2 —Ñoqaqa pachak iskay chunkan watayoqñam kachkani,

manañam kallpay kanñachu maylawman rinaypaqpas.

Tayta Diospas niwarqataqmi Jordan Mayuta manaña chimpanaypaq.

3 Chaywanpas yupaychasqanchik Tayta Diosmi ñawpaqnikichikta rispan chay risqaykichikpi nacionniyoq runakunata chinkachinqa chaynapi paykunapa allpanta dueñochakunaykichikpaq.

Josueymi pusasunkichik Tayta Diospa nisqanpi hina.

4 Tayta Diosmi chay nacionkunata chinkachinqa Amor casta runakunapa reynin Sehonta hinaspa Rey Ogta hina chaynataq paykunapa nacionnintapas chinkachisqanpi hina.

5 Chay nacionkunata Tayta Dios vencerachisuptikichikqa tukuy kamachisqayta hinam paykunawan rurankichik.

6 Kallpanchakuspayá qarinchakuychik.

Amayá paykunataqa manchakuychikchu hinaspapas amataqyá katkatataychikchu,

yupaychasqanchik Tayta Diosmi qamkunawan richkan,

manam payqa saqerusunkichikchu nitaqmi dejarusunkichikchu.

7 Chaymantam Josueyta Moises qayaspan Israel llapallan castakunapa qayllanpi nirqa:

—Kallpanchakuspayá qarinchakuy,

qanmi kay runakunata pusanki abuelonchikman Tayta Dios qonanpaq jurasqan allpaman hinaspam paykunaman qonki dueñochakunankupaq.

8 Tayta Dios ñawpaqnikita rispanmi qanwan kanqa.

Manam saqesunkichu nitaqmi dejarusunkichu,

chaynaqa ama manchakuychu nitaq hukmanyaychu —nispa.

9 Moisesmi qellqarqa kay yachachikuyta hinaspam qorqa Tayta Diospa contraton baul apaq Leviy casta sacerdotekunaman chaynataq Israelpa llapallan ancianonkunamanpas.

10-11 Paykunata kamachispanmi nirqa:

—Libre kacharina sapa qanchis wata tukuytam,

Ramadakuna Fiestapi leenkichik kay yachachikuykunamanta librota.

Chaynataqa leenkichik Israel casta llapallan runakunata yupaychasqanchik Tayta Diospa qayllanpi huñuruspaykichikmi.

Tayta Diospa akllasqan sitiopimá leenkichik paykuna uyarinanpaq.

12 Huñunkichikmá llapallan runakunata.

Qaritapas-warmitapas,

wawakunatapas chaynataq qamkunawan yachaq forasterokunatapas chaynapi leesqanku yachachikuykunata uyarinankupaq chaynapitaq yupaychasqanchik Tayta Diosta respetanankupaq chaynataq chay yachachikuykunata kasukunankupaq.

13 Chaynapimá chay yachachikuykuna manaraq yachaq churikichikkunapas chaykunata uyarispanku yupaychasqanchik Tayta Dios respetayta yachanqaku.

Paytaqa respetanqaku Jordan Mayuta pasaspa dueñochakunaykichik allpapi kawsananku punchawkamam.

14 Tayta Diosmi Moisesta nirqa:

—Wañukunayki punchawmi hichpamuchkanña chaynaqa Josueyta qayamuspaykiyá paywan kuska riy asuykamuwanaykichik karpaman,

chaypim payman kamachisaq —nispa.

Chaynapimá Moiseswan Josuey rispanku sayarqaku Tayta Diosman asuykuna karpapa kasqanpi.

15 Chaypim Tayta Dios paykunaman rikuriykurqa sayaq puyupi,

chay sayaq puyuqa sayaykurqa karpapa punkunpim.

16 Hinaptinmi Moisesta Tayta Dios nirqa:

—Qamqa wañukunkiñam,

ichaqa kay runakunaqa chay rinanku allpapim pierdekuq casada warmi hina mana reqsisqanku dioskunataña qatinqaku hinaspam dejaruwaspanku paykunawan rurasqay contratoytapas mana cumplinqakuchu.

17 Hinaptinmi paykunapa contranpi piñakuruspay paykunata dejarusaq.

Paykunataqa qepanchakuruptiymi puchukaytaña qallaykunqaku.

Paykunaqa hatun sasachakuypi hinaspa ñakariypi kaspankum ninqaku:

“Kay ñakariykunaqa hamuwanchik Tayta Dios manaña ñoqanchikwan kasqanraykum” nispa.

18 Ichaqa chayna ñakariy tiempo chayaramuptinqa astawanraqmi paykunata qepanchakurusaq,

chaynataqa rurasaq tukuy mana allinkuna rurasqankuraykum chaynataq taytacha-mamachakunataña adorasqankuraykum.

19 —Kunanyá kay takita qellqaspa yachachiychik Israelpa mirayninkunaman chaynapi takinankupaq chaynataq Israelpa mirayninkunapa contranpi testigo hina kananpaq.

20 Abueloykichikkunaman juramentowan prometesqay tukuy imapapas kasqan allpaman paykunata yaykuchiptiymi saksanankukama mikuspa wirayanqaku ichaqa karunchakuruspam mana reqsisqanku taytacha-mamachakunataña adoranqaku.

Ñoqata despreciawaspankum contratoytapas mana kasukunqakuchu.

21 Chay hatun sasachakuykunapi chaynataq ñakariykunapi rikuriptinkum kay taki kanqa testigo hina chaymi mirayninkupas takispanku mana qonqanqakuchu.

Ñoqaqa yachaniñam jurasqay allpaman manaraq yaykuchkaspanku imam piensasqankutapas —nispa.

22 Chay punchawmi Moises qellqarqa kay takita hinaspam Israelpa mirayninkunaman yachachirqa.

23 Nunpa churin Josueyta Tayta Dios kamachispam kaynata nirqa:

—Kallpanchakuspayá qarinchakuy,

qanmi yaykuchinki Israelpa mirayninkunata jurasqay allpaman,

ñoqam qanwan kasaq —nispa.

24 Chay yachachikuykunata Moises qellqayta tukuruspanñataqmi

25 Tayta Diospa contraton baul apaq Leviy casta runakunata nirqa:

26 —Kay yachachikuykuna librota churaychik yupaychasqanchik Tayta Diospa contraton baulpa ladonman.

Chaypiyá kachun contraykichikpi testigo kananpaq.

27 Ñoqaqa yachanim qamkunaqa mana kasukuq hinaspa rumi sonqo runakuna kasqaykichikta.

Qamkunawanraq kunan kachkaptiypas Tayta Diostam mana kasurqankichikchu.

Wañuruptiyqa aswanñachiki mana kasukunkichikchu.

28 Huñumuychikyá castaykichikkunapa llapallan ancianonkunatawan autoridadkunata,

paykuna uyarichkaptinkum kaykunamanta rimaspay paykunapa contranpi cielotawan kay pachata testigota hina churasaq.

29 Wañuruptiyqa cheqaptapunipas pierdekuruspaykichikmi kamachisqayman hina kawsaymantapas karunchakurunkichik.

Yachanitaqmi Tayta Diospa qayllanpi mana allinkunata ruraspa payta piñachinaykichikmantapas,

chayraykum hamuq punchawkunapi castigasqa kankichik.

30 Hinaptinmi Israel casta llapallan runakunapa qayllanpi Moises rimarirqa qallariyninmanta tukuyninkama kayna niq takita: