Rakinakuymanta yachachikuykuna
24
—Sichu pipas casarasqan warmipi ancha millakuypaq imapas rurasqanta tarispaqa rakikunanpaqmi qellqanqa papelta.
Chayta qoykuspanmi wasinmanta qarqorunqa.
2 Wasinmanta warmi lloqsikuspanqa hukwanñam casarakunman.
3 Ichaqa chay qepa qosanpas punta qosan hina millakuspaqa,
paypas rakikunanpaqmi papelta qoykunqa.
Wasinmanta qarqoruptinqa otaq chay casaraqnin qari wañuruptinqa
4 punta casaraqnin qariqa manañam yapatawanqa casaranmanchu.
Chay ruraytaqa Tayta Diosmi millakun.
Herenciaykichik kananpaq yupaychasqanchik Tayta Diospa qosunaykichik allpataqa amam huchawan millakuypaqta rurankichikchu.
Achka rikchaq yachachikuykunamanta
5 —Chayllaraq casarakuq runaqa amam guerramanqa rinqachu nitaqmi imapipas servikunqachu wata pasanankama chaynapi warminpas kusisqa kananpaq.
6 —Amam prendapiqa hapinkichu kutakunanku maraytaqa nitaq tunawnintapas,
chayqa kanman runapa vidan prendapi hapichkaq hinam.
7 —Sichu Israelpa mirayninmanta huk kaqnin runa hina castamasillanta suwarunman chay runawan servichikunanpaq otaq rantikurunanpaq hinaptinqa chay suwaq runatam wañuchinkichik.
Chaynata ruraspam chay mana allin ruraqta qamkunamanta chinkachinkichik.
8 —Lepra onqoy rikuriruptinqa Leviy castamanta sacerdotekunapa tukuy nisusqaykichiktam cumplinkichik.
Paykunaman kamachisqayta hinam rurankichik.
9 Yuyariychik Egipto nacionmanta lloqsimuspa hamuchkaptinchik Mariata yupaychasqanchik Tayta Dios imam rurasqanmanta.
10 —Runamasikiman imatapas prestaspaqa amam wasinta yaykunkichikchu prenda horqoq.
11 Hawallapi suyaptikim prendata horqomuspan qosunki.
12 Wakcha runa kaptinqa amam paqarinnintinkamaqa prendanta hatallinkichu.
13 Inti seqaykuyllatam kutiykachipunki puñuq yaykuspan chay ponchonwan qatakunanpaq.
Hinaptinqa chay runa favornikipi yupaychasqanchik Tayta Diosta mañakuptinmi chay rurasqaykiqa paypa qayllanpi allin kanqa.
14 —Mana imayoq wakcha llamkapakuq runataqa amam ñakarichinkichu.
Llaqtamasiki kaptinpas otaq llaqtaykipi yachaq forastero kaptinpas amamá ñakarichinkichu.
15 Llamkasqanmantaqa manaraqpas inti seqaykuchkaptinmi chay punchawllapi pagaykapunki.
Chay runaqa wakcha kasqanraykum chay qollqewan mantienekun,
mana chaynata ruraptikiqa Tayta Diosta qayakuptinmi huchayoq kawaq.
16 —Churi-wawankupa huchallikusqanmantaqa amam tayta-mamantaqa wañuchinkichikchu nitaqmi tayta-mamanpa huchanmantapas churi-wawankutaqa wañuchinkichikchu.
Huchallikusqankumantaqa sapakamatam wañuchinkichik.
17 —Amam engañankichikchu forastero runakunataqa nitaq mana tayta-mamayoqkunatapas.
Amataqmi viudakunapa prendantapas qechunkichikchu.
18 Yuyarinkichikmi Egipto nacionpi sirviente kachkaptikichik yupaychasqanchik Tayta Dios libramususqaykichikta.
Chayraykum kay kamachisqaykunata cumplinkichik.
19 —Kawsaykuna rutuypi huk kaqnin gavillata chakrapi qonqaruspaqa amañam hoqariq kutinkiñachu.
Chaytaqa saqerunki forastero runakuna otaq mana tayta-mamayoqkuna otaq huk kaqnin viudapas huñukunanpaqñam.
Chaynapim yupaychasqanchik Tayta Dios tukuy rurasqaykipi bendecisunki.
20 —Aceitunata pallaspaqa amañam raman-ramanqa pallapankichu.
Puchuqkunataqa saqenki forastero runakunapas,
mana tayta-mamayoqkunapas chaynataq viudakunapas pallapakunankupaqñam.