3 Un von Gott sien Troon em Himmel, hieed ekj ne lude Stemm räden, un dee säd, "Kjikj emol! Nu haft de niee Jerusalem sikj opp de niee Ieed jesat, un soo stalt Gott sien Tus mank Menschen opp. Nu woat Gott mank de Menschen opp de niee Ieed wonen, un nu woaren see aula siene Velkja sennen. Un Gott woat selfst met äant toop Jemeentschoft han, un see woaren am perseenlich aunbäden un ieren. 4 Un Gott woat äant treesten, un äant de Tronen aula vom Jesecht weschen. Un kjeena woat jeemols wada stoawen, ooda truaren, ooda ut Angst schrieen, ooda Weedoag han, wiel en de niee Staut von Jerusalem, woat aul soont nich mea sennen."

5 Un de Stemm dee von Gott sien Troon jerät haud, räd wieda un säd, "Kjikj emol, ekj moak aules nie, waut ekj aum Aunfank mol erschaufen haud." Un hee säd to mie, "Schriew dit mau aula dol, waut ekj die jrod jesajcht ha, wiel eena kaun sikj doaropp veloten, daut aules nochmol krakjt soo passieren woat, aus ekj die daut jrod beschräwen ha."

6 Un de Stemm räd wieda, un säd, "Un wan ekj aules soo aus dit ha nie jemoakt, dan woa ekj aules volfelt han, waut ekj vone Erschaufunk aun jeplont haud! Jo, ekj sie nämlich soo aus daut A un daut Z, wiel soo aus daut Alfabeet met A aunfangt, soo wia ekj aum Aunfank Gott. Un soo aus daut Alfabeet met Z opphieet, soo woa ekj emma Gott sennen, jo, ekj sie de eewja Gott, dee niemols endat.

Un wäa dit aula em Betracht nemt, un jeistlich soo aus een darschtja Mensch es, dee een velangen fa een nieet Läwen haft, dee kaun nu aul komen, un emsonst von daut Wota vom Läwen drinkjen, un sikj too daut eewje Läwen freien.

7 Un wäa äwa dän Fient de Äwahaunt kjriejen woat, un sikj nich hinjat Licht fieren lat, dee woat aul de Goode Dinja oawen, waut ekj mien Volkj vesproaken ha. Jo, un ekj woa äa Gott sennen, un see woaren miene Kjinja sennen, un dan woa ekj äant aula aus mien Sän aunerkjanen.

8 Oba aul dee waut sikj von dän Angst rejieren loten, ooda dee sikj nich opp mie veloten, un aul dee waut jeistlich vedreit sent, ooda dee Mort begonen, un aul dee waut sikj jeschlajchtlich veläwen, ooda dee Hakjsarie eewen, un aul dee waut Aufbilda aunbäden, un dee sikj met aulahaunt Faulschheiten aufjäwen, dee woaren nämlich aula äa Poat en de Fia See kjriejen, waut emma wajch met Schwäwelblit brent. Jo, dise Fia See woat nämlich de 'Tweede Doot' jenant, wiel fa aul dee waut Gott en de Fia See woat nen schmieten loten, woat daut dan soo sennen, aus wan see toom tweedemol jestorwen sent, un dan woaren see eewich von Gott jetrant sennen."

9 Un aus de Stemm von Gott sien Troon mie dit aula vetalt haud, dan wia eena von de säwen Enjel no mie jekomen, dee nämlich de säwen Komkjes hauden, wuamet de latste säwen Ploagen jefelt wieren, un de Enjel säd, "Komm met mie, un ekj woa die wiesen, wäa Jesus, Gott sien Laum, siene Brut es, met dee hee sikj nämlich befriet haft."

10 Un soo neem de Enjel mie em Jeist, opp een huaga Boajch nopp, waut sikj nämlich opp de niee Ieed befungen haud, un von doa kunn ekj Gott siene niee oppoat jesade Staut von Jerusalem seenen, dee nämlich met äare Enwona toop, von Gott, en dän nieen Himmel rauf jekomen wia. 11 Un wiel Gott en de niee Jerusalem jewont haud, un wiel hee nämlich soo groot un wundaboa es, dan sach ekj woo de niee Staut soo aus een kloara Jaspies Steen jedacht haud, un daut dee krakjt soo jeblenkjad haud, aus wan een Kristal Steen enne Sonneschien blenkjat. 12 Un rom de niee Jerusalem wia ne groote huage Mia, dee twalw Puaten haud, un dee von twalw Enjel beschitzt worden, un opp dise Puaten, stunden de Nomes, von Jakob siene twalw Säns jeschräwen. 13 De Staut wia nämlich vea kauntich, un aun de oostne Sied Staut wieren 3 Puaten, un aun de nuadne Sied wieren 3 Puaten, un aun de siedne Sied wieren 3 Puaten, un aun de wastne Sied wieren 3 Puaten. 14 Un de Mia wia opp twalw groote Gruntsteena nopp jemieet, un opp dise twalw Gruntsteena, stunden de Nomes, von Jesus, Gott sien Laum, siene twalw Apostel jeschräwen.

15 Un de Enjel dee met mie jerät haud, haud een goldna Motstock enne Haunt, wuamet hee de niee Staut, un de Puaten, un de Mia nämlich mäten wull. 16 Un aus hee de Staut jemäten haud, dan kjeem daut soo rut daut dee en aule Rechtungen äwareen lank wia. Dee wia 2,400 Kilomeeta lank, un 2,400 Kilomeeta breet, un 2,400 Kilomeeta huach. 17 Jo, un de Enjel haud de Mia uk jemäten, un dee wia 65 Meeta dikj. De Mot wuamet de Enjel dit aula jemäten haud, es de nämelje Mot aus waut Menschen emma brucken, wan see vondoagschen Dach waut mäten.

18 Un ekj sach daut de Mia von Jaspies Steena bestunt, un daut de gaunze Staut, von de reine Golt wia, waut nämlich soo rein wia, aus de reinste Glaus. 19-20 Un de Gruntsteena, wuaropp de Mia nopp jemieet wia, bestunden nämlich von veschiedne Sorten diere Steena. De ieeschta Gruntsteen wia een Jaspies Steen, un de tweeda wia een Safier Steen, un de dredda wia een Chalzedon Steen, un de vieeda wia een Smaracht Steen, un de fefta wia een Sardoniks Steen, un de sasta wia een Sarder Steen, un de säwenda wia een Chriesolit Steen, un de achta wia een Beril Steen, un de näajenda wia Topas Steen, un de tieenda wie een Chriesopras Steen, un de alfta wia een Hiazint Steen, un de twalfta wia een Ametist Steen, un soo bestunden aul de Gruntsteena von de Mia von dise veschiedne Sorten straume Steena.

21 Un de twalw Puaten von de Mia, waut rom de niee Jerusalem wia, wieren aula von Parlen jemoakt, un een jiedra Puat bestunt nämlich von eene groote Parl. Un de Hauptgaus von de niee Jerusalem bestunt von de reine Golt, dee soo rein wia, aus de reinste Glaus.

22 Un ekj sach daut doa en de niee Jerusalem kjeen Tempel wia, wua Gott sien Volkj am aunbäden kunn. Wiel de aulmajchtja Har Gott, un sien Laum Jesus, wieren selfst de Tempel, wiel see wieren mank äa Volkj, un soo kunn äa Volkj äant perseenlich aunbäden, un met äant toop Jemeentschoft han. 23 Un de niee Jerusalem fäld daut nich aun ne Sonn ooda ne Mon, wiel Gott wia soo groot un wundaboa, daut de Staut derch am gaunz dach wia. Un Jesus, Gott sien Laum, wia nämlich daut Licht, waut en de Staut jedacht haud. 24 Un aul de Velkja dee nochmol opp de niee Ieed woaren vestreit sennen, woaren en daut Licht von de niee Jerusalem läwen. Un de Kjennichs woaren aul äare Pracht, no de niee Jerusalem brinjen, wuamet see Gott, un sien Laum, ieren un aunbäden woaren. 25 Un de Puaten von de niee Jerusalem woaren dän dachäwa op sennen, un wiel daut opp de niee Ieed niemols Nacht jäwen woat, dan woaren de Puaten emma op bliewen. 26 Un de Menschen von aul de veschiedne Velkja von opp de niee Ieed, woaren aul äare Pracht un Rikjdom no de niee Jerusalem brinjen, un soo woaren see Gott un sien Laum ieren un aunbäden doamet. 27 Oba en de niee Jerusalem woat nuscht nen kjennen, waut no daut Jesaz no onrein es. Un doa woat uk kjeena nen kjennen, dee jeistlich vedreit es, ooda dee met irjent Läajnise, ooda schaundhauftje Dinja waut woat to doonen han. Nä, doa woaren bloos dee nen kjennen, dee äare Nomes, en daut Läwensbuak, dol jeschräwen sent.