Kasukuq kanankupaq Moisespa consejasqanmanta
4
—Israel casta runakuna,
qamkunaqa kasukuychikyá yachachisqay decretokunata chaynataq reglamentokunatapas.
Kasukuspaykichikqa manam wañunkichikchu hinaspam yaykunkichik abuelonchikkunapa yupaychasqan Tayta Diospa qosunaykichik allpaman.
2 Kamachikuyniykunamanqa amam imatapas yapankichikchu nitaq menosyachinkichikchu.
Qamkunaqa kasunkichikmá yupaychasqanchik Tayta Diospa kamachikuyninkunataqa,
chaykunataqa ñoqam kamachikichik.
3 Qawarqankichikmi taytacha-mamacharayku yupaychasqanchik Tayta Diospa imam rurasqanta.
Rikurqankichikmá chay taytacha-mamacha llapa adoraqkunata qamkunamanta Tayta Dios chinkachisqantapas.
4 Yupaychasqanchik Tayta Diosta llapallan qatiqkunam ichaqa kawsachkankichikraq kunankama.
5 Ñoqam yachachirqaykichik yupaychasqanchik Tayta Diospa kamachiwasqan decretokunata chaynataq reglamentokunatapas.
Dueñochakunaykichik allpaman yaykuspaqa tukuy chaykunatamá cumplinkichik.
6 Chaynata kasukuspa ruraptikichikqa wakin nacionpi runakunam reqsisunkichik qamkunaqa yachaysapa chaynataq yuyaysapa runakuna kasqaykichikpaq.
Paykunapas kay decretokunata yachaspankum ninqaku:
“¡Cheqaptapunipas yachaysapa,
entendimientoyoq hatun nacionmi kay nacionqa” nispa.
7 ¿Mayqan hatun nacionpa diosninkunataq hichpallanpi kachkan ñoqanchikpa sapa kutilla qayarikunanchik yupaychasqanchik Tayta Dios hinaqa?
8 ¿Mayqan hatun nacionpataq kapun allin decretokunapas chaynataq allin reglamentokunapas qamkunaman kunan yachachisqaykuna hinaqa?
9 Amayá qonqaruychikchu imam rikumusqaykichikmantaqa,
kawsanaykichikkamaqa amamá sonqoykichikmantapas chinkarachinkichikchu,
chaykunataqa yachachinkichikmá churikichikkunamanpas chaynataq willkaykichikkunamanpas.
Horeb Orqopi Tayta Diospa imam rimarisqanmanta
10 —Yupaychasqanchik Tayta Diospa qayllanpi Horeb Orqopi huk punchaw kachkaptinchikmi Tayta Dios niwarqa:
“Huñumuy runakunata imam ninayta uyarinankupaq,
chaynapi kay pachapi kawsananku punchawkama respetaway yachanankupaq hinaspa churinkunamanpas yachachinankupaq” nispa.
11 Chaynapim qamkunaqa chay orqopa sikinman asuykamuspa chaypi sayarqankichik hinaptinmi chay orqomanta ratachkaq nina lloqsimuspan alto-altokamaraq chutarikuspan rakta puyumanraq tikrakururqa.
12 Hinaptinmi chay ninapa ukunmanta Tayta Dios rimapayasurqankichik.
Qamkunaqa uyarirqankichik rimasqallantam ichaqa manam ima rikchaytapas rikurqankichikchu.
13 Kikin Tayta Diosmi contratonta willasurqankichik.
Chay contratonqa karqa iskay tabla rumikunapi qellqasqa Chunkantin Kamachikuykunam.
Chaykunataqa kamachikurqa cumplinaykichikpaqmi.
14 Chay tiempopiqa Tayta Diosmi ñoqatapas kamachiwarqataq qamkunaman chay decretonkunata hinaspa reglamentonkunata yachachinaypaq chaynapi dueñochakunaykichik allpapi cumplinaykichikpaq.
Taytacha-mamachakunataqa ama adoranankumanta
15-16 —Horeb Orqopi rupachkaq nina ukumanta Tayta Dios rimapayamususqaykichik punchawpiqa manam ima rikchaytapas rikurqankichikchu.
Chaynaqa cuidakuychikyá huchaman urmaykunaykichikmanta chaynapi qarimanpas otaq warmimanpas rikchakuq imagenkunata ama ruranaykichikpaq.
17-18 Amataqmá rurankichikchu animalkunaman rikchakuqtapas nitaq alton pawaqkunaman rikchakuqtapas nitaq qasqonpa puriq animalkunaman rikchakuqtapas nitaq challwakunaman rikchakuqtapas.
19 Yanqañataq cielopi intita,
killata,
lucerokunata hinaspa cielopi tukuy kaqkunata qawaspaykichik adorawaqchik.
Tukuy chaykunataqa yupaychasqanchik Tayta Diosmi churarqa kay pachapi llapallan runakunapaq.
20 Qamkunatam ichaqa metal chulluchina hornomanta horqomuchkaq hina Tayta Dios horqomusurqankichik Egipto nacionmanta chaynapi kunan hina paypa runankunaña kanaykichikpaq.
21 Ichaqa qamkunaraykum Tayta Dios piñakururqa ñoqapa contraypi hinaspam jurarqa Jordan Mayutapas manaña chimpanaypaq hinaspa qosunaykichik allin allpamanpas manaña yaykunaypaq.
22 Kay allpapi wañukuspay Jordan Mayuta mana pasaptiypas qamkunaqa chimpankichikmi chay allin allpata dueñochakunaykichikpaq.
23 Cuidakuychikyá yupaychasqanchik Tayta Diospa qamkunawan contrato rurasqanta ama qonqarunaykichikpaq.
Yupaychasqanchik Tayta Diospa “amam” nisqan taytacha-mamachakunataqa amamá rurankichikchu.
24 Yupaychasqanchik Tayta Diosqa paylla kuyanata munaq Diosmi.
Tukuy imapas ruparuq ratachkaq nina hinam payqa.
25 —Churikichikpas chaynataq willkaykichikpas karuptinqa hinaspa qamkunapas chay allpapi machuyaruspaykichikqa yanqañataq tukuy imaman rikchakuq taytacha-mamachakunata ruraspa pierdekuruwaqchik hinaspa yupaychasqanchik Tayta Diospa contranpi huchallikuspa payta piñachiwaqchik,
26 hinaptinqa chayllam chinkachisqa kankichik chay Jordan Mayupa waklaw chimpanman dueñochakunaykichikpaq pasasqaykichik allpamanta.
Manam unaychu chaypiqa kankichik,
chinkachisqapunim karunkichik.
Ñoqam kunan churani testigopaq cielotawan kay pachata.
27 Tayta Diosmi cheqerachisunkichik huklaw nacionkunaman hinaptinmi chay nacionkunapi wakillaykichikña puchurunkichik.
28 Hinaspam chay nacionkunapi servinkichik runakunapa rurasqan taytacha-mamachakunata,
mana qawakuq,
mana uyariq,
mana mikuq,
mana muskiq,
kullumanta chaynataq rumimanta taytacha-mamachakunata.
29 Chaywanpas yupaychasqanchik Tayta Diosta tukuy sonqoykichikwan,
tukuy yuyaynikichikwan maskaspaykichikqa tarinkichikmi.
30 Tukuy chay ñakariykunapi kaspaykichik Tayta Diosman kutirikuspa payta kasukuptikichikqa
31 payqa llakipayakuq Dios kasqanraykum manapuni saqerusunkichikchu,
manataqmi chinkachisunkichikchu,
manataqmi Tayta Diosqa qonqarunqachu abuelonchikkunaman juramentowan contrato rurasqantaqa.
32 Ñawpa tiempopi
yachaq runakunatayá tapuychik,
runata kay pachapi
Diospa unanchasqanmantapuniyá
tapukachakuychik,
tukuy hinastinpiyá
tapukachakuychik:
“¿Yaqachum kayna hatu-hatun kaq pasakurqa,
yaqachum uyarirqankichik kaynataqa?”
33 —Ñoqanchik hinaqa ¿yaqachum pipas ratachkaq ninapa chawpinmanta Diosta uyarirqaku otaq uyarichkaspankupas mana wañururqakuchu?
34 Pruebakunata,
señalkunata,
milagrokunata hinaspa guerrakunata ruraspanmi wakin nacionkunamanta paypa runankunaña kananchikpaq pruebawaspanchik akllawarqanchik.
Yupaychasqanchik Tayta Diosmi Egipto nacionpi ñoqanchikpa qayllanchikpi chaynataq ñoqanchikrayku hatun atiyninwan hinaspa hatun castigowan mancharikuypaq kaqkunata rurarqa.
¿Yaqachum taytacha-mamachakuna chaykunata ruranman karqa?
35 Chaykunataqa qawachisurqankichik kikin Tayta Dioslla cheqap Dios kasqanta yachanaykichikpaqmi.
36 Yachachisunaykichikpaqmi cielomanta rimapayamusurqankichik,
kay pachapiñataqmi qawachisurqankichik rupachkaq ninata hinaptinmi uyarirqankichik palabrankunatapas chay ninapa ukunmanta.
37 Payqa abuelonchikkunata kuyasqanraykum akllarqa paykunapa mirayninkunata hinaspam horqomurqa Egipto nacionmanta ancha hatun atiyninwan.
38 Ñoqanchikmantapas aswan achka runayoq nacionkunata chaynataq aswan ancha atiyniyoq nacionkunatam qayllanchikmanta qarqorqa,
imaynam kunan sucedekusqanpi hinam paykunapa allpanman qamkuna yaykuchkankichik dueñochakunaykichikpaq.
39 —Chaynaqa sumaqtamá yuyankichik Tayta Diosqa hanaq pachapi hinaspa kay pachapipas sapallan Dios kasqanta.
40 Kunan punchawpi kamachisqay Diospa decretonkunatawan kamachikuyninkunatayá kasukuychik hinaptinqa qamkunapas chaynataq miraynikichikpas allintam kawsakunkichik,
yupaychasqanchik Tayta Diospa wiñaypaq qosunaykichik allpapim unay watakuna yachankichik.
Amparakuna llaqtakunamanta
41 Moisesmi akllarqa kimsa llaqtakunata,
chay llaqtakunataqa akllarqa Jordan Mayupa waklawnin intipa qespimunan lawpim.
42 Chay llaqtataqa akllarqa pipas runamasinta ñawpaqmanta mana cheqnichkaspa wañurachispa huk kaqnin llaqtaman ayqekuspa mana wañuchisqa kananpaqmi.
43 Chay llaqtakunam karqa:
Ruben ayllu runakunapa chunniq pampapi kaq Beser llaqta,
Gad ayllu runakunapa Galaad lawpi kaq Ramot llaqta,
Manases ayllu runakunapañataq Basan lawpi Golan llaqta.
Moisespa yachachisqan leykunamanta
44 Israelpa mirayninkunamanmi Moises willarqa yachachikuykunata.
45 Egipto nacionmanta lloqsiramuptinkum paykunaman yachachirqa kamachikuykunata,
decretokunata chaynataq reglamentokunatapas.
46 Chaynataqa yachachirqa Jordan Mayupa intipa qespimunan lawninpim otaq Bet-peor llaqtapa waqtan qechwapim,
chay qechwaqa kachkan Amor casta runakunapa reynin Sehonpa allpanpim.
Chay Rey Sehonqa yacharqa Hesbon llaqtapim,
paytam vencerurqaku Moisespiwan Israelpa mirayninkuna Egipto nacionmanta lloqsiramuspanku.
47 Hinaspam chay Rey Sehonpa allpanta chaynataq Basan lawpi Rey Ogpa allpantapas dueñochakurqaku.
Chay iskay reykunam karqaku Amor casta runakunapa reyninku,
paykunaqa yacharqaku Jordan Mayupa chimpan intipa qespimunan lawpim.
48 Chay reykunapa allpanqa karqa Arnon Mayupa patanpi kaq Aroer llaqtamanta qallarispam Sirion Orqokama.
(Chay Sirion Orqopa huknin sutinmi karqa Hermon.)
49 Chay reykunapataqmi karqa Jordan Mayupa chimpan intipa qespimunan lawpi kaq Araba Qechwapas Pisga Orqopa waqtanpi Kachi Qochakama.