32
¡Cielokuna,
rimarisqayta uyariy!
¡Kay pacha,
rimarisqayta uyariy!
2 Para hinam chayaypaq-chayamunqa yachachikuyniyqa.
Sulla hinam wichiypaq-wichimunqa rimasqayqa.
Chayamunqaqa lliwapa hawanman paramuchkaq hinam.
Wichimunqaqa pastopa hawanman paramuchkaq hinam.
3 Ñoqaqa qayakusaqmi Tayta Diosta.
Hatunchaychikyá Diosninchikta.
4 Payqa hatun rumi hina amparaqninchikmi.
Paypa rurasqankunaqa alli-allinmi.
Llapallan arreglokuna rurasqanqa alli-allinmi.
Payqariki confiakunapaq Diosmi.
Paypiqa manam kanchu mana allinqa.
Allinninpi derecho ruraqmi payqa.
5 Diosta piñachiq runakunam qamkunaqa kankichik.
Manam qamkunaqa Diospa churinchu kankichik.
Chayraykum qamkunaqa penqaypi kachkankichik.
Karunchakuruspa pierdekuq miraymi qamkunaqa kankichik.
6 Yaw mana yuyayniyoq runakuna,
yaw mana yachayniyoq runakuna
¿chaynatachu Tayta Diosman pagapunkichik?
¿Manachum payqa taytaykichik?
¿Manachum payqa unanchasuqnikichik?
Payqa qamkunata rurasuqnikichikmi.
Payqa qamkunata takyachisuqnikichikmi.
7 Yuyariychikyá ñawpaq tiempokunamanta.
Piensariychikyá ñawpaq watakunapi achka miraykunamanta.
Tapurikuychikyá abueloykichikkunata
hinaptinqa paykunam willasunkichik.
Tapurikuychikyá yuyaqkunata
hinaptinqa paykunam nisunkichik.
8 Alto-altopi kaq Diosmi
nacionkunaman herenciata qorqa.
Alto-altopi kaq Diosmi
runakunata rakinarqa.
Chay nacionkunapa linderonkunatam churarqa.
Israelpa mirayninkunaman hinam rakirqa.
9 Tayta Diospa kapuqninqa chay runankunallam.
Paypa herencianqa Jacobpa mirayninkunallam.
10 Paykunatam tarirqa chunniq allpapi.
Paykunatam tarirqa wayrapa pukunan chaki allpapi.
Marqayninpi aparikamuspanmi yachachirqa paykunata.
Ñawi rurunta hinam cuidarqa paykunata.
11 Mallqonkunata pawachinanpaq rikchachiq aguila hinam,
qestanpa altonpi muyurichkaq aguila hinam,
mana wichiykachinanpaq raprankunata mastarichkaq hinam,
mallqonkunata purankunapi apamuchkaq aguila hinam
12 Tayta Diosqa paykunata pusamurqa.
Paykunataqa manam sapaq dioschu yanapamurqa.
13 Paykunataqa pusamurqa alto orqonkunatam.
Paykunamanqa mikuchimurqa allpapa rurunkunatam.
Mielta soqonankupaqpas qaqamantam horqorqa.
Aceitenkutapas raqchi rumimantam horqorqa.
14 Vacakunamanta horqospam llukllutapas mikuqku.
Ovejakunamanta horqospam lechetapas tomaqku.
Allinnin malta carnerokunatam
paykunaman mikuchimuq.
Basan lawmanta carnerokunatawan chivatokunatam
paykunaman mikuchimuq.
Allinnin trigotam paykunaman mikuchimuq.
Uvaspa zumon vinotam tomachimuq.
15 Ichaqa Jesurun sutiyoq runakunaqa wirayaruspankum
haytakuqllaña rikurirurqaku.
Wirankunawanpas wiswirinankukamam
anchallataña wirayarurqaku.
Unanchaqninku Diosninkutam saqerurqaku.
Hatun rumi hina amparaqninkutam despreciarqaku.
16 Mana reqsisqanku dioskunata adoraspankum
sientichirqaku Diosta.
Millakuypaq taytacha-mamachakunata adoraspankum
rabiachirqaku Diosta.
17 Demoniokunapaqmi animalkunata wañuchipurqaku.
Chay demoniokunaqariki manam dioschu kanku.
Mana reqsisqanku dioskunapaqmi chayta rurarqaku.
Rurarqakuqa chayraq rikurimuq taytacha-mamachakunapaqmi.
Rurarqakuqa abuelonkupa mana haykapipas adorasqankupaqmi.
18 Yaw Israelpa mirayninkuna,
amparaqnikichik taytaykichiktam qonqarunkichik.
Yaw Israelpa mirayninkuna,
kawsay qosuqnikichik Diostam qonqarunkichik.
19 Chaykunata rikuspanmi Tayta Dios millakururqa.
Churinkuna piñachisqankuraykum millakururqa.
20 Chayraykum Tayta Dios nirqa:
“Paykunata qepanchakuruptiyqa imatas ruranqaku.
Paykunaqa mana allin ruraqkunam kanku.
Paykunaqa mana confiakuna churikunam kanku.
21 Taytacha-mamachakunata adoraspankum sientichiwarqaku.
Mana valeq imagenkunata adoraspankum piñachiwarqaku.
Chayraykum ñoqapas paykunata sientirachisaq.
Mana valeq runakunawanmi sientirachisaq.
Mana umayoq runakunawanmi piñarachisaq.
22 Piñakuyniymi nina hina ruparirun.
Uku pachapa uku-ukunkamam ruparirun.
Allpatapas kawsaynintintam tukurunqa.
Orqokunapa tiyasqankamam ratarirunqa.
23 Tukuy mana allinkunatam montoykamusaq.
Flechaykunatam paykunaman chayachimusaq.
24 Paykunaqa yarqaymantam wañurunqaku.
Puchukachikuq calenturawanmi wañurunqaku.
Millay peste onqoywanmi tukurunqaku.
Kachukuq purun animalkunatam kachaykamusaq.
Allpapi puriq venenoyoq culebrakunatam kachaykamusaq.
25 Guerrapim churinkupas wañunqaku callekunapi.
Mancharisqallañam kanqaku wasinku ukupi.
Mozokunapas doncellakunapas wañunqakum.
Ñuñuq wawakunapas yuyaqkunapas wañunqakum.
26 Paykunataqa ñutuparunaypaqmi piensarqani.
Manaña yuyarisqa kanankupaq chinkarachiytam piensarqani.
27 Ichaqa manam munarqanichu enemigonpa burlakunanta
chaynataq contrankupi kaqkuna yanqa piensananta:
‘Kallpallanchikwanmi kaytaqa rurarunchik’ nispa.
‘Kaykunataqa manam Tayta Dioschu rurarun’ nispa.”
28 Israel castaqa mana consejaqniyoqñam kachkan.
Israel castaqa mana entiendeqñam kachkan.
29 Yachayniyoq kaspankuqa musyakunmankuch,
imaman chayanankutapas entiendenmankuch.
30 ¿Chullallaqa waranqa runata ayqerachinmanchum?
¿Iskayllaqa chunka waranqa runata lluptirachinmanchum?
Arí,
amparaqninku Dios rantikuruptillanmi.
Arí,
enemigonkuman Tayta Dios entregaykuptillanmi.
31 Manam amparaqninchik hinachu amparaqninkuqa.
Chaytaqa allintam yachanku enemigonchikkunaqa.
32 Uvas plantankupas Sodoma lawpa uvasnin hinam.
Paykunapa uvas plantanqa Gomorra chakrapi uvas hinam.
Paykunapa uvasninkuqa venenoyoq uvaskunam.
Paykunapa uvas wayunkuqa qatqe uvaskunam.
33 Culebrapa venenon hinaraqmi vinonkupas.
Runa wañuchiq culebrapa venenon hinaraqmi vinonkupas.
34 Tayta Diosmi nirqa:
“Tukuy kaykunatam waqaychachkani.
Tesoro waqaychanaypim waqaychachkani.
35 Mana allin ruraqkunataqa ñoqallam castigasaq.
Mana allin rurasqankuman hinam pagapusaq.
Paykunapaqa urmananku punchawmi hamuchkanña.
Chinkachisqa kananku punchawmi hichpaykamuchkanña.
Chinkachisqa kananku horam utqaykamuchkanña.”
36 Tayta Diosmi runankunapaq allin arreglota ruranqa.
Tayta Diosmi siervonkunata llakipayarinqa.
Mana kallpayoqta rikuspanmi llakipayarikunqa.
Sirvientepas manaña kaptinmi llakipayarikunqa.
Librepas manaña kaptinmi llakipayarikunqa.
37 Hinaptinmi Tayta Dios ninqa:
“¿Maytaq paykunapa diosninkuqa?
¿Maytaq confiakunanku amparaqninkuqa?
38 ¿Maytaq ofrecesqanku wirakuna mikuq taytachankuqa?
¿Maytaq vino tallipusqanku tomaq taytachankuqa?
Hatarichunkuyá yanapasunaykichikpaq.
Hatarichunkuyá pakasunaykichikpaq.
39 Yachaychikyá,
ñoqallam kani Diosqa.
Manam kanchu ñoqamanta huk sapaq Diosqa.
Ñoqallam wañuchinipas hinaspa kawsachinipas.
Ñoqallam heridanipas hinaspa hampinipas.
Manam pipas libranmanchu ñoqapa makiymantaqa.
40 Cieloman makiyta haywarispaymi jurani.
Wiñaypaq kawsaq Dios kaspaymi jurani:
41 Espadayta llipipipinankama filochaykuspayqa,
sentencia ruranaypaq espadayta hapiykuspayqa,
enemigoykunatam castigarusaq
Cheqniwaqniykunamanmi pagapusaq.
42 Flechaykunatam yawarninkuman chapuparusaq.
Espadaywanmi paykunata wañurachisaq.
Wañuqkunapapas yawarninpim chapuparusaq.
Presokunapapas yawarninpim chapuparusaq.
Enemigonkunapa jefenkunapa yawarninpim chapuparusaq.”
43 Nacionkuna,
kusikuychikyá runankunamanta.
Paymi castigan sirvientenkuna wañuchisqa kasqanmanta.
Enemigonkunatam castiganqa.
Allpantam chuyanchanqa.
Runankunatam pampachanqa.
Wañukunallanpaqña Moises imam kunasqanmanta
44-45 Israelpa mirayninkunapa qayllanman Moises hamuruspanmi Nunpa churin Josueypiwan chay takita rimarqaku qallariyninmanta tukuyninkama.
46 Israelpa mirayninkunatamá kaynata nirqa:
—Kunan tukuy chay testificaspay nisqaykunatayá yuyaymanaychik.
Churikichikkunatayá kamachiychik kay yachachikuykunata kasukuspa cumplinankupaq.
47 Manam kay palabrakunaqa yanqachu aswanqa kawsachiqnikichikmi.
Kay yachachikuykunaraykum unay watakunata kawsakunkichik chayanaykichik allpapi,
Jordan Mayuta pasaspam allpata dueñochakunkichik —nispa.
Prometesqan allpata Moisesman Dios qawachisqanmanta
48 Hina chay punchawllapim Moisesta Tayta Dios rimapayaspan nirqa:
49 —Moab runakunapa allpanpi,
Jerico llaqtapa chimpanpi kaq Abarim Orqokunaman rispaykiyá seqay Nebo Orqoman,
chaymantam qawarinki Israelpa mirayninkunaman dueñochakunankupaq qonay Canaan allpata.
50 Chay seqasqayki orqopim wañukunki hinaspam abueloykikunapa kasqanman rinki,
imaynam wawqeki Aaronpas Hor Orqopi wañukuspan abueloykikunapa kasqanman risqanpi hina.
51 Qamkunaqa iskaynikichikmi huchallikuwarqankichik Israelpa mirayninkunapa qayllanpi,
Meriba-cades sitiopi.
Zin sutiyoq chunniqpimá Israelpa miraynikunapa qayllanpi mana confiakuwarqankichikchu chuya kasqayta yachanaykichikpaq.
52 Chimpallanmantam qawarinki chay allpataqa,
manam yaykunkichu Israelpa mirayninkunaman qonay allpamanqa.