Chunniqpi purisqanku watakunamanta
2
—Chay sitiomantam pasarqaniku chunniqman Puka Lamar Qocha lawman riq ñanninta Tayta Diospa niwasqanman hina.
Unay tiempom purirqaniku Seir Orqopa muyuriqninkunapi.
2 Hinaptinmi Tayta Dios niwarqa:
3 “Unayñam kay orqopa muyuriqninpi purisqaykichikqa,
kunanqa norte lawmanñayá pasaychik.
4 Hinaspayá kamachiytaq runakunata kaynata nispayki:
‘Qamkunam pasankichik Esaupa mirayninkunapa allpanta.
Paykunaqa castamasikichikmi,
paykunaqa Seir Orqopitaqmi yachanku.
Paykunaqa manchakusunkichikmi,
chaywanpas anchatayá cuidakuychik.
5 Amam paykunawanqa peleankichikchu,
paykunapa allpantaqa manam taksachallatapas qosqaykichikchu.
Seir Orqokunaqa Esau casta runakunapam,
paykunamanqa ñoqam qorqani.
6 Mikunaykichikpaq imatapas munaspaqa paykunamantam rantinkichik,
yaku tomasqaykichikmantapas pagankichikmi’ nispa.”
7 Yupaychasqanchik Tayta Diosmi bendeciwarqanchik tukuy ima rurasqanchikpi,
tawa chunka watapunim ñoqanchikwan karqa chaymi kay manchakuypaq chunniqpi puriptinchikpas mana imapas pisiwarqanchikchu.
8 —Chaymantam Elat llaqtanta hinaspa Ezion-geber llaqtanta pasarqanchik Araba Wayqonta.
Pasarqanchikqa Seir Orqopi yachaq castamasinchik Esau casta runakunapa allpanpa hichpantam,
chay Araba Wayqoman riq ñanmanta rakikuspanchikmi pasarqanchik Moab casta runakunapa chunniq ñanninta.
9 Hinaptinmi Tayta Dios niwarqa:
“Amam imanankichikchu Moab casta runakunataqa hinaspapas amataqmi paykunawanqa peleankichikchu,
paykunaqa Lotpa mirayninkuna kasqanraykum qorqani Ar sutiyoq allpata.
Paykunapa allpantaqa manam qosqaykichikchu” nispa.
10 (Chay allpapiqa ñawpaqtam yacharqaku Em casta runakuna,
chay runakunaqa karqaku atiyniyoq achkallaña runakunam,
chay runakunaqa karqaku Anacpa mirayninkuna hina hatunkaray runakunam.
11 Wakin runakunam creerqaku chay hatunkaray runakunaqa Refaim casta runakuna kasqanta,
Moab casta runakunam ichaqa Em casta runakunawan suticharqaku.
12 Seir law allpapiqa ñawpaqtam yacharqaku Hor casta runakuna ichaqa paykunatam Esaupa mirayninkuna qarqorurqaku,
paykunata chinkarachispankum chaypiqa paykunaña yachakurqaku.
Chaynataqa rurarqaku Israelpa mirayninkunapas Tayta Diospa qosqan allpamanta qarqosqankuta hinam.)
13 Tayta Diosmi nirqa:
“Kunanyá pasaychik Zered Mayuta” nispa.
Hinaptinmi pasarqanchik Zered Mayuta.
14 —Cades-barnea llaqta lawmanta hamuspa Zered Mayuta chipamunanchikkamam karqa kimsa chunka pusaqniyoq wata.
Chay tiempokamaqa lliwñam wañururqaku guerrapi peleaq llapallan runakunaqa.
Paykunaqa campamentomantam chinkarurqaku Tayta Diospa jurasqanpi hina.
15 Tayta Diospa atiyninmi paykunapa contranpi karqa campamentopa chawpinmanta chinkarachinanpaq.
16 —Guerrapi peleaq chay llapallan runakuna wañuruptinñataqmi
17 Tayta Dios niwarqa:
18 “Kunanpunim pasankichik Moab casta runakunapa allpanmanta Ar sutiyoq llaqta lawman.
19 Amon casta runakunapa allpanman chayaspaykichikqa amam paykunataqa imanankichikchu hinaspapas amataqmi paykunawanqa peleankichikchu.
Amonpa miraynin runakunapa allpantaqa manam qosqaykichikchu.
Chay allpataqariki qorqani Lotpa mirayninkunamanmi herencianku kananpaq” nispa.
20 (Wakin runakunapas creerqaku chay allpaqa Refain casta runakunapa kasqantam,
chaynataqa piensarqaku ñawpaq tiempopi Refain casta runakuna chaypi yachasqankuraykum.
Paykunatam Amon casta runakuna suticharqaku “Zomzom casta runakuna” nispa.
21 Chay runakunaqa atiyniyoq achkallaña runakunam karqaku.
Paykunaqa karqa Anacpa mirayninkuna hina hatunkaray runakunam.
Paykunatam Tayta Dios tukurachirqa Amon casta runakunawan,
chaynapim Amon casta runakunaña dueñochakuruspa chaypi yachakurqaku.
22 Seir Orqopi yachaq Esaupa mirayninkunapaq Tayta Diospa rurasqanman hinam Amonpa mirayninkunawanpas rurarqa.
Hor casta runakunata tukuruptinmi Esaupa mirayninkunaña paykunapa rantinpi yachakurqaku kay libro qellqasqa kasqan tiempokama.
23 Chaynataqmi Gaza llaqtapa muyuriqnin llaqtachakunapi yachaq Av casta runakunatapas Creta islamanta hamuqkuna tukururqaku hinaspam paykunapa rantinpi yachakurqaku.
Chay Creta islamanta hamuqkunaqa karqa Caftor casta runakunam.)
24 —Tayta Diosmi niwarqa:
“Chimpaychik Arnon sutiyoq mayuta,
kunanmi vencechisqaykichik Amor casta runakunapa reynin Sehonta,
payqariki yachan Hesbon llaqtapim,
ñoqaqa qosqaykichiktaqmi paypa allpantapas.
Chaynaqa allpanta dueñochakuyta qallarispayá paywan peleaychik.
25 Qamkunaraykum kunanmantapuni kay pachapi runakuna mancharichiyta qallarisaq.
Qamkunamanta rimaqta uyarispankum mancharikuymanta katkatatanqaku hinaspa qewipakunqaku” nispa.
Rey Sehonta vencesqankumanta
26 —Cademot sutiyoq chunniqmantam kacharqani runakunata Hesbon llaqtapi yachaq Rey Sehonta sumaq simillawan kaynata nimunankupaq:
27 “Allpayki chawpintam pasaruyta munaniku.
Ñanninta rispallaykum mana maylawmanpas muyusaqkuchu.
28 Mikunaykupaq pisiptinqa rantisqaykikum,
yakuykitapas tomaspaykuqa pagasqaykikum.
Chakiwan pasaruqllatayá dejaykuwayku.
29 Seir Orqopi yachaq Esaupa mirayninkuna chaynataq Ar llaqtapi yachaq Moab casta runakuna hinayá qampas chaynata ruraykullawayku.
Jordan Mayuta chimparunaykukamayá chaynataqa ruraykullawayku chaynapi yupaychasqayku Tayta Diospa qowananku allpaman chayarunaykukama” nispa.
30 —Aswanqa Hesbon llaqtapi yachaq Rey Sehonmi mana munarqachu allpanpa chawpin pasananchikta.
Paytaqariki yupaychasqanchik Tayta Diosmi pasaypaq rumi sonqota rurarurqa chaynapi paytaqa qamkunamanña entregaykusunaykichikpaq,
chaynamá kachkanku kunan qawasqanchikpi hina.
31 —Hinaptinmi Tayta Dios niwarqa:
“Kunan punchawmantapunim qoykichik Rey Sehonta chaynataq allpantapas.
Chaynaqa yaykuspaykichikyá allpan dueñochakuyta qallariychik” nispa.
32 —Hinaptinmi Rey Sehon taripamuwarqanchik llapa tropankunapiwan Jahaza llaqta lawpi peleananchikpaq.
33 Aswanqa yupaychasqanchik Tayta Diosmi qoykuwarqanchik hinaptinmi vencerurqanchik payta,
churinkunata chaynataq llapa tropankunatapas.
34 Llapallan llaqtankunata venceruspanchikmi tuñichirqanchik hinaspam wañuchirqanchik qarikunatapas,
warmikunatapas chaynataq wawakunatapas manaña puchunankukama.
35 Ichaqa llapa animalkunapiwan llaqtakunapi tukuy ima qechusqallanchikmi ñoqanchikpaqqa karqa.
36 Arnon sutiyoq mayu patanpi Aroer llaqtamanta chaynataq wayqopi kaq llaqtamanta hinaspa Galaad lawpi llaqtakunakamam mayqan llaqtapas mana harkawarqanchikchu,
yupaychasqanchik Tayta Diosmi munaychakunanchikpaq llapallanta qoykuwarqanchik.
37 Amon casta runakunapa allpanmanmi ichaqa mana chayarqanchikchu,
manataqmi chayarqanchikchu Jaboc sutiyoq mayu lawpi llapallan kaqkunamanpas nitaq orqo lawpi kaqkunamanpas nitaq yupaychasqanchik Tayta Diospa prohibiwasqanchik allpakunamanpas.