Amparakunanku llaqtakunamanta
19
—Yupaychasqanchik Tayta Diosmi nacionkunata chinkachispan allpankuta dueñochakunaykichikpaq qosunkichik chaynapi llaqtankunapipas chaynataq wasinkunapipas yachanaykichikpaq.
2 Hinaptinqa yupaychasqanchik Tayta Diospa qosunaykichik allpapim akllankichik kimsa llaqtakunata
3 hinaspam chay llaqtakunaman riq ñankunatapas allichankichik.
Chaypaqmi chay allpaykichikta partinkichik kimsaman chaynapi runamasin wañurachiq runa mayqannin llaqtamanpas lluptikuspan amparakunanpaq.
4 Pipas runamasinta wañurachiq runam chay llaqtaman lluptikuspan vidanta libranqa,
ichaqa chayna librakunanpaqqa pruebananmi runamasintaqa qonqaymanta mana piensastin wañurachisqanta nitaq ñawpaqmantapas mana cheqninakusqanta.
5 Ichapas pipas runamasinwan rinman monteta yantaman hinaptinñataq hachawan waqtachkaptin cabonmanta hacha lloqsiruspan chay runata wañurachinman hinaptinqa wañurachiqmi ayqekunqa huk kaqnin llaqtaman chaynapim mana wañunqachu.
6 Ancha karupiraq chay llaqta kaptinqa yanqañataqmi wañuqpa ayllun chay wañuchiqta vengakunanpaq rabiallawanña qatispan wañurachinman.
Yanqam chaynata rurarunman chay wañurachiq runaqa inocente kachkaptinpas otaq mana cheqnichkaspan qonqaymanta wañurachiptinpas.
7 Chayraykum kamachikichik kimsa llaqtakunata akllanaykichikpaq.
8 Yupaychasqanchik Tayta Dios abuelonchikkunaman prometesqanpi hina allpaykichikta hatunyachispan lliw allpata qoykusuptikichikqa
9 chay kimsa llaqtakunamanmi yapankichik amparakuna kimsa llaqtakunatawan.
Yupaychasqanchik Tayta Diosmi hatunyachinqa allpaykichikta kunan willasqay kamachikuykunata kasukuptikichikqa hinaspa payta kuyaspa kamachisqanman hina sapa punchaw kawsaptikichikqa.
10 Chaynapim yupaychasqanchik Tayta Diospa qosunaykichik allpapi inocente runakunata mana wañuchinkichikchu chaynataqmi wañuqkunamantapas mana culpayoq kankichik.
11 —Ichaqa pipas runamasinta cheqnisqanrayku qatispan traicionmanta wañurachiptinqa hinaspa amparakunanku huk kaqnin llaqtaman ayqekuptinqa
12 chay wañuchiqpa llaqtanpi ancianokunam presocharachispanku entregaykunqaku wañuqpa ayllunman hinaptinmi wañunqa.
13 Chayna runataqa ama llakipayaspaykichikmi wañuchinkichikpuni chaynapim inocente runa mana wañuchisqachu kanqa Israel nacionpiqa.
Chaynata ruraptikichikqa Tayta Diosmi favorecesunkichik.
14 —Yupaychasqanchik Tayta Diospa qosunaykichik allpapi yachaspaqa amam suchuchinkichikchu runamasikichikpa allpanpa linderonkunata.
Chay linderokunaqa abueloykichikkunapa churasqanku hinallam kanqa.
Llulla rimaq testigokunapa contranpi yachachikuykunamanta
15 —Manam chulla testigollaqa acusanmanchu pitapas mana allin rurasqanmantaqa otaq ima huchallikusqanmantapas.
Runaqa culpasqa kanqa iskay otaq kimsa runakuna testigakuptillanmi.
16 —Dañayta munaspan mana allin ruraq runata hina pipas runamasinta yanqamanta acusaptinqa
17 chay iskaynin quejanakuqkunam asuykunqaku Tayta Diospa qayllanman.
Rinqakumá sacerdotekunapa qayllanman chaynataq chay tiempopi juezkunapa qayllanmanpas.
18 Hinaptinmi juezkuna suma-sumaqta chay testigokunata tapupayanqa.
Runamasinpa contranpi chay testigopa acusasqan llulla kaptinqa
19 chay runamasinpa contranpi mañakusqan castigowanmi castigasqa kanqa.
Chaynata ruraspam chinkachinkichik qamkunamanta mana allin ruraqta.
20 Chayta uyarispankum wakin runakunapas manchakunqaku hinaspataqmi manaña ruranqakuchu chay mana allinkunata.
21 Amam llakipayankichu chay huchallikuq runataqa.
Pitapas wañurachispaqa kikinpas wañuchisqam kanqa,
ñawinta horqoruptinqa paypatapas ñawintam horqorunqaku,
kirunta wichirachiptinqa paypatapas kiruntam wichirachinqaku,
makinta pakiruptinqa paypatapas makintam pakinqaku,
chakinta pakiruptinqa paypatapas chakintam pakinqaku.