MOISESPA QELLQASQAN PICHQA KAQ LIBRO
DEUTERONOMIO
Libropa qallariyninmanta
1
Jordan Mayupa waklawnin intipa qespimunan law chunniqpi Puka Lamar Qochapa hanaynin Araba lawpi chaynataq Paran,
Tofel,
Laban,
Hazerot hinaspa Dizahab sitiokunapa chawpinpi Israelpa llapallan mirayninkuna kachkaptinmi paykunaman Moises willarqa.
2 Horeb Orqomanta Cades-barnea llaqtamanqa kachkan chunka hukniyoq punchaw puriymi,
chay llaqtaman chayanapaqqa pasana Seir Orqontam.
3 Tawa chunka wataña Egipto nacionmanta lloqsisqanku hawam chunka hukniyoq kaq killapi chaynataq chay killapa punta kaq punchawninpi Moises Israelpa mirayninkunaman rimapayarqa Tayta Diospa kamachisqanman hina.
4 Paykunamanqa chaynataqa rimapayarqa Amor casta runakunapa reynin Hesbon llaqtayoq Sehonta chaynataq Basan nacionpa reynin Ogta venceruspanñam.
Chay Og sutiyoq reyqa yacharqa Edrei llaqtapiwan Astarot llaqtapim.
5 Chaynaqa Jordan Mayupa wak- lawnin Moab casta runakunapa allpanpi Israelpa mirayninkuna kachkaptinkum Moises qallaykurqa kay yachachikuykuna yachachiyta:
6 —Yupaychasqanchik Tayta Diosmi Horeb Orqopi rimapayawaspanchik nirqa kaynata:
“Unayñam qamkunaqa karunkichik kay orqo lawpi.
7 Muyurispaykichikyá riychik Amor casta runakunapa yachanan orqokunaman,
Araba lawman,
orqokuna lawman,
chay orqokunapa waqtan lawman,
Neguev lawman hinaspa lamar Qocha lawman.
Chay lawkunapiqa yachan Canaan casta runakunam,
riychiktaqyá Libano lawmanpas,
Eufrates hatun mayuman chayanaykichikkama.
8 Chay allpataqa ñoqam qoykichik yaykuspa dueñochakunaykichikpaq.
Chay allpataqa abueloykichik Abrahanman,
Isaacman,
Jacobman chaynataq mirayninkunaman qonaypaqmi juraspay ñoqa Tayta Dios prometekurqani.”
Kamachikuqkuna akllasqankumanta
9 —Chay tiempopim ñoqa Moises nirqani kaynata:
“Sapallayqa manam qamkunamanta cuentallikuyta atiymanchu.
10 Yupaychasqanchik Tayta Diosmi mirarachisunkichik chaymi kunanqa kankichik cielopi lucerokuna hina achkallaña.
11 Abuelonchikkunapa yupaychasqan Tayta Diosyá kunan kasqaykichikmantapas achka waranqa mastaraq mirachisunkichik hinaspayá bendecisunkichik prometewasqanchikman hina.
12 Chaywanpas manam sapallayqa atiymanchu sasachakuynikichikkunata,
quejanakuynikichikkunata hinaspa atipanakuynikichikkunata aguantaytaqa.
13 Chaynaqa sapa ayllumantayá akllaychik yachaysapa,
yuyaysapa chaynataq allin reqsisqa runakunata chaynapi paykunaña kamachisunaykichikpaq” nispa.
14 —Hinaptinmi paykunañataq niwarqaku:
“Allinpunim chay niwasqaykikuqa” nispa.
15 —Chaymi sapa ayllumanta akllarqani yachaysapa chaynataq allin reqsisqa runakunata hinaspam paykunata churarqani kamachikuqpaq.
Paykunatam churarqani waranqa runakunata,
pachak runakunata,
pichqa chunka runakunata,
chunka runakunata kamachinankupaq.
Wakintañataqmi churarqani sapa aylluta kamachinanpaq.
16 Chaynataqmi paykunapa kamachiqninkunatapas kamachispay nirqani:
“Llapallankuta uyarispaykichikyá allinta arreglaychik.
Chaynatamá rurankichik Israelpa mirayninkuna kaptinpas chaynataq forasterokuna kaptinpas.
17 Pitapas sentenciaspaqa amam mayqanmanpas sayapakunkichikchu.
Ama pitapas manchakuspaykichikmá wakchatapas otaq munayniyoqtapas uyarinkichik.
Allin arregloqa Diosmantam hamun.
Sasa asuntokunataqa ñoqamanmi apamuwankichik arreglanaypaq” nispa.
18 —Tukuy imapas ruranaykichikmantaqa chay tiempopim sumaqta yachachirqani.
Canaan allpa wateqamuq runakunamanta
19 —Yupaychasqanchik Tayta Diospa kamachikuyninta kasukuspaykum Horeb Orqomanta lloqsispa rirqaniku Amor casta runakunapa orqonkuna lawman.
Rikumusqaykuta hinam chay hatun manchakuypaq chunniqninta hamurqaniku Cades-barnea llaqta lawman chayamunaykukama.
20 Chaypim nirqani:
“Yupaychasqanchik Tayta Diospa qowananchik Amor casta runakunapa yachanan orqokunamanmi chayaramunchik.
21 Chaynaqa yupaychasqanchik Tayta Diosmi kunanpuni qoykusunkichikña,
chaynaqa abuelonchikkunapa yupaychasqan Tayta Diospa nisqanpi hinayá rispaykichik dueñochakamuychik.
Amayá manchakuychikchu nitaq hukmanyaychikchu” nispa.
22 Hinaptinmi paykunañataq hamuspa niwarqaku:
“Allincha kanman wakinninchik runakunata ñawpaqninchik kacharuyqa chaynapi paykuna allpata wateqamunankupaq.
Paykuna kutimuspankuchiki willawasunchik maynintam rinanchikpaqpas chaynataq maylaw llaqtakunamanmi yaykunachiktapas” nispa.
23 —Chay niwasqanku allinpaq rikchakapuwaptinmi chunka iskayninyoq runakunata akllarqani,
sapa ayllumantam akllarqani huk runata.
24 Paykunam orqonta rispanku chayarurqaku Escol Wayqokama.
Chaymanta pasaspankum qawamurqaku tukuy allpakunata.
25 Apamuwarqakutaqmi chay allpapa rurunkunatapas hinaspam willawarqaku:
“Yupaychasqanchik Tayta Diospa qowananchik allpaqa suma-sumaqllañam kasqa” nispa.
26 Aswanqa mana riyta munaspankum yupaychasqanchik Tayta Diospa kamachisqanta mana kasukurqakuchu.
27 Hinaspam karpankupi rimarqaku:
“Tayta Diosqa cheqniwaspanchikmi Egipto nacionmanta horqomuwarqanchik Amor casta runakunaman qoykuwaptinchik tukuruwananchikpaq.
28 Kunanqa ¿maytataq risunchik?
Chay allpata qawamuq castanchikkunam ninku chay allpapiqa ñoqanchikmantapas astawan kallpasapa,
hatunkaray runakuna kasqanmanta chaynataq llaqtakunapas alto-alto murallayoq llaqtakuna kasqanmanta.
Rikuramunkutaqsi hatunkaray Anacpa miraynin runakunatapas.
Chay noticiakunam pasaypaqta hukmanyarachiwanku” nispa.
29 —Chaymi paykunata nirqani:
“Amayá katkatataychikchu nitaq manchakuychikchu paykunataqa.
30-31 Ñawpaqninchik riq yupaychasqanchik Tayta Diosmi peleanqa ñoqanchikpaq,
payqa chaynataqa ruranqa Egipto nacionpi chaynataq chunniqpipas rurasqanman hinam.
Chaykunataqa rikurqankichikmi,
hamusqaykichik ñankunatam kay sitioman chayamunaykichikkama yupaychasqanchik Tayta Dios marqayninpi apamusurqankichik churinta taytan marqayninpi apamuchkaq hina” nispa.
32 Chaywanpas mama-taytaykichikqa manam confiakurqaku yupaychasqanchik Tayta Diospichu.
33 Payqariki ñawpaqniykutam rirqa maypim samanaykuta qawastin.
Tutanmi ninawan qawachiwarqaku mayninmi rinaykupaq,
punchawñataqmi reqsichiwarqaku puyuwan.
Israel casta runakunapa contranpi Tayta Dios piñakusqanmanta
34 —Mama-taytaykichikpa rimasqanta Tayta Dios uyariruspanmi piñakururqa chaymi juraspan nirqa:
35 “Kay mana allin miray runakunaqa manam mayqanninpas rikunqachu abuelonkuman juraspay qonay sumaq allpataqa.
36 Jefonepa churin Calebmi ichaqa yaykunqa hinaptinmi payman chaynataq mirayninkunamanwan qosaq chay paypa reqsimusqan allpata.
Payqa yaykunqa ñoqa Tayta Diosta tukuy sonqonwan qatiwasqanraykum” nispa.
37 —Mama-taytaykichikpa huchanraykum ñoqapaqpas Tayta Dios piñakuspa niwarqa:
“Qampas manam yaykunkichu chay allpamanqa.
38 Nunpa churin yanapaqniki Josueymi ichaqa qampa rantikipi yaykunqa,
chaynaqa paytayá kallpanchay,
paymi qonqa chay herenciata Israelpa mirayninkunaman” nispa.
39 —Chaymantam Tayta Dios nirqataq kaynata:
“Qamkunaqa manchakuspaykichikmi nirqankichik wawa-churikichikpas enemigopa presochasqan kananmanta.
Aswanqa chay mana imapas yachaq warmakunam yaykunqaku chay allpamanqa.
Chay allpataqa ñoqam paykunaman qosaq dueñochakunankupaq.
40 Ichaqa qamkunaqa chunniq lawman muyurispayá kaqllamanta riychik Puka Lamar Qocha lawman” nispa.
Mana kasukusqankurayku vencerachikusqankumanta
41 —Mama-taytaykichikmi niwarqaku:
“Huchallikurunikum Tayta Diospa contranpi,
ñoqaykuqa rispaykum peleamusaqku yupaychasqanchik Tayta Diospa tukuy kamachiwasqanchikman hina” nispa.
Chaynapim taytaykichikqa guerrapi peleanankupaq armankuta sapakama hapispa facilpas kanman hina orqokunaman riyta munarqaku.
42 Hinaptinmi qamkunaman ninaypaq Tayta Dios niwarqa:
“Ama riychikchu peleamuqqa,
ñoqaqariki manam qamkunawanchu kachkani,
mana chayqa enemigoykichikpa vencesqanmi karuwaqchik” nispa.
43 —Chaynata willachkaptiypas mana kasuwaspankum Tayta Diospa kamachisqanpa contranpi hoqarikurqaku hinaspam qari tukuspanku chay orqoman rirqaku.
44 Ichaqa chay orqopi yachaq Amor casta runakunam taripaqninku lloqsiramuspanku vencerurqaku Seir sutiyoq orqopi hinaspam wayliskuna hina paykunata qatirqaku Horma llaqta lawkama.
45 Chaymi paykunaqa kutiramuspanku waqarqaku Tayta Diospa qayllanpi ichaqa manam payqa uyarirqachu nitaqmi caso-preciotapas churarqachu.
46 Chaynapim paykunaqa unay tiempo quedarqaku Cades llaqta lawpi.