25
—Qamkunapura pleitopi kaspaqa,
cortepim arreglankichik.
Chaypi juezkuna averiguaspankum mayqanpas inocente kasqanta yachanqaku,
huchayoqtañataqmi sentencianqaku.
2 Chay huchayoqta azotenankupaq sentenciaptinkuqa,
juezmi qayllanpi pampaman chutaykachispa azotechinqa huchanman hina.
3 Tawa chunka makillatam azotechinqa,
manam mastachu,
yanqañataqmi llumpayta azoterachiptinqa chay castamasikichik runa ñakarispan despreciasqa kanman qayllaykichikpi.
4 —Erapi trillachkaq bueyestaqa amam senqapankichikchu.
Cuñadan viudawan casarakunanpaq yachachikuymanta
5 —Sichu chulla wasillapi iskay wawqekuna yachanmanku,
hinaptinñataq huk kaqnin wañukunman ichaqa wañukuqpa mana chullapas churin kaptinqa,
chay viudaqa manam casarakunmanchu huk casta runawanqa.
Chay wañukuqpa wawqenmi chay viudataqa casaranqa hinaspam paywan deberninta ruranqa.
6 Chay viudapa wawanmi wañukuq qosanpa sutinta apanqa chaynapi wañukuqpa sutin Israelpa mirayninkunamanta mana chinkananpaq.
7 Sichu chay runa cuñadanta mana casarayta munaptinqa chay viudam rinqa cortepi autoridadkunaman hinaspam paykunaman ninqa:
“Cuñadoymi mana munanchu wañukuq wawqenpa sutin Israel casta runakuna ukupi yuyarisqa kananta.
Cuñado kayninpi debernintam mana cumpliyta munanchu ñoqawan” nispa.
8 Hinaptinmi chay llaqtapi autoridadkuna chay warmipa cuñadonta qayachimuspanku paywan rimanqaku.
Sichu pay ninqa:
“Manam munanichu casarayta” nispa
9 hinaptinqa viudam payman asuykunqa ancianokunapa qayllanpi hinaspam cuñadonpa usutanta chustuspan toqaykunqa uyanman hinaspam ninqa:
“Kaynatam rurana wañukuq wawqenpa sutinta mana yuyarina munaq runataqa” nispa.
10 Hinaptinmi Israel nacionpi chay runapa ayllunta sutichanqaku:
“Usutan chustuchikuq runapa ayllunmi” nispa.
Wakin yachachikuykunamanta
11 —Sichu iskay runakuna maqanakuchkaptinku,
hukninpa warminñataq qosanta defiendenanpaq asuykuspan huknin runata qari kayninmanta hapiruptinqa
12 mana imayrikuqtapas llakipayaspam chay warmipa makinta kuchuchinkichik.
13-14 —Amam rantinkichu nitaq rantikunkichu mana cabal pesaq balanzapiqa nitaq kawsaykuna mana cabal tupunapipas.
15 Ichaqa cabal balanzapim chaynataq cabal tupunapim rantinakunki chaynapim yupaychasqanchik Tayta Diospa qosusqaykichik allpapi unayta kawsakunki.
16 Chay mana allinkunata ruraspanku runamasinku engañaqkunataqa Tayta Diosmi millakun.
Amalec casta runakunata chinkachinankumanta
17 —Yuyariychikyá Egipto nacionmanta lloqsimuptinchik ñanpi Amalec casta runakuna imam rurawasqanchikta.
18 Tayta Diostapas mana manchakuspankum qepanchik hamuq pisipasqakunata hinaspa hukmanyasqakunata hayparamuspanku wañuchirqaku.
19 Chaynaqa yupaychasqanchik Tayta Diospa dueñochakunaykichikpaq qosunaykichik allpapi llapa enemigoykichikta vencerachisuptikichikqa kay pachamantam pasaypaqta chinkachinkichik Amalec casta runakunata.
Amamá qonqarunkichikchu.