutinkichikchu” nispa.

17 Amam achka warmiwanqa casarakunqachu chaynapi Tayta Diosmanta ama karunchakurunanpaq,

amataqmi achka qori-qollqetapas huñukunqachu.

18 —Gobiernayta reynikichik qallarispaqa,

Leviy ayllu sacerdotekunapa hatallisqan libromantam kay yachachikuykunata kikinpaq qellqachinqa.

19 Kikinpaq chay copiata hatallispanmi kawsanankama sapa punchaw leenqa,

chaynapi yupaychasqanchik Tayta Diosta respetananpaq chaynataq chay yachachikuykunata hinaspa decretokunatapas kasukunanpaq

20 chaynapi castamasinkunamantapas aswan valeqpaqraq mana piensananpaq chaynapitaq chay kamachikuykunamantapas mana karunchakunanpaq.

Chaynata ruraptinqa paypas chaynataq mirayninpas unay watatam Israel nacionpi gobiernanqa.