22
—Sichu rikuruwaq llaqtamasikipa chinkasqa bueyesninta otaq ovejantapas hinaspaqa amam upallakuykunkichu aswanqa llaqtamasikimanmi pusarapunki.
2 Sichu chay animalpa dueñon mana reqsisqayki otaq vecinoyki kaptinqa hapiruspaykim wasikiman pusanki hinaspam hatallinki llaqtamasiki reclamasunaykikama.
3 Chaynatam rurankichik runamasikichikpa chinkaruq asnonwanpas chaynataq wischurusqan ponchonwanpas otaq llaqtamasikichikpa imantapas tarikuspaqa.
Tariruspaqa amamá upallakuykunkichikchu.
4 —Sichu llaqtamasikipa asnonta otaq bueyesnintapas ñanpi pisiparuspan wischurayaqta rikuspaqa amam qawayllaqa-qawakunkichikchu aswanqa yanapaykunkichikmi hatarichinanpaq.
5 —Amam warmiqa pachakunqachu qaripa pachanwanqa nitaqmi qaripas warmipa pachanwanqa.
Pipas chayna ruraqqa yupaychasqanchik Tayta Diospa millakusqanmi.
6 —Sichu ñanta richkaspayki sachapi otaq pampapipas tariruwaq qestanpi mallqochankunata otaq runtuntapas oqllachkaq animalchata hinaspaqa amam apakunkichu mamantawan mallqochankunataqa,
7 mallqochankunallata apakuspam mamantaqa kachaykunki.
Chaynata ruraspaqa kusikunkim hinaspataqmi unayta kawsakunki.
8 —Pampa hina qatayoq mosoq wasita rurakuspaykiqa perqantam ruranki qatanpa muyuriqninpi.
Mana chayqa pipas wichiykamuspa wañuruptinmi wasipi kaqkuna huchayoq kawaqchik chay wañuqmanta.
9 —Uvas huertapiqa amam tarpunkichu huk rikchaq muhutaqa,
yanqañataqmi pierderapusunkiman uvasnikipas chaynataq tarpusqayki muhupas.
10 —Chakraykipiqa amam yapunkichu asnotawan bueyesta pareschaspaqa.
11 —Linotawan millwata taqruykuspaqa amam awankichu,
chayna pachawanqa amamá churakunkichu.
12 —Capaykipa tawan puntankunamanmi siranki kipukunata watuyoqtakama.
Casamientomanta yachachikuykuna
13 —Sichu pipas warmita casararunman ichaqa payman hukllawakuruspanñataq manaña kuyanmanchu
14 chaynapi warmita penqayman churayta munaspan kaynata ninman:
“Kay warmitam casararqani ichaqa paywan puñuptiymi manaña doncellachu kasqa” nispa.
15 Chayna kaptinqa chay sipaspa tayta-mamanmi llaqtapi autoridadkunapa qayllanpi doncella kasqanta pruebanqa.
16 Sipaspa taytanmá autoridadkunaman kaynata ninqa:
“Ñoqam kay runawan churiyta casarachirqani ichaqa kunanñataqmi churiytaqa cheqnipakurunña.
17 Penqayman churayta munaspanmi nichkan:
‘Manam churikiqa doncellachu kasqa’ nispa.
Aswanqa kaywanmi pruebani churiyqa doncella kasqanmanta.”
Chaynata nispanmi puñuna pachanta qawachinqa llaqtapi autoridadkunaman.
18 Hinaptinmi autoridadkuna chay qarita presochaspanku castiganqaku.
19 Chay autoridadkunam sipaspa taytanman multata pagachinqaku huk kilo qollqeta,
chaynataqa multanqaku Israelpa mirayninkunapi doncella sipasta penqayman churasqanraykum.
Chaywanpas chay casarasqan warmiqa paypa warminmi kanqa kawsanankama,
chaynaqa manamá rakikuyta atinmanchu.
20 —Ichaqa cheqaptapuni chay sipas mana doncella kaptinqa
21 taytanpa wasinmanta horqoruspankum llaqtapi runakuna rumiwan chamqapaspa wañuchinqaku,
chay warmiqariki familiantapas penqayman churaspam Israelpa mirayninkuna ukupi loca hina chaynata rurarqa.
Chay warmita wañuchispamá qamkunamanta chinkachinkichik mana allin ruraqta.
22 —Sichu pitapas tarirunkichik casada warmiwan huchapakuchkaqta hinaptinqa iskayninkutam wañuchinkichik.
Chaynata ruraspamá qamkunamanta chinkachinkichik mana allin ruraqta.
23 —Sichu doncella sipas rimapayasqaña kanqa casarakunanpaq ichaqa huk kaqnin runa llaqtapi tariruspan chay doncellawan puñuruptinqa,
24 iskaynintam pusankichik llaqtapi autoridadkunaman hinaspam rumiwan chamqapaspa wañurachinkichik.
Sipasqa wañunqa llaqtapi kachkaspan mana qaparisqanraykum.
Qariñataqmi wañunqa runamasinpa casaranan warmita penqayman churasqanrayku.
Chaynata ruraspam qamkunamanta chinkachinkichik mana allin ruraqkunata.
25 —Sichu casarakunanpaq rimapayasqaña sipasta pipas campopi tariruspan abusaruptinqa qarillam wañunqa chay rurasqanmanta.
26 Sipastaqa amam imanankichikpaschu,
manam payqa wañunanpaq hina huchayoqchu.
Chay asuntoqa rikchakun pipas runamasinta qonqaymanta wañurachiq runamanmi.
27 Sipas abusaq runaqa campopi sapallanta tariruspanmi chaynata rurarqa.
Sipas qayaykachakuptinpas manam pipas libranmanchu karqa.
28 —Sichu casarakunanpaq manaraq rimapayasqa doncellata abusachkaqta pitapas tariruptinkuqa,
29 chay abusaqmi sipaspa taytanman qonqa parte kilo qollqeta.
Chaynataqmi abusasqanrayku chay sipasqa warminña kanqa.
Chay runaqa kawsanankamam mana rakikunmanchu chay warmimantaqa.
30 —Taytanpa warmillanwanqa amam pipas kakunqachu.
Chaynata ruraspaqa taytantam penqayman churachkan.