2 —Hinaptinmi Tayta Dios niwarqa:

“Amayá paytaqa manchakuychu,

paytaqa ñoqam entregasqayki chaynataq llapallan tropankunatapas hinaspa allpantapas.

Paytapas wañuchinkichikmi Hesbon llaqtapi yachaq Amor casta runakunapa reynin Sehonta hina” nispa.

3 —Chaynatam yupaychasqanchik Tayta Dios vencechiwarqanchik Basan nacionpa reynin Ogta chaynataq llapallan tropankunatapas hinaptinmi paykunata wañuchirqanchik mana pitapas puchuspa.

4 Chaynataqmi llapallan llaqtankunatapas vencerqanchik,

manamá huk llaqtallatapas puchurqanchikchu,

chay vencesqanchik llapallan llaqtakunaqa karqa soqta chunka llaqtakunam,

chay llaqtakunaqa karqa Argob lawpim otaq Rey Ogpa gobiernasqan Basan nacionpi llaqtakunam.

5 Llapallan chay llaqtakunaqa karqa altokama murallasqam chaynataq punkunkunapas qerukunawan trankasqam.

Vencerurqanchiktaqmi chakrakunapi mana murallayoq achkallaña llaqtakunatapas.

6 Hesbon llaqtapi Rey Sehonta hinamá chinkarachirqanchik llapallan llaqtakunapi qarikunatapas,

warmikunatapas chaynataq wawakunatapas.

7 Llapallan animalkunatawan llaqtapi tukuy imakunatam qechurqanchik.

8 —Chaynaqa chay tiempopimá Jordan Mayupa waklawnin intipa qespimunan lawpi yachaq iskay reykunapa nacionninta dueñochakururqankichik Arnon Mayumanta Hermon Orqokama.

Chay reykunaqa karqaku Amor casta runakunapa reyninkunam.

9 (Kay Hermon Orqotam Sidon llaqtayoq runakuna suticharqaku Sirion Orqowan,

Amor casta runakunañataqmi suticharqaku Senir Orqowan.)

10 Dueñochakurqanchikmá tukuy pampakunapi kaq llaqtakunatapas,

Galaad lawpi llapallan llaqtakunatapas chaynataq Basan lawpi llapallan llaqtakunatapas Salca hinaspa Edrei llaqtakunaman chayananchikkama.

Chay llaqtakunaqa karqa Basan nacionpa reynin Ogpa gobiernasqan llaqtakunam.

11 (Ichaqa Basan nacionpa reynin Ogllañam puchururqa Refaim casta runamantaqa.

Paypa catrenmi karqa fierromanta tawa metro largoyoq hinaspa yaqa iskay metro anchoyoq.

Amonpa mirayninkunapa Raba llaqtanpim chay catreqa sutillaraq kachkan.)

12 —Chay tiempopi dueñochakusqanchik allpatam qorqani Ruben ayllumanwan Gad aylluman,

paykunamanqa qorqani Arnon Mayupa patanpi kaq Aroer llaqtamanta qallarispam Galaad parten orqokunakama,

qorqanitaqmi chaypi kaq llaqtakunatapas.

13 Galaad allpamanta puchuq Rey Ogpa gobiernasqa Basan allpatañataqmi qorqani Manasespa parten aylluman.

Qorqanimá Refaim casta runakunapa allpan nisqanku Argob lawpi allpakunatapas.

14 (Manases ayllumanta kaq Jair sutiyoq runam dueñochakuykurqa Argob lawpi allpakunata,

payqa dueñochakuykurqa Gesur casta runakunapa allpanpa linderonkamam chaynataq Maaca casta runakunapa linderonkamam.

Chay Basan lawpi allpataqa kikinpa sutinwanmi suticharqa “Havot-jair” nispa.)

15 Galaad allpataqa qomurqani Maquirpa mirayninkunamanmi.

16 Ruben ayllumanwan Gad ayllumanñataqmi qomurqani Galaad lawmanta qallarispa Arnon Mayupa kasqan allpakama.

Linderonmi karqa chay wayqomanta qallarispa Amon casta runakunapa allpanwan tupaq Jaboc Mayukama.

17 Paykunamanmi qorqanitaq Araba sutiyoq qechwatapas,

chaypa linderonñataqmi kachkan tukuy Jordan Mayu.

Chay mayuqa richkan Cineret Qochamantam Araba sutiyoq qochakama otaq Kachi Qochakama.

Chay qochaqa kachkan intipa qespimunan lawpi kaq Pisga Orqopa waqtan urayninpim.

18 —Chay tiempopim chay allpakuna qosqay ayllukunata kamachispay nirqani:

“Yupaychasqanchik Tayta Diosmi qoykusunkichik kay allpata dueñochakunaykichikpaq,

ichaqa guerrapi peleay yachaq armasqakunaqa llapallaykichikmi rinkichik castamasikichik Israel runakunapa ñawpaqninta.

19 Qamkunaman qosqay llaqtakunapim ichaqa quedaspaqa-quedanqa warmikichikkunalla,

churikichikkunalla hinaspa animalnikichikkunalla.

Qamkunaqariki achka animalniyoqmi kachkankichik.

20 Qamkunaqa amam kutimunkichikchu dueñochakunaykichikpaq qosqay allpamanqa.

Kutispaqa-kutikamunkichik qamkunaman yupaychasqanchik Tayta Dios hawkayay qosusqaykichikta hina castamasikichikkunamanpas hawkayayta qoykuptinñam chaynataq Jordan Mayupa chimpanpi allpatapas dueñochakuruptinkuñam” nispa.

21 —Chay tiempopiqa Josueytapas nirqanitaqmi kaynata:

“Qawarqankim yupaychasqanchik Tayta Diospa imam chay iskay reykunawan rurasqanta,

chaynatam Tayta Diosqa ruranqa pasanayki llapallan nacionkunapipas.

22 Amamá paykunataqa manchakunkichikchu,

yupaychasqanchik Tayta Diosmi qamkunapaqqa peleanqa” nispa.

23 —Hina chay tiempopitaqmi Tayta Diosta ruegakuspay nirqani:

24 “Señor Diosnilláy,

qanmi kay serviqnikiman qawachiwachkankiña hatu-hatun atiyniyoq kasqaykita.

Manam huk diosqa kanchu cielokunapipas hinaspa kay pachapipas qampa rurasqaykikuna ruray atiqqa.

25 Ama hina kaspayá permitiykuway Jordan Mayupa chimpanman pasarunaypaq,

chay allin allpa qawaykuytam munachkani,

munachkanitaqmi orqokunapa kasqan sumaqllaña allpakuna qawaykuytapas chaynataq Libano Orqo qawaykuytapas” nispa.

26 Aswanqa Tayta Diosmi qamkunarayku ñoqapaq piñakuruspan mañakusqaytapas mana uyariwarqachu,

chaynapim Tayta Diosqa niwarqa kaynata:

“Amaña masta parlapayawaychu chay asuntomanta.

27 Pisga Orqopa puntanman rispayá qawarimuy intipa seqaykunan lawta,

norte lawta,

surlawta chaynataq intipa qespimunan lawtapas.

Jordan Mayutam ichaqa mana chimpankichu.

28 Josueytayá kamachiy hinaspayá kallpanchaspayki valorchay.

Paymi runakunapa ñawpaqninta rispan allpata dueñochachinqa” nispa.

29 —Chaynapimá quedarurqanchik Bet-peor llaqtapa chimpan qechwapi.