Johanes hieed woo ne Stemm em Himmel, de säwen Enjel oppe Ieed rut schekjen woat, om Gott sien Jerecht äwa de Weltmenschen uttofieren
16
Dan hieed ekj vom Tempel em Himmel, ne lude Stemm räden, un dee befool de säwen Enjel, un säd, "Nämt june säwen Komkjes, dee eenem Gott sien Oaja väastalen, un got rauf no de Ieed. Un soo aus eena dän Wien von ut een vollet Komkje aula utjeeten wudd, soo sell jie Gott sien Oaja gaunz äwa de Welt too komen loten."2 Un de ieeschta Enjel wia jegonen, un aus hee sien Komkje äwa de Welt haud utjegoten, dan leet hee schlemme eitaje Schwäaren äwa aul de Weltmenschen komen, dee daut Beest, un sien Ebenbilt nämlich aunjebät hauden, un dee sikj met äa Tieekjen hauden betieekjnen loten.
3 Un aus de ieeschta Enjel foadich wia, dan wia de tweeda Enjel jegonen, un aus hee sien Komkje äwa de Welt haud utjegoten, dan wort daut Wota em Mäa Bloot, waut von doodje Kjarpasch wia. Un aules waut em Mäa jeläft haud wia om jekomen.
4 Un aus de tweeda Enjel foadich wia, dan wia de dredda Enjel jegonen, un aus hee sien Komkje äwa de Welt haud utjegoten, dan muak hee daut soo, daut daut Wota en de Riefasch, un en de Wotakjwalen aula Bloot worden. 5 Un ekj hieed waut dis Enjel dan jesajcht haud, dee nämlich de Macht äwa aul daut Wota oppe Ieed haud, un hee säd,
"Gott, du best dee waut von aules, un von aulem oppoat jesat es,
un du best dee waut emma wia, un dee emma es.
Jo, un du best gaunz em Rajchten,
wan du de Weltmenschen met dise Ploagen rechten latst.
6 Wiel see hauden dien oppoat jesadet Volkj,
un diene Profeeten äa Bloot vegoten,
un soo hant see nu nuscht to drinkjen aus Bloot.
Jo, daut es mau gaunz rajcht daut du äant soo aus dit rechten latst."
7 Un ekj hieed ne Stemm, dee von de Weiruakaultoa em Himmel jerät haud, un dee Stemm säd,
"Jo, aulmajchtja Har Gott,
du deist emma tru un jerajcht rechten."
8-9 Un aus de Stemm em Himmel dit jesajcht haud, dan wia de fieeda Enjel jegonen, un aus hee sien Komkje äwa de Sonn haud utjegoten, dan wort daut oppe Ieed soo heet, daut de Weltmenschen, von de Sonn bebrennt worden. Un see fluchten Gott sien Nomen, wiel see wisten daut hee de Macht äwa aul dise Ploagen haud. Un wan see fa äare Sinden uk noch soo sea lieden musten, doawäajen endaden see äare beese Denkjens Oat nich, soo daut see Gott de Iea jäwen wudden.
10-11 Un aus de fieeda Enjel foadich wia, dan wia de fefta Enjel jegonen, un aus hee sien Komkje äwa de Welt haud utjegoten, dan wort daut wuaemma daut Beest rejieet haud diesta. Un aul de Weltmenschen waut sikj von daut Beest hauden rejieren loten, vebeeten sikj de Tungen, wiel see wäajen aul de Ploagen em Diestren, soo sea lieden musten. Un wan see daut uk wisten daut see fa äare Sinden lieden musten, doawäajen fluchten see Gott em Himmel, un hilden sikj bloos aun äare beese Wäaj, un endaden äare beese Denkjens Oat nich.
12 Un aus de fefta Enjel foadich wia, dan wia de sasta Enjel nom Eufrat Riefa jegonen, un aus hee sien Komkje äwa dän Riefa haud utjegoten, dan wia dee gaunz utjedrieecht, soo daut de Kjennichs von de oostne Kaunt Riefa, fa äare Häaren Soldoten, een opnen Wajch hauden, no de wastne Kaunt Riefa to komen. 13 Un ekj sach woo dree beese Jeista, von ut dän Droak, un daut Beest, un dän faulschen Profeet äare Miela rut jekomen wieren, dee nämlich no Poggen leeten. Jo, een beesa Jeist kjeem von ut dän Droak sien Mul, un de tweeda kjeem von ut daut Beest sien Mul, un de dredda kjeem von ut dän faulschen Profeet sien Mul, waut nämlich uk daut tweede Beest wia, waut von ut de Ieed jekomen wia. 14 Dise Poggen wieren nämlich Jeista von Diewels, dee daut vollbrocht hauden Wundatieekjens to schaufen, om aul de Kjennichs oppe Ieed hinjat Licht to fieren. Jo, un de Diewels Jeista hauden de Kjennichs enjebilt, daut see sikj aula, met äare Häaren Soldoten toop eenjen sullen, om jäajen dän Harn to kjampfen, wan hee aus aulmajchtja Gott, de Weltmenschen opp sien grooten Jerechtsdach rechten woat.
15 Dan hieed ekj waut Gott sien Enjesäajenda Kjennich† von daut groote Jerechtsdach to sajen haud, un hee säd,
"Kjikjt doch, ekj woa soo offerhoffs komen de Welt to rechten, aus wan een Deef, de Nacht wäm bestälen kjemt. Aules waut de Weltmenschen woaren enwoaren, es daut ekj met eemol woa doa sennen, un dan woa ekj äant rechten. Oba aul dee waut dan no mie luaren woaren, un dee sikj nich met dän Droak, un sien Beest woaren betieekjnen loten, dee woaren sikj sea freien. Un wiel see een jerajchtet Läwen fieren, dan woat daut jeistlich soo fa äant sennen, aus wan eena siene Kjleeda emma aun haft, soo daut eena sikj nich schämen brukt, wan doa met eemol wäa äwa komen sull."
16 Un aus ekj dit jehieet haud, dan sach ekj woo de dree Diewels Jeista, aul de Kjennichs oppe Ieed, met äare Häaren Soldoten toop vesaumelt hauden. Un de Städ wua see sikj vesaumelden, heet oppe Hebräische Sproak, Harmagedon.
17 Un dan sach ekj woo de säwenda Enjel sien Komkje äwa de Welt haud utjegoten, un dan hieed ekj ne Stemm, dee von Gott sien Troon em Himmel kjeem, un dee säd gaunz lud, "Nu ha ekj aules volfelt, soo daut ekj de Weltmenschen rechten kaun!" 18 Un doamet blitzt, un donnad, un rummeld daut äwa de Ieed, un doa wia een groota Ieedbäben, waut väl jrata wia, aus waut irjent een Mensch jeemols erläft haud. 19 Un de Ieed scheddat soo sea, daut de groote Staut von Babylon, en dree Deelen oppspoold, un de Städa von äwa de gaunze Ieed, kjeemen to nuscht. Wiel Gott haud aun aul de Sinden, von de Enwona von de groote Staut von Babylon jedocht, un woo de Weltmenschen sikj von äant hauden veleiden loten, un wiel am de Mot gaunz voll jeworden wia, dan leet hee sien Oaja opp äant aula tookomen. 20 Un wiel de Ieed soo sea jescheddat haud, dan veschwungen aul de Insle em Mäa, un aul de Jebirj verutschten soo en de Schluchten nen, daut dee nich mea to finjen wieren. 21 Un doa follen groote Hoagelbieta, oppe Weltmenschen nopp, dee bat 45 Kilos schwoa wieren, un see fluchten Gott, wiel hee äant soon schrakjlichen Hoagelstrom, haud tookomen loten.