Leviy ayllu sacerdotekunamanta
18
—Leviy ayllumanta llapallan kaqkunaqa chaynataq chay castamanta sacerdotekunaqa manam chaskinqakuchu herencia allpata Israelpa mirayninkunamanta kaq wakin castakuna hinaqa.
Paykunaqa kawsanqa Tayta Diospaq kañapusqanku chaynataq payman qosqanku ofrendakunamantam.
2 Wakin castamasinkuna hina herenciata mana chaskiptinkupas Tayta Diosmi paykunapa herencianqa,
chaynatam kikin Tayta Dios nirqa.
3 —Runakunam sacerdotekunaman apamunqaku torokunata otaq carnerokunata chaynapi sacerdotekuna kañapunankupaq.
Chaynaqa chay kañasqankumantam sacerdotekunaman tocanqa:
animalpa brazon,
quijadan,
wiksan.
4 Paykunapa tocanciantaqmi kanqa trigopa punta rurunkunapas,
punta sarusqaykichik vinopas,
punta rurasqaykichik aceitepas chaynataq ovejaykichikmanta punta rutusqaykichik millwakunapas.
5 Llapallan wakin ayllukunamantam paykunatapas chaynataq mirayninkunatapas yupaychasqanchik Tayta Dios akllakurqa paytaña sapa punchaw servinankupaq.
6 —Israel nacionnikichikpi huk kaqnin llaqtapi yachaq Leviy ayllu runa Tayta Diospa akllasqan sitioman riyta munaspaqa,
7 chaypim servikunqa Tayta Diospa qayllanpi,
servikunqaqa chaypi servikuq Leviy ayllumasinkuna hinam.
8 Abuelonkunamanta herenciankuta chaskichkaspapas paykunaqa castamasinkuna hinam iguallata mikunqaku.
Taytacha-mamacha adoraqkunapa costumbrenkunata ama qatipakunankumanta
9 —Yupaychasqanchik Tayta Diospa qosunaykichik allpaman yaykuspaqa chay nacionkunapi runakunapa millakuypaq costumbrenkunataqa amam rurankichikchu.
10 Amam mayqannikichikpas mayqan diospaqpas churikichikta kañapunkichikchu.
Amam qamkuna ukupiqa kanqachu adivinaqkuna nitaq hamuq tiempomanta willakuq tukuqkunapas nitaq musyaqkunapas nitaq brujokunapas
11 nitaq layqakunapas nitaq adivinota tapukuqkunapas nitaq mana allin espiritu tapukuqkunapas nitaq espiritistakunapas.
12 Chaykuna ruraqtaqa Tayta Diosmi millakun.
Yupaychasqanchik Tayta Diosmi wischunqa qayllaykichikmanta chay millakuypaq costumbreyoq nacionpi runakunataqa.
13 Yupaychasqanchik Tayta Diospa munasqanman hinamá kawsankichik.
14 Chay dueñochakunaykichik allpapi yachaq runakunaqa hamuq tiempokunamanta willakuq tukuqkunatam kasukunku chaynataq adivinaqkunatapas.
Qamkunatam ichaqa yupaychasqanchik Tayta Dios mana dejasunkichikchu chaykunata ruranaykichikpaq.
Moises hina Diosmanta willakuq rikurimunanmanta
15 —Yupaychasqanchik Tayta Diosmi qamkunamanta rikurichimunqa ñoqa hina paymanta willakuqta hinaptinmi payta kasunkichik.
16 Cheqaptapunipas Horeb Orqopi huñunakuptinchikmi nirqankichik:
“Amañayá yapamantaqa uyarisaqkuñachu yupaychasqanchik Tayta Diospa voznintaqa.
Amañayá rikusaqkuñachu ninapa kay hatun rupariynintapas chaynapi mana wañurunaykupaq” nispa.
17 Hinaptinmi Tayta Diosñataq niwarqa:
“Allinmi chay rimasqankuqa,
18 Israel castamasinku ukumantam qam hina ñoqamanta willakuqta kachamusaq.
Hinaptinmi payña tukuy kamachisqayta paykunaman willanqa.
19 Ñoqapa sutiypi paypa rimasqanta mana kasukuqkunataqa ñoqam cuentata mañasaq.
20 Ichaqa pipas ñoqamanta willakuq tukuspa sutiypi rimaspan mana kamachisqayta imatapas rimaptinqa otaq sapaq taytacha-mamachakunapa sutinpi rimaptinqa,
wañunanpaqmi sentenciasqa kanqa” nispa.
21 Ichapas qamkuna piensawaqchik:
“Chaynaqa ¿imaynatataq yachaymanku chay runapa willakusqanqa Tayta Diospa palabran kasqanta otaq mana kasqantapas?”
nispa,
chaynaqa kaytam yuyankichik:
22 Sichu Tayta Diospa sutinpi chay willakuqpa rimasqan mana cumplikuptinqa sutillam mana Tayta Diospa palabranchu.
Chaynaqa chay willakuqqa kikillanmantam hatun tukuspa rimarqa.
Chaynaqa amamá paytaqa manchakunkichikchu.