Tayta Dios huktawan contrato rurasqanmanta
29
Horeb sutiyoq orqopi Israelpa mirayninkunawan Tayta Dios contratota ruraruchkaspanpas Moab nacionpiña Israelpa mirayninkuna kachkaptinkum Moisesta yapamanta kamachirqa paykunawan contrato rurananpaq.
2 Israel casta llapallan runakunata qayarachispanmá Moises nirqa:
—Egipto nacionpi kaspaykichikmi qamkuna rikurqankichik imaynatam Rey Faraonta,
serviqninkunata chaynataq chay nacionpi llapallan runankunatapas Tayta Dios castigasqanta.
3 Rikurqankichikmá chay hatun pruebakunata otaq chay admirakuypaq milagrokuna rurasqantapas.
4 Ichaqa kunankamam Tayta Dios manaraq yachayta qosurqankichikchu qawachkaspapas hinaspa uyarichkaspapas mana entiendenaykichikpaq.
5 Ñoqam pusamurqaykichik chunniqninta tawa chunka watapuni ichaqa pachaykichikpas chaynataq usutaykichikpas manam tukurqachu.
6 Manam mikurqankichikchu tantata,
manataqmi tomarqankichikchu vinota nitaq poqosqa aqatapas.
Tukuy chaykunataqa rurarqa yupaychasqanchik Tayta Dios kasqanta yachanaykichikpaqmi.
7 —Kaylaw allpaman chayaramuptinchikñataqmi Hesbon llaqtapi yachaq Rey Sehon hinaspa Basan law allpapa reynin Og lloqsimurqaku ñoqanchikwan peleananpaq aswanqa paykunatam vencerurqanchik.
8 Hinaptinmi allpankuta dueñochakuruspa qorqanchik herencia allpanku kananpaq Ruben aylluman,
Gad aylluman chaynataq Manases parten ayllumanpas.
9 Chaynaqa kay contratopa nisqantayá cumpliychik chaynapi tukuy ima rurasqaykichikpipas allinta kawsanaykichikpaq.
10 —Qamkunaqa llapallaykichikmi huñunasqa kachkankichik yupaychasqanchik Tayta Diospa qayllanpi.
Huñunasqamá kachkanku ayllukunapa jefenkunapas,
ancianokunapas,
autoridadkunapas chaynataq Israel casta llapallan runakunapas,
11 warmakunapas,
warmikunapas,
campamentopi qamkunawan yachaq forasterokunapas,
yantamuqkunapas chaynataq yaku apamuqkunapas.
12 Chayna huñunasqaqa kachkankichik yupaychasqanchik Tayta Diospa kunan contrato rurasqanman juramentowan yaykunaykichikpaqmi.
13 Chaynapim kunanmanta Tayta Diospa runankunaña kankichik.
Payñataqmi karun Diosnikichikña imaynam abuelonchik Abrahanman,
Isaacman chaynataq Jacobman jurasqanpi hina.
14 Ichaqa manam qamkunallawanchu Tayta Diosqa kay juramentowan contratotaqa ruran
15 aswanqa yupaychasqanchik Tayta Diospa qayllanpi kunan kaqkunapiwanmi.
16 Qamkunaqa yachankichikmi Egipto nacionpi imaynam kamusqanchikta,
yachankichiktaqmi hamusqanchikpi tarimusqanchik nacionkuna imaynam pasamusqanchiktapas.
17 Rikumurqanchikmi chay nacionkunapi kullumanta,
rumimanta,
qollqemanta,
qorimanta adorasqanku millakuypaq taytacha-mamachakunata.
18 Amayá qamkunapiqa kachunchu qaripas,
warmipas otaq pi familiapas otaq pi ayllupas,
chay nacionkunapa taytacha-mamachankuta adoraspanku yupaychasqanchik Tayta Diosmanta rakikuqkunaqa.
Yanqañataqmi qamkuna ukupiqa karunman hayaq otaq qatqe plantapa sapin hina runakuna.
19 —Sichum chayna runa kay contratopi kaq ñakaykunata uyarichkaspan sonqonpi alabakunman:
“Rumi sonqo kaspay munasqallayta rurakuptiypas tukuy imam allinpuni lloqsiwanqa” nispa.
Chayna runaqa llapallan runakunatam urmarachinqa.
20 Chay runataqa manam Tayta Diosqa pampachanqachu aswanqa paypa contranpi sientekuruspanmi anchata piñakurunqa chaynapim kay libropi qellqasqa kaq ñakaykuna payman chayaramunqa,
paytaqa Tayta Diosmi manaña pipapas yuyarinanta kay pachamanta chinkachinqa.
21 Israelpa miraynin llapallan ayllukunamanta chay runata Tayta Dios rakiruspanmi ñakariykunawan castiganqa,
payqa castigasqa kanqa kay yachachikuy libropi qellqasqa contratopi llapallan ñakaykunaman hinam.
22 Miraynikichikkunam otaq hamuq wiñaykunam chaynataq karu nacionkunamanta hamuqkunam qawanqaku chay castigokunata hinaspa nacionnikichikman Tayta Diospa kachamusqan onqoykunatapas.
23 Qawanqakutaqmi chay allpaqa azufreyoq,
kachiyoq hinaspa kañasqa allpa kasqanta.
Mana tarpuna allpam kanqa.
Manataqmi imapas ikllinqachu,
manam qorallapas wiñanqachu.
Sodoma,
Gomorra,
Adma chaynataq Zeboim llaqtakunapa kasqan allpakuna hinam kanqa.
Chay llaqtakunatam Tayta Dios anchata piñakuspan chinkarachirqa.
24 —Hinaptinmi llapallan nacionkunapi yachaq runakuna ninqaku:
“¿Imanasqataq Tayta Diosqa kay allpata kaynataqa castigarun?
¿Imanasqataq kayna llumpa-llumpaytaqa piñakurun?”
nispa.
25 Chaymi paykunaman contestanqaku:
“Abuelonkupa yupaychasqan Tayta Diosmi Egipto nacionmanta horqomuspa paykunawan contratota rurarqa,
chay contratota saqerusqankuraykum paykunaqa chayna kachkanku.
26 Paykunaqa taytacha-mamachakunatam adorarqaku hinaspam mana reqsisqanku taytachakunapa ñawpaqninpi qonqorakurqaku.
Chay taytachakunataqa manam Tayta Dioschu qorqa.
27 Chayraykum Tayta Dios piñakururqa nacionninkupa contranpi hinaspam libronkupi qellqasqa tarikuq llapallan ñakaykunata paykunaman apamurqa.
28 Anchallataña Tayta Dios piñakuruspanmi allpankumanta qarqorurqa,
paykunataqa llumpa-llumpay rabiawanmi kunan qawasqaykichikpi hina huklaw nacionkunamanña wischurun” nispa.
29 —Kanmi mana yachasqanchik pakasqa asuntokuna,
chaykunataqa yachan yupaychasqanchik Tayta Diosllam.
Chaywanpas kantaqmi ñoqanchikman chaynataq churinchikkunamanpas wiñaypaq reqsichisqan asuntokuna chaynapi kay llapallan yachachikuykunata cumplinanchikpaq.