Israel castakunata Dios bendecinanpaq Moises rimarisqanmanta
33
Diospa runan Moisesmi manaraq wañukuchkaspan Israelpa mirayninkunata Dios bendecinanpaq rimarispan kaynata nirqa:
2 Tayta Diosmi Sinai Orqomanta hamurqa.
Seir Orqomantam inti hina achikyamurqa.
Kancharimurqam Paran sutiyoq orqomanta.
Wara-waranqa sapaqchasqankunawanmi payqa hamurqa.
Rupachkaq ninata hinam decretonkunata apamurqa.
3 Dios Taytalláy,
qamllam runaykikunataqa kuyanki.
Llapallan sapaqchakusqaykikunatam waqaychanki.
Paykunaqa ñawpaqnikipim qonqorakuykunku.
Paykunaqa kamachisqaykikunatam kasukunku.
4 Ñoqaman qowasqayki yachachikuytam kasukunku.
Jacob castakunapa herencian kamachikuytam kasukunku.
5 Jesurun sutiyoq runakunapim munaychakurqanki.
Kamachiqninkuna huñunakuptinmi munaychakurqanki.
6 Dios Taytalláy,
Ruben ayllu runakunapaqmi mañakuyki:
Ruben aylluqa kawsakuspayá ama chinkaruchunchu.
7 Dios Taytalláy,
Juda ayllu runakunapaqmi mañakuyki:
Juda ayllupa mañakusqantayá uyariykuy.
Runankunapa kasqanmanyá pusarikuy.
Paykunapaqyá atiynikiwan peleaykuy.
Enemigonkunapa contranpiyá yanapaykuy.
8 Dios Taytalláy,
Leviy ayllu runakunapaqmi mañakuyki:
Tumim sutiyoq rumikiqa kachun qanman sonqo runapaqyá.
Urim sutiyoq rumikiqa kachun qanman sonqo runapaqyá.
Masa sutiyoq sitiopim paykunata pruebaman churarqanki.
Meriba sutiyoq yakupa kananpim atipanakurqanki.
9 Paykunam tayta-mamanmanta nirqaku:
“Tayta-mamaykutaqa manam rikurqanikuchu” nispa.
Paykunam wawqenkumanta nirqaku:
“Wawqeykutaqa manam reqsirqanikuchu” nispa.
Churinkutapas manam reqsirqakuchu.
Paykunaqa palabraykitam kasukurqaku.
Paykunaqa contratoykitam waqaycharqaku.
10 Jacob casta runakunamanmi
yachachinqaku reglamentoykikunata.
Israel casta runakunamanmi
yachachinqaku yachachikuynikikunata.
Ñawpaqnikipim inciensota ratachipusunki.
Altarnikipim lliw kañana ofrendata kañapamusunki.
11 Dios Taytalláy,
paykunapa kallpantayá yapaykuy.
Llamkasqankutayá agradowan chaskiykuy.
Enemigonkutapas waqtanpiyá waqtaparuy.
Cheqniqninkunatapas manaña sayarinankupaqyá waqtaparuy.
12 Dios Taytalláy,
Benjamin ayllu runakunapaqmi mañakuyki:
Kuyasqaykikunaqa confiakuspayá hawka kawsakuchunku.
Altopi kaqpa waqaychasqanmi sapa punchaw kachkanku.
Kuyasqayki runakunaqa marqaynikipim kawsakuchkanku.
13 Dios Taytalláy,
Josey ayllu runakunapaqmi mañakuyki:
Paykunapa allpankutaqa qamyá rurunanpaq bendeciykuy.
Cielokunamanta hamuq allinnin sullawanyá bendeciykuy.
Allpapa ukunpi kaq yakuwanyá bendeciykuy
14 chaynataq intipa rupayninwan poqoq rurukunawanpas
hinaspa killapa qespichisqan rurukunawanpas,
15 ñawpaqmantaraq kaq moqokunapi qespiqkunawanpas
chaynataq wiñaypaq waqtakunapi qespiqkunawanpas
16 chaynataq kay pachapas huntariq allinnin kaqkunawanpas
hinaspa tankar kichkapi kaqpa favorninwanpas.
Chaykunawanyá Joseypa castankuna favorecesqa kachun.
Wawqenkuna kamachiqpa castankunayá favorecesqa kachun.
17 Joseyqa karqa vacapa punta wawan hina sumaqllañam.
Joseyqa karqa waqrasapa monte toro hina kallpasapallañam.
Waqrapachkaq toro hinam nacionkunata venceparunqa.
Kay pachapa cantonkamam payqa venceparunqa.
Chaynam Efrain ayllu wara-waranqa runakunaqa.
Chaynam Manases ayllu waranqantin runakunaqa.
18 Dios Taytalláy,
Zabulon ayllu runakunapaqmi mañakuyki:
Zabulon aylluqa kusikuchunkuyá
maymanña rispapas.
Isacar aylluqa kusikuchunkuyá
maypiña karpanta sayachispapas.
19 Yachananku orqomanmi runakunata qayanqaku.
Allin rurasqankumantam animalkunata ofrecenqaku.
Lamar qochapi tukuy ima kaqkunawanmi apuyanqaku.
Lamar qochapa aqonpi pakasqa tesorokunawanmi apuyanqaku.
20 Dios Taytalláy,
Gad ayllu runakunapaqmi mañakuyki:
Qamyá alabasqa kay.
Gad ayllupa allpan hatunyachisqaykimantayá alabasqa kay.
Gad aylluqa animalta suyachkaq leon hinam suyachkan.
Brazonta otaq umanta qechuruq leon hinam suyachkan.
21 Paykunaqa allinnin allpatam hapikuykurqaku.
Kamachiqkunapa tocanciantam akllakuykurqaku.
Runakunapa kamachiqninkuna huñunakuptinmi
qam Tayta Diospa imam munasqaykita cumplirqaku.
Israel castakunapaq allin arregloykiman hinam cumplirqaku.
22 Dios Taytalláy,
Dan ayllu runakunapaqmi mañakuyki:
Dan ayllu runakunaqa malta leon hinam.
Paykunaqa kanku Basan lawmanta pawamuq leon hinam.
23 Dios Taytalláy,
Neftaliy ayllukunapaqmi mañakuyki:
Neftaliy aylluqa anchallaña bendecisqaykim kachkanku.
Paykunaqa tukuy imawan bendecisqaykim kachkanku.
Surlawpi allpatam Kachi Qochakama dueñochakunqaku.
24 Dios Taytalláy,
Aser ayllu runakunapaqmi mañakuyki:
Paykunaqa wakinmantapas aswan bendecisqayá kachunku.
Paykunaqa castamasinkunapapas bendecisqanyá kachunku.
Paykunaqa chakinkutapas aceitewanraqyá mayllachunku.
25 Paykunapaqa cerrojonkupas fierromantaraqmi kanqa.
Paykunapaqa cerrojonkupas broncemantaraqmi kanqa.
Paykunapaqa wañukunankamam kallpankupas kanqa.
26 Jesurun runakuna,
manam pipas Diosnikichik hinaqa kanchu.
Yanapasunaykichikpaqmi cielokunapa hawanpi purichkan.
Payqa kancharistinmi puyu hawanta hamuchkan.
27 Wiñaypaq kawsaq Diosmi pakakunayki wasiqa.
Wiñaypaq atiyninwanmi marqasunki payqa.
Ñawpaqnikichikpi kaq enemigoykichiktam wischunqa.
Enemigoykichikta chinkachinaykichikpaqmi kamachikunqa.
28 Israel castakunaqa paypi confiakuspam kawsakunkichik.
Jacobpa castakunaqa sapallaykichikmi kawsakunkichik.
Trigopapas vinopapas kanan allpapim yachakunkichik.
Cielopapas sulla chayachimunan allpapim yachakunkichik.
29 ¡Yaw Israelpa mirayninkuna,
mayna kusisqam kankichik!
¿Pimá qamkuna hinaqa?
Qamkunaqa Tayta Diospa librasqan runakunam kankichik.
Paymi harkachikuna hina yanapaqnikiqa.
Paypa espadanpim kachkan atiynikiqa.
Enemigoykikunaqa ñawpaqnikipi humillasqam kanqa.
Wasa orqonkupas qamkunapa sarupasqaykichikmi kanqa.