Johanes sach woo de Droak noch fa 1000 Joa ensetten woat, soo daut hee de Menschen oppe Ieed nich mea hinjat Licht fieren kaun
20
Un aus ekj jeseenen haud, woo de Ritta un siene Häa Soldoten äwa daut Beest, un dän faulschen Profeet, un aul äare Soldoten, de Äwahaunt jekjräajen hauden, dan sach ekj woo een Enjel, vom Himmel no de Ieed jekomen wia. Un de Enjel haud een Schlätel enne Haunt, wuamet hee de Gruft opschluten kunn, waut kjeen Boddem haft, un ekj sach daut hee sikj uk haud ne dikje Kjäd metjebrocht. 2-3 Un de Enjel haud dän Droak faustjenomen, dän see nämlich de oole Schlang, un Diewel, un Soton nanen, un ekj sach woo hee dän met de Kjäd fautsjebungen haud, un woo hee dän en de Gruft jeschmäten haud. Un de Enjel haud de Gruft toojeschloten, un haud dän Toogank met een Tieekjen aufjestampelt, soo daut aulemaun daut seenen kunn, daut Gott dee wia dee dän Droak doa haud bemoaken loten. Un soo must de Droak doa fa 1,000 Joa ensetten, soo daut hee de Velkja oppe Ieed nich mea hinjat Licht fieren kunn. Un wan de 1,000 Joa to Enj sent, dan saul am noch fa ne korte Tiet friejeloten.Johanes sach woo Gott sien Volkj en daut dusentjoasche Rikj, met Jesus toop rejieren woat
4-5 Un aus ekj jeseenen haud, woo de Enjel Soton enjestopt haud, dan sach ekj Troonen, un daut de Menschen dee opp de Troonen jesäten hauden, de Vollmacht jekjräajen hauden, oppe Ieed to rechten. Dit wieren nämlich de Seelen von de Gleubje, dän see mol hauden de Kjapp aufjehakt, wiel see de Dinja emma tru hauden wieda jeprädicht, waut see von Jesus jeseenen un jehieet hauden, un wiel see sikj uk emma tru hauden aun daut Wuat Gottes jehoolen. Un see hauden daut Beest, un sien Ebenbilt mol nich aunjebät, un see hauden sikj uk nich aum Stiern, ooda aune Haunt met äa Tieekjen loten aufstamplen. Dise wieren nämlich aula vom Doot oppjestonen, un see rejieeden fa 1000 Joa, met Gott sien Enjesäajenden Kjennicha toop oppe Ieed.
Dise wieren de ieeschte dee vom Doot oppjestonen wieren, un dee saul eena oba nich met de äwaje Doodes vewakjslen, dee sikj nich opp Gott veloten hauden, dee ieescht mau dan vom Doot oppstonen woaren, wan daut dusentjoasche Rikj to Enj es.
6 Un aul dise dee nämlich toieescht vom Doot oppjestonen wieren, woaren to Gott sien oppoat jesadet Volkj jehieren, un see woaren sea froo sennen. Jo, un see woaren niemols wada stoawen, wiel de 'Tweede Doot' wuaderch de beese Menschen nochmol eewich von Gott woaren jetrant sennen, woat äwa äant kjeene Macht han. Un see woaren Jesus Christus, aus Priestasch un Kjennichs deenen, un see woaren fa 1,000 Joa met Jesus toop, äwa de Menschen oppe Ieed rejieren.
Johanes sach woo Soton, Gott sien Kjennichrikj woat vesieekjen to venichten, un daut Gott am oba eewich bestrofen woat
7 Un wan Jesus Christus sien dusent joasche Rikj nochmol to Enj komen woat, dan woat Soton von siene Jefangenschoft rut jeloten woaren. 8 Un hee woat rut gonen äwa de gaunze Welt, un hee woat aul de Velkja oppe Ieed hinjat Licht fieren, un äant enbillen daut see sikj jäajen Gott sellen hanstalen, un daut see sikj jäajen am wäaren sellen.b Dit sent nämlich de Velkja wuavon de Profeet Hezekiel aul lang trigj mol jeschräwen haud, dee eena met de Velkja von Gog un Magog vejlikjen kaun. Jo, un soo woat Soton sikj dise Velkja aula toop saumlen, un dan woat hee soone groote Häa Soldoten han, daut wan eena de Sauntkjieena aune Kaunt Mäa wudd aula talen kjennen, dan wudd eena uk weeten kjennen, wooväl Soldoten jäajen Gott nochmol kjampfen woaren. 9 Un ekj sach woo see von aulwäajen no daut Launt von Israel jekomen wieren, un woo see sikj rom Gott sien Volkj hauden hanjestalt, dee sikj nämlich en Gott siene beleewde Staut von Jerusalem befungen. Oba Gott haud Fia vom Himmel, opp siene Jäajna rauf komen loten, un soo wieren siene Fiend aula omjekomen.
10 Un Gott woat dän Diewel, dee de Velkja hinjat Licht jefieet haud, en de Fia See schmieten loten, waut emma wajch met Schwäwelblit brent. Un doa woat hee Dach un Nacht, fa emma met daut Beest, un met dän faulschen Profeet toop, lieden motten, dee nämlich aul von ea doa wieren.
Johanes sach woo aul de vestorwne Menschen äare Seelen, ver Gott sien groota witta Jerechtstroon komen woaren, un woo hee äant fa aul äare Woakjen rechten woat
11 Un ekj sach een groota witta Jerechtstroon, un daut Gott opp dän Troon jesäten haud. Un wiel Gott soo groot un jerajcht wia, veschwungen de Ieed un de Himmel von ver sien Aunjesecht, un soo wia daut nämlich soo aus wan dee niemols wieren jewast. 12 Un ekj sach de Seelen, von aul de Menschen, dee nämlich jerinj un groot wieren, dee oppe Ieed jeläft hauden, un daut see ver Gott sien Troon verem Jerecht komen musten. Un ver Gott worden Bieekja opjemoakt, wuarunja daut Läwensbuak uk mank wia, un wuarenn aul de Menschen äare Woakjen bennen dol jeschräwen wieren. Un ekj sach woo Gott dee aula jerecht haud, un woo hee äant dan doano beloont haud, aus see sikj daut met äare Woakjen vedeent hauden. 13 Un ekj sach uk woo de Doodes Krauft, un daut Mäa, un daut Doodenrikj, äare doodje Menschen äare Seelen aula hauden oppjejäft, un woo Gott dee dan uk aula jerecht haud. Jo, un hee haud äant dan uk doano beloont, aus see sikj daut met äaren Woakjen vedeent hauden.
14 Un aus Gott dee aula jerecht haud, dan sach ekj woo de Doodes Krauft, un daut Doodenrikj, en de Fia See jeschmäten wort, waut nämlich uk dän 'Tweeden Doot' jenant wort. Wiel wäa en de Fia See nen kjemt, fa däm woat daut soo sennen, aus wan hee toom tweedemol jestorwen wia, un dan woat dee fa emma von Gott jetrant sennen. 15 Un aul dee waut äare Nomes nich en daut Läwensbuak to finjen wieren, worden en de Fia See jeschmäten, wua see eewich lieden musten.