Ebal Orqopi rumikunamanta
27
Moisesmi Israel casta kamachikuq ancianokunapiwan runakunata nirqa:
—Kasukuychikyá kunan llapallan kamachisqaykunata.
2 Yupaychasqanchik Tayta Diospa qosusqaykichik allpaman yaykunaykichikpaq Jordan Mayuta chimparuspaqa hatunnin rumikunata sayarachispaykichikmi iskuwan llusinkichik.
3 Hinaspam chay llusisqa rumikunapi qellqankichik llapallan kay willasqay yachachikuykunata,
chaynataqa rurankichik yupaychasqanchik Tayta Diospa qosunaykichik allpaman yaykunapaq chimparuspaykichikmi,
chay tukuy imapapas kasqan allpataqa abuelonchikkunapa yupaychasqan Tayta Diosmi prometekuwarqanchik.
4 Chaynaqa Jordan Mayuta chimparuspaykichikmi Ebal Orqopi sayachinkichik chay nisqay rumikunata hinaspam iskuwan llusinkichik.
5-6 Chay orqopitaqmi hatarichinkichik yupaychasqanchik Tayta Diospaq rumimanta altartapas.
Chay rumikunaqa mana labrasqa rumikunam kanqa.
Yupaychasqanchik Tayta Diosmanmi chay altarpi ofrecenkichik lliw kañana ofrendata
7 chaynataq paywan allinlla kasqaykichikmanta ofrendatapas.
Yupaychasqanchik Tayta Diospa qayllanpi mikuspaykichikmi fiestata rurankichik.
8 Iskuwan llusisqa chay rumikunapim sutillata qellqankichik kay qamkunaman willasqay yachachikuykunata —nispa.
9 Chaymantam Leviy ayllu sacerdotekunapiwan Israel casta runakunata Moises nirqa:
—Israel casta runakuna,
kaytayá upallaspa uyariychik,
kunanmi yupaychasqanchik Tayta Diospa runankunaña karunkichik.
10 Chaynaqa kunan willasqay kamachikuyninkunatam chaynataq yachachikuyninkunatam kasukuspaykichik rurankichik —nispa.
Ñakaykunamanta
11 Chay punchawtaqmi runakunata Moises kamachispan nirqa:
12 —Jordan Mayuta chimparuptikichikmi Simeon ayllu,
Leviy ayllu,
Juda ayllu,
Isacar ayllu,
Josey ayllu chaynataq Benjamin ayllupas Gerizim Orqopi sayaykunqaku chaynapi runakunapaq Diospa bendicionninta mañakunankupaq.
13 Ebal Orqopipas ñakanankupaqmi sayanqaku Ruben ayllu,
Gad ayllu,
Aser ayllu,
Zabulon ayllu,
Dan ayllu chaynataq Neftaliy ayllupas.
14 Hinaptinmi Leviy ayllu casta runakuna qaparispa Israelpa mirayninkunata ninqaku:
15 “Runapa llaqllasqan taytacha-mamachata otaq fundispa rurasqan taytacha-mamachata otaq Tayta Diospa millakusqankunata pakasqapi hatalliq runaqa ñakasqayá kachun” nispa.
Hinaptinmi llapallan runakunañataq ninqa:
“Chaynayá kachun” nispa.
16 “Tayta-mamanta despreciaq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
17 “Dueñochakuykunanrayku runamasinpa linderon suchuchiq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
18 “Purikuq ñawsata ñanninmanta pantarachiq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
19 “Forasterota,
viudata,
mana piyniyoqta engañaq runaqa,
ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
20 “Taytanpa warminwan kakuq runaqa chay rurasqanwan taytanta penqayman churasqanraykuyá ñakasqa kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
21 “Warmiwan puñuq hina animalwan kaq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
22 “Mamanmanta otaq taytanmanta kaq panillanwan kakuq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
23 “Suegrallanwan kakuq runaqa,
ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
24 “Pakasqallapi runamasin wañurachiq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
25 “Inocente runata wañurachinanpaq qollqe chaskikuq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.
26 “Kay yachachikuykunata mana respetaspa mana cumpliq runaqa ñakasqayá kachun” nispa.
Hinaptinmi llapallan runakunañataq ninqaku:
“Chaynayá kachun” nispa.