Johanes sach woo daut Laum siene 144,000 Deena, am oppe Ieed fa voll deenen woaren
14
Dan sach ekj woo daut Laum, en de Staut von Jerusalem, opp dän Zionsboajch jestonen haud, un siene 144,000 Deena wieren bie am. Un opp siene Deena äare Stierns, stunden daut Laum, un sien Voda, äare Nomes jeschräwen. 2 Un ekj hieed woo een Jeruzh lud vom Himmel jeschault haud, waut sikj soo hieed aus wan väl Wota sea jeschält haud, ooda soo aus wan daut buten lud jerummelt haud. Un daut hieed sikj soo aus wan väle Hoapenspälasch, aula tojlikj opp äare Hoapen jespält hauden. 3-4 Un aus daut Spell em Hinjagrunt jespält wort, dan hieed ekj uk woo een Kua ver Gott sien Troon, un de fea läwendje Jestaulten, un de 24 Ooms, een nieet Leet jesungen hauden, waut kjeena lieren kunn, aus bloos daut Laum siene 144,000 Deena.Verhäa wieren dise 144,000 Deena, mank de Weltmenschen oppe Ieed jewast, un see hauden sikj jeschlajchtlich oba emma krakjt soo rein jehoolen, aus wan ne Brut, sikj fa äaren tookjinftjen Maun rein jehoolen haud. Un Gott, un sien Laum, hauden äant met daut Laum sien Bloot, von mank de Weltmenschen friejekoft. Un wiel see de ieeschte wieren, dee Gott von dän Droak siene Macht haud frie jemoakt, dan wieren see soo aus de ieeschte Arnt, waut de Juden aule Joa emma ver Gott jeopfat hauden.
Un wiel de 144,000 Deena to daut Laum jehieeden, dan jinjen see daut Laum aulewäajen oppe Ieed hinjaraun, un see hauden sikj gaunz hanjejäft, am fa voll to deenen. 5 See hauden niemols jeloagen, un kjeena kunn äant met irjent waut Schlajchtet beschuljen.
Johanes sach woo dree von Gott siene Enjel, de Menschen von äwa de gaunze Ieed, fa Gott sien Jerechtsdach woarnen woaren
6 Un ekj sach woo een aundra Enjel huach äwa de gaunze Ieed jefloagen wia, dän Gott siene eewje goode Norecht aunvetrut haud, un ekj sach woo dee daut mank aule Menschen, von aule Velkja, un aule Sproaken, en aule Lenda oppe Ieed wieda jeprädicht haud. 7 Un de Enjel schrieech gaunz lud, un säd, "Jäft Gott de Respakjt un de Iea, dee am jehieet, wiel nu es daut soo wiet daut hee aulem rechten woat. Jo, stalt junt doch unja Gott siene Harschoft nunja, wiel hee es nämlich dee, waut de Himmel, un de Ieed, un daut Mäa, un de Wota Kjwalen aula erschaufen haud, un soo es daut mau rajcht daut jie am aunbäden sullen."
8 Dan sach ekj woo een tweeda Enjel, dän ieeschten Enjel hinjaraun jefloagen wia. Un dee fluach uk huach äwa de gaunze Ieed, un schrieejch gaunz lud, un säd, "De groote Staut von Babylon es gaunz too nuscht jekomen, wiel Gott de Babylona bestroft haud. See wieren Gott emma soo ontru jewast, aus wan ne Fru äa Maun ontru es, un soo aus een Supa sikj von Wien rejieren lat, soo leeten see sikj uk von äa ontruet un onbandjet Läwen rejieren. See hauden aul de Menschen, von manke aule Lenda oppe Ieed äwarät, daut see sikj krakjt soo veläwen sullen, aus see sikj emma veläft hauden. Un daut es wuarom Gott sikj äwa äant jeoajat haud, un wuarom hee äant dan bestroft haud."
9-10 Dan sach ekj woo een dredda Enjel, dee ieeschte beid Enjel hinjaraun jefloagen wia, un dee fluach huach äwa de gaunze Ieed, un schrieech gaunz lud, un säd, "Aul de Menschen, dee daut Beest un sien Ebenbilt aunbäden, ooda dee sikj met daut Beest sien Tieekjen betieekjnen loten, woaren erfoaren woo daut es wan Gott sikj äwa äant oajat. Wiel dan woat Gott äant ver siene oppoat jesade Enjel, un ver sien Laum hanstallen loten, un dan woat hee äant met Fia un Schwäwelblit bestrofen loten, un soo woat hee äant schentlich lieden loten. 11 Un see woaren Dach un Nacht lieden motten, un äa Kwol woat niemols no loten. Un daut Fia wuamet dise Menschen woat bestroft woaren, woat emma wajch rieekjren, soo daut kjeena daut woat vejäten kjennen, daut Gott dee es, dee de Sinda bestrofen deit. Jo, see hauden daut Beest un sien Ebenbilt aunjebät, un hauden sikj met sien Tieekjen betieekjnen loten, un dit es woo see dan woaren eewich hanhoolen motten."
12 Dit waut de Enjel äwa de Welt wieda jeprädicht haud, meent dan soo väl, daut wäa sikj nich met daut Beest betieekjnen lat, mott doamet räakjnen, daut am dan woat vefolcht woaren. Un soo mott Gott sien oppoat jesadet Volkj sikj mau sea aunstrenjen, un seenen daut see siene Jebooten mau jeduldich jehorchen, un daut see nich opphieren sikj opp Jesus to veloten.
13 Un ekj hieed ne Stemm, dee mie vom Himmel een Befäl jeef, un de Stemm säd, "Schriew dol waut ekj die nu väasajen woa!" Un dee Stemm räd wieda, un säd,
"Aul dee waut sikj von nu aun opp dän Harn veloten woaren, un dee äa Läwen fa äaren Gloowen oppjäwen woaren, kjennen werkjlich Froo sennen."
Un de Heilje Jeist wia met aulem envestonen, waut de Stemm mie jesajcht haud, un hee säd, "Jo, aul dee waut fa äa Gloowen vefolcht woaren, un dee äa Läwen fa dän Harn hanjäwen woaren, kjennen werkjlich Froo sennen. Wiel Gott woat äare goode Woakjen emma em Denkj hoolen, un wiel see sikj soo fa äa Gloowen aunjestrenjt hauden, dan woat hee äant nochmol Ru jäwen doafäa."
Johanes erkjläad woo hee Jesus erkjant haud, un sach woo Jesus aule Menschen rechten woat
14 Un huach äwa de Ieed sach ekj ne witte Wolkj, un kjikjt emol, opp de Wolkj haud eena jesäten, dee Gott sien Utjewälda von mank Menschen likjend. Un oppem Kopp haud hee ne goldne Kroon opp, un enne Haun hilt hee ne schoape Hauntsans,a un ekj erkjand daut dit nämlich Jesus wia, dee opp de Wolkj jesäten haud.
15 Un een aundra Enjel wia von dän Tempel em Himmel rauf jekomen, un hee räd Jesus gaunz lud aun, un säd, "Hol soo met diene Hauntsans äwa de Welt ut, aus wan een Bua sien riepet Flekj aufarnten wudd, wiel de Menschen oppe Ieed sent nämlich aula soo aus een riepet Flekj, waut aul mau bloos fält auftoarnten. Brinj de Menschen aula toop, un lot äant verem Jerecht komen." 16 Un doamet hold Jesus ut, un soo haud hee aule Menschen oppe Ieed toop jesaumelt.
17 Un dan sach ekj woo een aundra Enjel, von dän Tempel em Himmel, no de Ieed jekomen wia, un de Enjel haud uk ne schoape Hauntsans enne Haunt. 18 Un von dän Tempel, em Himmel wia noch een Enjel jekomen, dee bie de Weiruakaultoa, äwa daut Fia aunjestalt wia. Un dis Enjel räd gaunz lud met dän Enjel, dee de Hauntsans enne Haunt hilt, un hee säd, "Hol soo met diene Hauntsans ut, aus wan een Bua siene Wiendruwen aufarnten wudd, wiel nu sent de Weltmenschen soo aus riepe Wiendruwen, dee aul mau bloos fälen toop to saumlen, soo daut Gott äant en sien grooten Oaja bestrofen kaun."
19-20 Un soo haud de Enjel daut dan uk jedonen, hee haud de Weltmenschen aula toop jesaumelt, soo aus wan een Bua siene Wiendruwen toop saumelt, un dee Butakaunt Staut no de Wienpras brinjt. Un soo aus de Bua siene Wiendruwen dan en de Wienpras utklunjt, soo leet Gott sien Oaja äwa de Weltmenschen komen. Un soo aus de Wien, dan von ut de Wienpras rut schält, soo schäld daut Bloot von de Weltmenschen, dee Gott jerecht haud. Un daut Bloot schäld nämlich fa 296 Kilomeeta, un daut wia soo deep, daut wan de Soldoten derchem Bloot rieden musten, dan kjeem daut Bloot bat aum Toom.