Imaraykum Tayta Diospa bendecisqan kanankumanta
30
—Akllakunaykichikpaq tukuy willasqay Diospa bendicionninpas otaq ñakayninpas qamkunaman hamusuptikichikqa yupaychasqanchik Tayta Diospa qarqosusqaykichik nacionkunapi kaspaykichikmi yuyaymanankichik.
2 Sichu qamkunapas chaynataq churikichikkunapas yupaychasqanchik Tayta Diosman kutirikuspa tukuy sonqoykichikwan,
tukuy vidaykichikwan kunan kamachisqaykunata kasukuptikichikqa
3 yupaychasqanchik Tayta Diosmi kutichimusunkichik preso kasqaykichikmanta hinaspam llakipayarisunkichik.
4 Karu-karu nacionkunamanña qarqosqa kaptikichikpas chaykunamantaraqmi yupaychasqanchik Tayta Dios kutichimusunkichik.
Chaymantaraqmi payqa hoqarimusunkichik.
5 Abueloykichikkunapa dueñochakusqan allpamanmi yupaychasqanchik Tayta Dios kutichimusunkichik hinaptinmi kaqllamanta qamkunapaq kanqa.
Tukuy imapi allinta kawsachisunaykichikpaqmi abueloykichikkunamantapas mastaraq mirachisunkichik.
6 Yupaychasqanchik Tayta Diosmi qamkunatapas chaynataq miraynikichiktapas kasukuq sonqotaña ruranqa chaynapi tukuy sonqoykichikwan,
tukuy vidaykichikwan payta kuyanaykichikpaq hinaspa kawsanaykichikpaq.
7 Hinaptinmi yupaychasqanchik Tayta Dios ñakaykunawan enemigoykichikta castiganqa,
castiganqataqmi cheqnisuspaykichik ñakarichisuqnikichik runatapas.
8 Qamkunañataqmi Tayta Diosman kutirikuspa kasukunkichik,
cumplinkichiktaqmi kunan willasqay llapa kamachikuykunatapas.
9 Hinaptinqa yupaychasqanchik Tayta Diosmi tukuy rurasqaykichikpi allinta kawsachisunkichik chaynapim achka churiyoq,
achka animalniyoq hinaspa achkallaña cosechayoq kankichik.
Tayta Diosqa abueloykichikkunata favorecespan kusikusqanpi hinam qamkunata favorecespanpas kaqllamanta kusikunqa.
10 Chaynataqa kusikunqa yupaychasqanchik Tayta Diosta kasukuptikichikmi chaynataq kay yachachikuy libropi qellqasqaman hina kamachikuyninkunata,
decretonkunata cumpliptikichikmi,
payqa kusikuntaqmi tukuy sonqoykichikwan hinaspa tukuy vidaykichikwan payman kutirikuptikichikqa.
11 —Kunan kay kamachikuykuna qamkunaman nisqayqa manam llumpay sasachu nitaqmi qamkunamanta karupichu kachkan.
12 Manam cielopichu kachkan,
manam niwaqchikchu:
“¿Pitaq cielota seqaruspan aparamunman hinaspa yachaykachiwachwan chaykunata cumplinanchikpaq?”
nispa.
13 Nitaqmi lamar qochapa waklaw chimpanpichu kachkan.
Manam niwaqchikchu:
“¿Pitaq chimparuspan aparamunman hinaspa yachaykachiwachwan chaykunata cumplinanchikpaq?”
nispa.
14 Aswanqa chay kamachikuykunaqa cumplinaykichikpaqmi kachkan hichpallaykichikpiña,
simillaykichikpiña chaynataq sonqollaykichikpiña.
15 —Akllakuychikyá,
kunanmi ñoqa churapamuykichik allin kaqta kawsanaykichikpaq,
mana allin kaqtañataq wañunaykichikpaq.
16 Sichu kunan kamachisqaypi hina kasukuspaykichik yupaychasqanchik Tayta Diosta kuyaspaykichikqa,
munasqanman hina kawsaspaykichikqa chaynataq kamachikuyninkunata,
decretonkunata chaynataq reglamentonkunatapas cumplispaykichikqa kawsaspam achkallaña mirayniyoq kankichik,
chaynapitaqmi yupaychasqanchik Tayta Diosqa dueñochakunaykichik allpapi bendecisunkichik.
17 Ichaqa tukuy kay nisqaykunata mana kasukuspa taytacha-mamachakunaman qonqorakuspa adoranaykichikpaq karunchakuptikichikqa
18 kunanpunim ñoqa willaykichik:
Jordan Mayuta chimparuspa dueñochakunaykichik allpaman yaykuruspaqa chinkarunkichikpunim,
chaypiqa manam unaypaqchu kawsankichik.
19 Kawsayta otaq wañuyta otaq bendecisqa kayta otaq ñakasqa kayta akllakunaykichikpaq qamkunaman nisqaymantam contraykichikpi testigo kananpaq cielokunatawan kay pachata kunan churani.
Chaynaqa qamkunapas hinaspa miraynikichikkunapas kawsakunaykichikpaqyá akllakuychik.
20 Yupaychasqanchik Tayta Diosta kuyaspayá kasukuychik hinaspataqyá paymantaqa amapuni kacharikuychikchu.
Paymiki qamkunata kawsachisuqnikichikqa chaynataq unay kawsachisuqnikichikpas,
chaynapim unay watakuna yachakunkichik abuelonchik Abrahanman,
Isaacman hinaspa Jacobman Tayta Diospa jurasqan allpapi.