Johanes sach woo ne Fru een Junkje haud to Welt jebrocht, un daut de Droaka daut Kjint ombrinjen wull
12
Dan sach ekj em Himmel waut butajeweeneljet, waut ne groote Bediedunk enthelt. Ekj sach nämlich ne Fru, dee sikj met de Sonn bekjleet haud, un see haud de Mon unja äare Feet, un oppem Kopp haud see ne Kroon, dee von twalw Stierns bestunt. 2 Un de Fru wia schwanga, un ekj hieed woo see jeschräajen haud, aus daut Kjint aunfunk to Welt to komen.3 Un dan sach ekj em Himmel noch waut butajeweeneljet, waut uk ne groote Bediedunk enhelt. Un dit mol sach ekj een groota rooda Droak, met säwen Kjapp, un tieen Häna, dee opp een jieda Kopp ne Kroon haud. 4 Un de Droak haud sikj een dreddel von de Stierns em Himmel, met dän Zoagel met jeschlapt, un dan haud hee dee no de Ieed jeschmäten.b Un dan sach ekj woo de Droak sikj ver de Fru haud han jestalt, om äa Kjint fuaz opptofräten, wan daut to Welt komen wudd.
Johanes sach woo daut Kjint Kjennich woaren sull, un daut de Droak daut Kjint oppfräten wull
5 Un de Fru haud een Junkje, dee nochmol aus Kjennich äwa aule Velkja oppe Ieed rejieren sull. Un wan jeweenelje Kjennichs emma een Kjennichstock hoolen, om to wiesen daut see de Vollmacht äwa äa Launt hant, dan wudd dis Jung nochmol ne Iesastang hoolen, om de gaunze Welt to wiesen, daut hee een strenja un jerajchta Kjennich sennen woat.
Un ea de Droak daut Junkje haud oppfräten kunt, dan haud Gott daut Kjint haustich von de Fru jenomen, un haud am nom Himmel jenomen, un haud am opp sien Troon to setten jebrocht. Un soo wort daut Kjint de Vollmacht äwa de Himmel un Ieed jejäft. 6 Un de Fru kleiwd von dän Droak ut, un kjeem bat ne Städ enne Wiltnis, waut Gott fa äa haud reed jemoakt, wua hee äa fa 1,260 Doag beschitzen wudd, un wua hee äa uk met Äten vesorjen wudd.
Johanes sach woo de Droak un siene Enjel, jäajen Gott siene Enjel jekjampft hauden, un daut dän Droak un siene Enjel vom Himmel rut jedräwen wort
7-9 Dan sach ekj woo daut em Himmel haud Kjrich jejäft. Michael wia Gott sien väaschta Enjel, dee äwa Gott siene Häa Enjel aunjestalt wia, un hee un siene Häa, hauden jäajen dän Droak un siene Häa jekjampft, un de Droak un siene Enjel hauden vespält, un soo hauden see em Himmel kjeen Rum mea, wua see bliewen kunnen. Un dan sach ekj woo äant vom Himmel rut jedräwen wort, un woo äant rauf jeschmäten wort, no de Ieed.
Jo, un dis groota Droak wuavon wie hia räden, es nämich de oole Schlang, dän see uk 'Diewel' ooda 'Soton' nanen,c dee dän Mensch aul vom Aunfank aun emma unjagonen haud.
10 Un aus ekj jeseenen haud woo äant no de Ieed jeschmäten wort, dan hieed ekj woo een Gleubja em Himmel lud jerät haud, un hee säd,
"Nu haft Gott sien Volkj von dän Diewel frie jemoakt,
un soo jeit daut kloa to seenen woo stoakj Gott es.
Nu haft Gott sien Enjesäajenden Sänd de Vollmacht jejäft Kjennich to sennen,
un soo stalt hee sikj sien Kjennichrikj em Himmel un oppe Ieed opp.
Wiel Gott haft dän Diewel loten vom Himmel rut driewen,
dee onse Jeschwista nämlich Dach un Nacht emma ver Gott beschulcht haud,
un haud am rauf schmieten loten oppe Ieed nopp.
Un soo es daut nu de rajchte Tiet,
daut Jesus Kjennich woat.
11 Un wiel onse jeistliche Jeschwista sikj opp Gott sien Laum sien Bloot veloten hauden,
wuaderch Gott äant von äare Sindenschult haud friejekoft,
un wiel see uk reed wieren fa de goode Norecht to stoawen wan see daut wieda prädijden,
dan hauden see uk äwa dän Diewel de Äwahaunt jekjräajen.
12 Un wiel Gott soone groote Dinja derch onse jeistliche Jeschwista jedonen haft,
dan sellen aul dee waut em Himmel wonen sikj freien.
Jo, see kjennen sikj werkjlich freien!
Oba fa de Welt, un fa aul de Menschen, dee noch oppe Ieed läwen,
woat daut noch schrakjlich sennen.
Wiel de Diewel woat sikj sea oajren,
un hee weet daut siene Tiet oppe Ieed kort es,
un wan hee dan rauf komen woat no de Menschen oppe Ieed,
dan woat hee aulet mäajlichste doonen,
om Gott sien Rikj to vestieren."
13-14 Un aus de Stemm em Himmel foadich jerät haud, dan sach ekj waut de Droak oppe Ieed jedonen haud, no dän daut Gott am haud rauf schmieten loten no de Ieed. Un aus de Droak daut wia enjeworden daut hee oppe Ieed bliewen must, dan funk hee aun de Fru to vefoljen, dee daut Junkje nämlich to Welt jebrocht haud. Un ea hee sikj de Fru oba haud jriepen kunt, dan wort äa twee groote Odla Flichten jejäft, wuamet see no ne Städ enne Wiltnis fliejen kunn, waut Gott fa äa haud reed jemoakt. Dit wia ne Städ wua Gott äa dan fa dree-un-een-haulf Joa von dän Droak beschitzen wudd, un wua hee äa dan uk met Äten vesorjen wudd.
15 Un de Droak haud een groota Wotastroom, von ut sien Mul schälen loten, wuamet hee de Fru ombrinjen wull. 16 Oba Gott haud daut soo jemoakt, daut de Ieed de Fru halpen sull, un soo haud de Ieed sikj opjemoakt, un haud daut Wota aula oppschluckt. 17 Un de Droak haud daut soo sea jeoajat, daut hee de Fru nich haud doot moaken kunt, daut hee jäajen äare aundre Kjinja haud Kjrich aunjestalt. Dit wieren nämlich dee, waut sikj emma aun Gott siene Jebooten jehoolen hauden, un dee Jesus Christus siene Lieren emma tru wieda jeprädicht hauden.
18 Un dan sach ekj woo de Droak sikj aune Kaunt Mäa hanjestalt haud.