Guerrapi peleanankupaq yachachikuykunamanta
20
—Sichum guerrapi peleaq lloqsispaykichik qawaykunkichik enemigoykichikpa caballonkunata,
carretankunata chaynataq tropankunata qamkunamantapas aswan achkaraq kasqanta hinaspaqa amam manchakunkichikchu.
Egipto nacionmanta horqomuwaqninchik yupaychasqanchik Tayta Diosmi qamkunawanqa kanqa yanapasunaykichikpaq.
2 Guerrapi peleanaykichik hora chayaramuptinqa sacerdotem rimarinqa soldadokunaman
3 kaynata:
“Uyariychik Israelpa mirayninkuna,
kunanmi enemigoykichikpa contranpi peleankichik.
Amayá hukmanyaychikchu nitaq manchakuychikchu.
Amayá katkatataychikchu paykunapa qayllanpiqa.
4 Yupaychasqanchik Tayta Diosmi yanapasunkichik.
Enemigoykichikpa contranpi peleaspanmi vencechisunkichik” nispa.
5 —Chaymantam soldadokunata autoridadkuna ninqaku:
“Sichu qamkunamanta pipas mosoq wasita ruraruspan manaraq chaypi yachaspanqa,
kutikuchunyá wasinta.
Yanqañataq guerrapi wañuruptin huk runaña chay wasinpi yachakunman.
6 Sichu qamkunamanta pipas uvasta plantaruspan manaraq rurunta mikuspanqa,
kutikuchunyá wasinta.
Yanqañataq guerrapi wañuruptin huk runaña uvasninta cosechakunman.
7 Sichu qamkunamanta pipas rimapayarqaña warmita casarakunanpaq hinaspaqa kutikuchunyá wasinta.
Yanqañataq guerrapi wañuruptin hukwanña casarakurunman” nispa.
8 —Yapatawanmi soldadokunata autoridadkuna ninqaku:
“Qamkunamanta pipas manchakuspan manaña valorniyoq kaspaqa kutikuchunyá wasinta.
Yanqañataqmi manchakuspan soldadomasintapas manchapachinman” nispa.
9 Chay autoridadkuna soldadokunaman rimayta tukuruptinñataqmi tropapa capitanninkuna soldadokunapa ñawpaqninman churakunqaku.
10 —Sichu huk kaqnin llaqtaman peleanaykichikpaq asuykuspaqa,
manaraq peleachkaspam rendikunankupaq rimapayachimunkichik.
11 Sichu chay llaqtapi kaqkuna hawkalla yaykunaykichikpaq munaptinkuqa paykunam sirvientekichik kaspa devaldella servisunkichik.
12 Ichaqa hawkalla yaykunaykichikta mana munaspanku contraykichikpi peleaptinkuqa,
llaqtata muyuruspam peleankichik.
13 Yupaychasqanchik Tayta Dios vencerachisuptikichikmi chay llaqtapi llapallan qarikunata wañurachinkichik.
14 Ichaqa llaqtapi kaq warmikunaqa,
wawakunaqa,
animalkunaqa chaynataq llaqtapi tukuy ima kaqkunaqa qamkunapaqmi kanqa.
Yupaychasqanchik Tayta Diospa qosusqaykichikraykum enemigoykichikmanta tukuy qechusqaykichikta hapikuykunkichik.
15 Hina chaynallatam rurankichik yachanaykichik Canaan allpamanta karu-karupi kaq llapallan llaqtakunatapas,
chaykunaqa manam Canaan allpapi kaq nacionkunachu.
16 Yupaychasqanchik Tayta Diospa dueñochakunaykichikpaq qosusqaykichik llaqtakunapim ichaqa llapallan runakunata wañurachinkichik.
17 Chaypi kaqkunaqa pasaypaq chinkachisqam kanqa.
Chinkachinkichikmá Het casta runakunata,
Amor casta runakunata,
Canaan casta runakunata,
Ferez casta runakunata,
Hiv casta runakunata chaynataq Jebus casta runakunatapas,
chaynataqa rurankichik yupaychasqanchik Tayta Diospa kamachisqanman hinam.
18 Chaynatam rurankichik millakuypaq kaqkunata ruraspanku taytacha-mamachanku adorayta mana yachachisunaykichikpaq.
Chay nacionkunapa rurasqanta hina ruraspaqa yupaychasqanchik Tayta Diospa contranpim huchallikuwaqchik.
19 —Sichu peleaspa vencerunaykichikpaq llaqtapa muyuriqninpi campamentoykichikta churaruspaqa amam fruta sachankunataqa hachawan kuchupankichikchu.
Chaykunapa rurunqa mikunaykichikpaqmi kanqa.
Sachakunaqa manam runa hinaqa guerrapi peleanmanchu.
20 Chaywanpas chay llaqtata vencerunaykichikkamaqa kuchuwaqchikmi mana ruruq sachakunataqa,
chaykunawan llaqtapa muyuriqninta qencharunaykichikpaq.