Wañusqa rikuriruq runamanta
21
—Sichu yupaychasqanchik Tayta Diospa qosunaykichik allpapiña kaspa tariruwaqchik chakrapi pipapas wañurachisqan runata ichaqa manataq yachawaqchikchu pipapas wañurachisqanta hinaptinqa
2 ancianokunapiwan juezkunam wañusqa runapa kasqan sitiomanta qallarispa muyuriqninpi kaq llaqtakunaman metrowan tupunqaku.
3 Hinaptinmi wañusqa runapa hichpanpi kaq llaqtapa autoridadninkuna pusamunqaku manaraq yugoman watasqanku vaquillata.
4 Chay llaqtapi autoridadkunam pusanqaku chay vaquillata mana chakiq yakuyoq wayqoman otaq mana haykapipas yapusqanku nitaq tarpusqanku wayqoman hinaspam pusasqanku vaquillapa kunkanta qewirunqaku.
5 —Chaymantam Leviy ayllumanta sacerdotekuna chay llaqtaman asuykunqaku.
Paykunataqa yupaychasqanchik Tayta Diosmi akllarqa paypa qayllanpi servinankupaq hinaspa runakunapaqpas Tayta Diospa bendicionninta mañakunankupaq.
Hinaptinmi paykunapa nisqanman hina arreglasqa kanqa tukuy atipanakuy chaynataq tukuy daño ruranakuypas.
6 Chay llaqtapi llapallan autoridadkunam makinkuta mayllakunqaku vaquillapa hawanpi
7 hinaspam ninqaku:
“Manam ñoqaykuchu chay runataqa wañuchirqaniku nitaqmi pi wañuchisqantapas rikurqanikuchu.
8 Chaynaqa Dios Taytallayku,
pampachaykuwaykuyá salvasqayki Israelpa mirayninkunata,
amayá chay wañuqmantaqa tumpawaykuchu Israel runaykikunamanqa” nispa.
Chaynapim chay wañuchisqanku huchamantaqa pampachasqaña kankichik.
9 Chaynaqa Tayta Diospa qayllanpi allinta ruraspaykichikmi chay wañuq inocente runa wañusqanmantaqa manaña culpayoq kankichik.
Guerrapi presochasqa warmikunawan imaynam ruranankumanta
10 —Sichu enemigoykichikwan peleaptikichik paykunamanta presochanaykichikpaq runakunata yupaychasqanchik Tayta Dios qoykusunkichikman
11 hinaptinñataq huk kaqnikichik chay presochasqa warmikunapi rikurunman buenamoza warmita hinaspa warmin kananpaq kuyaruspanqa
12 chay warmitam wasinman pusanqa hinaptinmi chay warmiñataq chukchanta kachiy-kachiyta rutukunqa chaynataqmi sillunkunatapas kaptakunqa.
13 Chaynataqmi presochachikusqan tiempopi pachantapas mudakuspan qaripa wasinpiña yachanqa.
Tayta-mamanmanta llakikuspanqa huk killatam lutokunqa.
Chaymantañam chay qari paywan casarakunqa chaynapim paypas warminña kanqa.
14 Chay warmita manaña gustaruspaqa libretam kachaykunqa ichaqa humillachisqanraykum mana rantikunmanchu nitaqmi sirvientanpaqpas hatallinmanchu.
Piwi churikunapaq herenciamanta
15 —Pipas iskay warmiyoq kaspan huknillanta kuyarunman chaynapi iskaynin warmipitaq churinkunapas karunman,
ichaqa piwi churinñataq kanman mana kuyasqan kaq warmipi
16 hinaptinqa herencia qonanpaq tiempo chayaramuptinmi kuyasqan warmipa wawanmanqa mana qonqachu piwi churinpa herenciantaqa.
Piwi churinqa karqa mana kuyasqan kaq warmipim,
chayraykum piwi churipa herenciantaqa paylla chaskinqa.
17 Aswanqa qonqamá mana kuyasqan warmipa wawanmanpas,
qonqaqa piwi churin kasqanraykum,
wakin churinkunaman herencia qosqanmantapas huk chaynatawanraqmi paymanqa qonqa.
Payqa puntallaraq churin kasqanraykum piwi churi hina tukuy derechoyoq kanan.
Mana kasukuq churikuna castiganankumanta
18 —Sichu pipapas kanqa churin munaysapa chaynataq rebelde,
tayta-maman reprendeptinpas chaynataq castigaptinpas mana kasukuq
19 hinaptinqa tayta-mamanmi hapiruspan llaqtanpi autoridadkunaman pusanqa.
20 Paykunamanmi ninqa:
“Kay warmaykum munaysapa,
rebelde,
imata niptiykupas manam kasuwankuchu,
mikuylla-mikukuq borracho runam” nispa.
21 Chaymi llaqtanpi llapallan qarikuna rumiwan choqapaspanku wañuchinqaku.
Chaynata ruraspaykichikmi mana allin ruraqkunata qamkunamanta chinkachinkichik.
Israelpa mirayninkunam chayta uyarispanku manchakunqaku.
Achka rikchaq yachachikuykunamanta
22 —Sichu pipas mana allin rurasqanmanta sentenciasqaykichikman hina sachapi warkusqa wañuruptinqa,
23 tukuy tutaqa amam chaypiqa cuerponta saqerunkichikchu aswanqa chay punchawllam pamparunkichik.
Sachapi warkusqa wañuq runaqa Diospa ñakasqan runam.
Chaynaqa yupaychasqanchik Tayta Diospa dueñochakunaykichikpaq qosunaykichik allpataqa amam millakuypaqtaqa rurankichikchu.