2 —Israelpa mirayninkunamanyá niy Moisesman kamachisqayta hina amparakunanku llaqtakunata akllanankupaq.

3 Mana piensachkaspa qonqaymanta pipas runamasinta wañurachiq runaqa huk kaqnin llaqtaman lluptikuspanmi amparakunqa chaynapi wañuq runapa ayllun reclamaspa vengakunanmanta.

4 Chay wañurachiq runam chay huk kaqnin llaqtaman lluptispan llaqtapa zaguanninpa punkunpi sayanqa hinaspam willakunqa imam pasakusqanta chay llaqtapi ancianokunaman.

Chaymi paykuna uyarispanku chaskinqaku chay llaqtapi hinaspam qonqaku sitiota paykunawan yachananpaq.

5 Wañuqpa ayllun vengakunanpaq qatiptinpas chay wañuchiqtaqa manam qonqakuchu,

chaynataqa ruranqaku ñawpaqmanta mana cheqnichkaspan qonqaymanta wañurachisqanraykum.

6 Chay wañuchiq runaqa chay llaqtallapim kanqa huñunasqa runakunapa qayllanpi juzgasqa kanankama chaynataq chay tiempopi sacerdotekunapa jefen wañukunankama.

Chaymantañam runamasin wañurachiq runaqa kutinqa maymantam lluptimusqan llaqtaman chaynataq wasinmanpas —nispa.

7 Chaynapim Israel casta runakunaqa akllarqaku Galilea law Neftaliy ayllupa orqonpi kaq Cedes llaqtata,

akllarqakutaqmi Efrain ayllupa orqonpi kaq Siquem llaqtatapas chaynataq Juda ayllupa orqonpi kaq Quiriat-arba llaqtatapas,

chay llaqtapa huknin sutinmi karqa Hebron.

8 Akllarqakutaqmi Jerico llaqtapa chimpan Jordan Mayupa intipa qespimunan law Beser llaqtatapas.

Chay llaqtam karqa Ruben ayllupa allpan chunniq pampapi.

Akllarqakutaqmi Gad ayllupa allpanpi kaq Ramot llaqtatapas.

Chay llaqtaqa karqa Galaad lawpim.

Akllarqakutaqmi Golan llaqtatapas.

Chay llaqtaqa karqa Manases ayllupa allpan Basan lawpim.

9 Chay llaqtakunatamá akllarqaku Israelpa llapallan mirayninkunapaq chaynataq paykunawan yachaq forasterokunapaq.

Chay llaqtaqa karqa qonqaymanta runamasin wañurachiq runa lluptinanpaqmi chaynapi huñunasqa runakuna manaraq juzgachkaptinku wañuqpa ayllun vengakuspa payta mana wañurachinanpaq.