Johanes sach de groote jeistliche Hua, dee de Weltmenschen von Gott veleiden woat
17
Un eena von de säwen Enjel, dee äare Komkjes äwa de Welt hauden utjegoten, kjeem no mie, un säd, "Komm met mie, un ekj woa die wiesen, woo Gott de groote Hua nochmol rechten woat, dee jeistlich soo aus ne Fru es, dee een Maun, met äare vekjieede Wäaj von Gott veleit. Jo, wie räden hia nämlich von de groote Hua, dee en de Stauta wont, waut sikj bie väle Riefasch befinjt, von wua see äwa väle Menschen een grooten Enfluss haft. 2 Un aul de Kjennichs oppe Ieed, hauden sikj met dise jeistliche Hua veleeft, un hauden sikj gaunz aun äare Huararie han jejäft, un hauden äare Velkja uk soo met äare vekjieede Wäaj dun jemoakt, daut see sikj krakjt soo von de Hua äare vekjieede Wäaj rejieren leeten, aus wan een Supa sikj von Wien rejieren lat."Johanes sach wua de groote Hua wonen woat, un hee vejlikjt äa met ne Fru,b dee enne Wiltnis opp een roodet Beest jesäten haud
3 Un de Enjel neem mie em Jeist no ne Wiltnis, un wees mie doa ne Fru, dee opp een roodet Beest jesäten haud. Daut Beest haud säwen Kjapp un tieen Häna, un daut wia gaunz met lastaliche Nomes beschräwen, wuamet Gott emma jelastat wort. 4 Un de Fru haud roode un rootbleiwe Kjleeda aun, un see haud sikj gaunz met Golt, un Parlen, un diere Steena utjestraumt. Un enne Haunt hilt see een goldnet Kuffel, waut gaunz voll Wien wia, waut nämlich een Bilt wia, von woo äakjlich, un schmutzich äare jeistliche Huararie wia, wuamet see de Weltmenschen emma von Gott veleit haud. 5 Un opp äa Stiern, wia een jeheemnisvolla Nomen nopp jeschräwen, waut äa dan nämlich uk beschräwen haud. Un äa Nomen wia, "DE GROOTE BABYLON, DE MUTTA VON AULE HUAREN, UN VON AUL DE ÄAKJLICHSTE WOAKJEN, DEE DAUT OPPE IEED JÄWEN KAUN." 6 Un ekj sach daut dise Fru soo em ruzh wia, aus wan see von Bloot bedrunken wia. Wiel wan de Weltmenschen Gott sien oppoat jesadet Volkj hauden doot jemoatat, dee sikj nämlich emma tru aun Jesus jehoolen hauden, dan kunn see sikj nich beharschen. Un wiel äa daut niemols jenuach wia, waut Gott sien Volkj aunjedonen wort, dan deed see emma aulet mäajlichste, om Gott sien Volkj aula wajch to schaufen. Un aus ekj de Fru sach, dan staund ekj sea äwa aules waut ekj jeseenen haud.
7 Un de Enjel fruach mie, "Wuarom stauntst du soo sea? Ekj woa die erkjläaren waut daut Jeheemnis von dis Fru bedieet, un waut daut roode Beest, un siene säwen Kjapp un Tieen Häana bedieden, wuaropp de Fru nämlich jesäten haud.
8 "Daut roode Beest waut du jeseenen hautst, wia een Kjennich dee mol rejieet haud, un dee oba jestorwen wia. Un wan hee uk doot wia, doawäajen woat hee nochmol wada von ut de Gruft rut komen, waut kjeen Boddem haft. Un aul de Enwona von dise Welt, dee äare Nomes, mol nich vere Erschaufunk, en daut Laum sien Läwensbuak dol jeschräwen wieren, woaren staunen, wan see seenen woaren, woo dis Kjennich wada oppläwen woat. Un dan woat Gott am eewich bestrofen."
9 Un de Enjel räd wieda, un säd, "Om dit aula to vestonen, fält eenem väl Weisheit. Daut roode Beest siene säwen Kjapp, stalen eenem säwen Boaj väa, dee sikj bie de Staut befinjen, wua de groote Hua wont, un dee stalen eenem oba uk tojlikja Tiet säwen Kjennichs väa. 10 Fief von dise Kjennichs rejieren nich mea, un de Sasta rejieet nu, un de Säwenda es noch nich jekomen. Un wan de säwenda Kjennich komen woat, dan woat hee sikj aus Kjennich oppstalen loten, un dan woat hee oba mau fa ne korte Tiet rejieren.
11 "Un daut roode Beest, wia nämlich eena von dise säwen Kjennichs, dee mol rejieet haud, un dee oba jestorwen wia, un dee noch wada vom Doot oppstonen woat. Jo, un wan hee dan wada rejieren woat, dan woat hee de achta Kjennich sennen, uk wan hee eena von dee säwen wia. Un dan woat Gott am oba met de aundre Kjennichs toop vedaumen, un äant eewich bestrofen.
12 "Un daut roode Beest, siene tieen Häna, stalen eenem tieen Kjennichs väa, dee noch nich rejieet hauden. Un see woaren oba noch fa ne korte Tiet de Vollmacht kjriejen, soo daut see aus Kjennichs woaren rejieren kjennen, un dan woaren see daut Beest unjastetten, soo daut hee wada woat rejieren kjennen. Un daut woat sikj oba soo späaren, aus wan see mau fa eene Stund woaren Kjennichs sennen. 13 Jo, dise tieen Kjennichs woaren sikj nämlich aula toopstonen, om daut roode Beest met aul äare Krauft un Vollmacht to unjastetten. 14 Un dan woaren see jäajen Jesus, Gott sien Laum Kjrich aunstalen, un daut woat oba nich lang dieren, un dan woat daut Laum, un siene utjeläsde Gleubje, äwa äant de Äwahaunt kjriejen. Wiel Jesus es nämlich de Harscha, dee de Vollmacht äwa aule Harschasch un Kjennichs haft, un siene Gleubje waut am dan bejleiten woaren, sent dee waut am emma tru jedeent hauden, dee hee sikj nämlich haud no sikj jekroacht, un dee daut wirdich wieren, daut Gott äant fa sikj wälen wudd."
15 Un de Enjel räd wieda met mie, un säd, "Un de Riefasch wua de groote Hua jewont haud, sent fa ons een Bilt dee eenem groote Gruppen von Menschen väastalen, dee von mank aul de Velkja oppe Ieed komen, dee nämlich väle Sproaken räden.
16 "Un daut roode Beest siene tieen Häna, waut eenem nämlich tieen Kjennichs väastalen, woaren sikj met daut roode Beest toopstonen, un wiel see de groote Hua soo sea haussen woaren, dan woaren see sikj een Plon moaken, om äa äare Macht aula wajch to nämen. Un wan see äa hant Machtloos jemoakt, dan woaren see äa soo tochloten, aus wan see bloos ne noaktje Hua wia, von dee see nuscht mea weeten wullen. Jo, see woaren äa soo enne Grunt brinjen, aus wan see äa Fleesch gaunz oppjefräten hauden, un waut von äa dan noch woat äwabliewen, woaren see gaunz vebrennen. 17 Dit waut daut Beest un siene tieen Häna sikj jeplont hauden, hauden see sikj oba nich selfst utjedocht. Wiel Gott haud äant opp äaren Plon jeholpen, soo daut see sien Ziel fa de groote Hua utfieren wudden. Jo, un soo woaren de tieen Häna sikj eenjen, om daut roode Beest de Vollmacht to jäwen, wuaderch hee de groote Hua venichten woat. Un soo woaren see Gott sien Wuat utfieeren.
18 Un de Enjel räd wieda, un säd, "Un de Fru, dee du enne Wiltnis jeseenen hautst, aus ekj die em Jeist haud met jenomen, dee stalt eenem nämlich de groote Staut väa, von wua de Weltharschasch,c äwa aul de Kjennichs un Velkja oppe Ieed rejieren woaren."