Tayta Diospa qayllanpi huñunakuyman pikunam mana yaykunankumanta
23
—Tayta Diospa qayllanpi huñunakuymanqa amam yaykunqachu runtun toqyasqapas nitaq qari kaynin kuchusqapas.
2 —Tayta Diospa qayllanpi huñunakuymanqa amam yaykunqachu pipapas churyapakuyninqa,
chaynamá kanqa chunka mirayninkama.
3 —Tayta Diospa qayllanpi huñunakuymanqa amam yaykunqachu Amon casta runakunaqa nitaq Moab casta runakunapas,
chaynamá kanqa chunka mirayninkukama.
4 Paykunaqa Egipto nacionmanta lloqsimuspa allpanku waqtanta pasamuptikichikmi mana taripamusurqankichikchu yakullankuwanpas nitaq mikuyllankuwanpas.
Aswanraqmi Mesopotamia lawpi kaq Petor llaqtamanta hamuq Beorpa churin Balaanman pagarqaku ñakasunaykichikpaq.
5 Chaywanpas yupaychasqanchik Tayta Diosmi mana uyarirqachu Balaamta aswanqa kuyasusqaykichikraykum ñakaykuy munasusqaykichiktapas tikrarurqa bendicionikichikmanña.
6 Chaynaqa wiñaypaqmá amapuni munankichikchu paykunapa hawkalla kayninkutaqa nitaq allinlla kayninkutapas.
7 —Ichaqa amam millakunkichikchu Edom casta runakunataqa,
paykunaqariki qamkunapa castaykichikmi.
Amataqmi millakunkichikchu Egipto nacionpi kaqkunatapas.
Paykunapa allpanpim qamkunaqa yacharqankichik.
8 Tayta Diospa qayllanpi huñunakuymanqa yaykuspaqa-yaykunqa Egipto nacionniyoq runakunapa willkanpa churinkunallam.
Limpio kanankupaq yachachikuykunamanta
9 —Enemigoykichikkunapa contranpi peleaq lloqsispaqa amam rurankichikchu imapas millakuypaq kaqkunataqa.
10 Sichu tuta puñunankama runapa qari kayninmanta kikillanmanta imapas lloqsiptinqa,
chay runaqa manam Tayta Diosmanqa asuykunmanchu,
payqa campamentomantam lloqsinqa,
tukuy punchawmi hawapi kanqa.
11 Tardeykuqtaña mayllakuspanmi inti seqaykuqtaña campamentoman kutiykunqa.
12 —Ispakunaykichikpaqpas kanqam sitio campamentomanta hawapi.
13 Kapusunkichiktaqmi estacaykichikpas chaywan allpata toqoykuspa chaypi ispakunaykichikpaq hinaspa chay estacawantaq hatun ispaytapas tapanaykichikpaq.
14 Yupaychasqanchik Tayta Diosmi purin campamentoykichikpi librasunaykichikpaq chaynataq enemigoykichikta vencechisunaykichikpaq chayraykum campamentoykichikqa kanqa paypaq sapaqchasqa,
mana chayqa Diosmi qamkuna ukupi ima qachatapas rikuspan qamkunamanta asurikunman.
Sirvientepa favorninpi yachachikuymanta
15 —Patronninmanta ayqekamuspan amparakamusuqniki sirviente runataqa amam chay patronninman qonkichu.
16 Qanwanmi yachanqa akllakusqan huk kaqnin llaqtaykichikpi chaynataq akllakusqan sitiopi.
Amamá pipas paytaqa ñakarichinqachu.
Chuchumikakunapa contranpi yachachikuykunamanta
17 —Israel casta runakunapa warmi churinkunamantaqa amam pipas chuchumikaqa kanqachu taytacha-mamachankuta adoranankupaqqa,
qari churinkupas amataqmi mariconqa kanqachu chaynata ruranankupaqqa.
18 Yupaychasqanchik Tayta Diospa templonmanqa amam dejankichikchu chayna millakuypaq ruraqkunapa prometekusqan ganancianku apamunankutaqa.
Chayna warmipapas-qaripapas rurayninqa Tayta Diospa millakusqanmi.
Imaymana yachachikuykunamanta
19 —Qollqetapas,
kawsaykunatapas otaq imatapas castamasikiman prestaspaqa,
amam mirayninta mañankichu.
20 Forasterokunamantam ichaqa mañawaq mirayninta.
Castamasikimantaqa amamá mañankichu.
Hinaptinqa dueñochakunaykichikpaq risqaykichik allpapim tukuy ima rurasqaykipi yupaychasqanchik Tayta Dios bendecisunki.
21 —Yupaychasqanchik Tayta Diosman prometespaqa utqayllamanmi cumplinki.
Mana chayqa pay reclamaptinmi huchallikuwaq.
22 Mana prometekuspaqa manam huchallikunkichu.
23 Ichaqa voluntadnikimanta yupaychasqanchik Tayta Diosman prometekuspaqa qonkipunim.