Johanes sach woo een Beest von ut daut Mäa komen woat, un woo de Droak daut Beest de Macht jäwen woat Wundatieekjens to doonen
13
Aus de Droak sikj aune Kaunt Mäa haud han jestalt, dan sach ekj een Beest von ut daut Mäa rut komen, waut säwen Kjapp, un tieen Häna haud. Un opp jieda Huarn wia ne Kroon, un opp siene Kjapp stunden beese Nomes nopp jeschräwen, wuamet Gott jelastad wort. 2 Un daut Beest likjend sea een Leopard†, oba daut haud Pooten soo aus een Boa, un ne Frät soo aus een Leiw. Un de Droak haud daut Beest opp sien Troon to setten jekroacht, un haud am von siene ieejne Krauft un Vollmacht jejäft, soo daut hee en siene Städ, äwa de Welt rejieren kunn.3 Un ekj sach waut soo leet, aus wan een von dän Beest siene Kjapp, soo vewunt wia, daut dee doavon jestorwen wia, un daut dee oba wada wia bäta jeworden. Un wiel de Weltmenschen daut soo sea jestaunt haud, daut daut Beest wada jeläft haud, dan leeten see sikj aula von daut Beest veleiden.
4 Un de Weltmenschen hauden dän Droak aunjebät, wiel hee daut Beest haud de Vollmacht jejäft äwa de Welt to rejieren. Un see bäden daut Beest uk aun, un säden, "Doa es kjeena dee soo stoakj es aus daut Beest, dee jäajen am wudd kjampfen kjennen, un dee äwa am de Äwahaunt kjriejen wudd."
5-6 Un fa 42 Moonat haud Gott daut Beest daut toojeloten, daut hee siene Vollmacht soo äwa de Welt uteewen kunn, aus hee wull, un daut hee sikj uk groosoatich erhäwen durf. Un hee lastad äwa Gott, un äwa sien Nomen, un äwa sien Hus em Himmel, un uk äwa dee waut bie Gott em Himmel jewont hauden.
7 Un Gott haud daut uk toojeloten, daut daut Beest jäajen Gott sien oppoat jesadet Volkj Kjrich aunstalen durf, un daut hee äwa äant de Äwahaunt kjriejen kunn, un daut hee siene Vollmacht äwa aule Menschen, von aule Velkja, un von aule Sproaken, von aule Lenda oppe Ieed, utfieren kunn. 8 Un aul de Menschen oppe Ieed, bäden daut Beest uk aun, aus bloos dee nich, dee äare Nomes en daut Laum sien Läwensbuak stunden. Daut Laum wia aus een Opfa fa aule Sinda jestorwen, un hee haud uk aul em verut jewist, wäa nochmol aun am jleewen wudd, un soo haud hee äare Nomes aul vere Erschaufunk, en sien Läwensbuak dol jeschräwen.
9 Wäa vestonen well waut Gott mie hia aules openboat haft, saul dit mau aula sea to Hoaten nämen.
10 Gott haft atelje Gleubje fa daut Jefenkjnis bestemt,
un soo woaren see noch ensetten motten.
Un atelje haft hee fa daut Schwieet bestemt,
un soo woaren see noch met een Schwieet omkomen motten.
Wäa to dise tookjinftje Tiet to Gott sien Volkj jehieren woat, saul bloos seenen daut hee dise Vefoljunk jeduldich derchmoakt, un daut hee sikj tru opp Gott velat.
Johanes sach woo een tweedet Beest von ut de Ieed komen woat, un woo daut dan von daut ieeschte Beest siene Vollmacht kjriejen woat
11 Dan sach ekj woo een tweedet Beest von ut de Ieed jekomen wia, un daut haud twee Häna, soo aus een Schopsbock, un ne Stemm waut sikj no een Droak hieed. 12 Un daut tweede Beest, fieed daut ieeschte Beest siene Vollmacht ut, un daut schauft unja daut ieeschte Beest siene Oppsecht. Daut velangd nämlich daut aule Weltmenschen, daut ieeschte Beest aunbäden sullen, waut ieescht vewunt wia, un waut wada jeläft haud. 13 Un daut tweede Beest kunn groosoatje Wundatieekjens schaufen, un wan Menschen tookjikjten, dan kunn daut soogoa Fia vom Himmel no de Ieed faulen loten. 14 Un daut tweede Beest wort daut toojeloten, aul soone Wundatieekjens aus dit ver de Weltmenschen to doonen, om äant hinjat Licht to fieren. Un daut ieeschte Beest, waut nämlich met een Schwieet omjekomen wia, un waut wada jeläft haud, kjikjt too wan daut tweede Beest soone Wundatieekjens deed. Un daut tweede Beest befool de Weltmenschen, daut see fa daut ieeschte Beest een Ebenbilt moaken sullen, waut nämlich daut ieeschte Beest likjnen sull, un daut see daut aus een Gott aunbäden sullen. 15 Un daut tweede Beest haud de Macht jekjräajen, om daut Ebenbilt Läwen to jäwen, soo daut daut räden kunn, un soo daut daut von de Weltmenschen velangen kunn, daut see daut Ebenbilt aus een Gott aunbäden sullen. Un wan irjentwäa daut Ebenbilt nich aunbäden wull, dan haud daut Ebenbilt de Macht dee omtobrinjen.
16 Un daut tweede Beest wia doafäa oppjekomen, daut aule Menschen oppe Ieed, met een besondret Tieekjen, oppe rajcht Haunt, ooda oppem Stiern betieekjent worden. Un daut hilt sikj uk jlikj, auf see jerinj ooda groot wieren, oam ooda rikj, veskloft ooda frie, dee musten aula daut nämelje Tieekjen han. 17 Daut Tieekjen bestunt nämlich von daut Numma, wuamet daut ieeschte Beest aunerkjant wort, waut uk to jlikja Tiet sien Nomen wia. Un daut tweede Beest kjeem doafäa opp, daut kjeena waut kjeepen ooda vekjeepen kunn, wan see daut Tieekjen nich hauden.
18 Om dise Dinja aula to vestonen fält eenem väl Weisheit. Daut Numma von daut Beest es 666, un wäa Vestentnis haft, saul noforschen waut dit Numma bedieden deit. Wiel daut es nämlich een Nomen von een Mensch, un wäa de Bediedunk von daut Numma utfinjen kaun, woat erkjanen von wäm hia de räd es.