Gott sien Laum haud Johanes aunjestalt de Menschen to talen, dee Gott en dän Tempel en Jerusalem aunbäden woaren
11
Dan wort mie ne Rank jejäft, waut sea een Motstock likjend, un de Stemm dee ieescht met mie jerät haud, räd wieda met mie, un säd, "Nemm dise Rank, un go un mät woo groot Gott sien Tempel un de Aultoa sent, un tal wooväl Menschen am doa aunbäden. 2 Oba de Hoff waut rom dän Tempel es, saust du nich mäten, wiel Gott haft dee aun de ongleubje Nich-Juden äwajäft, dee de oppoat jesade Staut von Jerusalem, fa 42 Moonat unja äare Kontrol woaren han.Gott sien Laum haud Johanes twee von siene Deena jewäsen, dee fa daut Laum prädjen woaren
3 Jo, un ekj ha twee Deena dee ekj fa dise Tiet de Macht jäwen woa, om miene Bootschoft, fa mie wieda to prädjen. Un see woaren sikj met Truakjleeda auntrakjen, om aulem to wiesen woo schod äant daut es daut de Ongleubje Menschen Gott nich jehorchen wellen. Un soo woaren see mie, aus miene Zeij, fa 1,260 Doag deenen." 4 Dise Zeij, wuavon Gott sien Laum mie vetalt haud, sent soo aus de twee Eeljbeem un de twee Laumpen, wuavon daut aul lang trigj en de Schreftena jeschräwen steit, dee nämlich ver dän Gott stonen, dee äwa de gaunze Ieed rejieet. 5 Un wan see daut Laum siene Bootschoft woaren wieda prädjen, un irjentwäa äant woat waut aundoonen wellen, dan woaren Fiaflaumen von ut äare Miela komen, wuamet see äare Fiend aula venichten woaren. Un soo woaren see aul dee ombrinjen, dee äant waut aundoonen wellen. 6 Un fa soo lang aus see fa daut Laum prädjen woaren, woaren see de Macht han, de Wolkjen too to moaken, soo daut daut oppe Ieed nich räajnen woat. Un see woaren uk de Macht han, von Wota Bloot to moaken, un wan emma see wellen, dan woaren see irjent Ploagen oppe Welt komen loten.
7 Un wan dise Zeij no 1,260 Doag met äaren Deenst woaren to Enj sennen, dan woat daut Beest, waut von de Gruft rut komen woat, jäajen äant kjampfen, un hee woat äwa äant de Äwahaunt kjriejen, un äant doot moaken. 8 Un äare Kjarpasch woaren doot opp de Hauptgauss, von de groote Staut von Jerusalem ligjen, waut eena dan biltlich met de 'Staut von Sodom' un 'Ägipten' vejlikjen kaun. Un soo woaren de Zeij en de nämelje Staut omkomen, aus wua de Juden äaren Harn mol jekjriezicht hauden. 9 Un fa dree-un-ne-haulf Doag woaren de Menschen, von aule Velkja, un Sproaken, un Lenda, seenen woo de Zeij äare Kjarpasch oppe Gauss ligjen woaren, un kjeena woat de Frieheit han dee to begrowen. 10 Un de Weltmenschen woaren sikj omzajcht Jeschenkja jäwen, un soo woaren see sikj freien, daut de Zeij doot sent. Wiel aus de Zeij noch jeläft hauden, dan hauden see de Weltmenschen met Ploagen jekjwält, wiel see sikj jäajen Gott hauden hanjestalt, un nu feelden de Weltmenschen sikj aufjerajchent.
11 Oba no dree-un-ne-haulf Doag woat Gott de Zeij daut Läwens Odem wada trigj jäwen, un dan woaren see sikj wada läwendich oppe Feet hanstalen, un dan woat ne groote Forcht äwa aul dee komen waut dit seenen woaren. 12 Un de Zeij woaren vom Himmel ne lude Stemm hieren, un dee Stemm woat äant roopen, un sajen, "Komt hia häa enne Hecht no mie!" Un dan woaren äare Fiend tookjikjten, woo see opp eene Wolkj, woaren enne Hecht foaren, nom Himmel.
13 Un doamet daut de Zeij enne Hecht foaren woaren, woat daut en de Staut von Jerusalem, een groota Ieedbäben jäwen, un een tieendel von de Staut woat venicht woaren, un 7000 Menschen woaren omkomen. Un aul dee waut dän Ieedbäben derch saten woaren, woaren sikj schentlich ferchten, un dan woaren see daut aunerkjanen, daut Gott em Himmel aulmajchtich es.
14 Aul dit waut met dise twee Zeij passieren woat, es noch mau daut waut dan passieren saul, wan dee tweedlatsta Enjel opp siene Trompeet blost. Oba kjikjt doch, doa es noch een Enjel, dee uk noch opp siene Trompeet blowsen woat.
Johanes sach woo de latsta Enjel opp siene Trompeet blosen woat, un daut Gott sien Kjennichrikj oppe Ieed oppstalen woat
15 Dan sach ekj woo de lasta Enjel, opp de säwende Trompeet jeblost haud. Un doamet hieed ekj woo väle Stemmen em Himmel, gaunz lud jeschräajen hauden, un dee säden,
"Von nu aun jehieet de gaunze Welt,
to dän Harn, dän wie aunbäden,
un to sien Enjesäajenda Kjennich.b
Von nu aun rejieet sien Enjesäajenda Kjennich fa emma äwa de Ieed."
16-17 Un de 24 Ooms, dee opp äare Troons ver Gott jesäten hauden, schmeeten sikj plaut oppem Jesecht ver Gott han, un see bäden am aun, un säden,
"Wie danken die aulmajchtja Har Gott,
dee nu es, un dee emma wia,
wiel nu hast du diene groote Macht woa jenomen,
un hast aunjefongen äwa de gaunze Welt to rejieren.
18 De Weltmenschen, von aule Lenda oppe Ieed,
hauden sikj lang äwa die jeoajat,
oba nu es daut Tiet daut du dien Oaja äwa äant stellen woascht.
Nu woascht du de Seelen, von de doodje Weltmenschen rechten,
un dien oppoat jesadet Volkj woascht du oba beloonen.
Jo, diene Profeeten waut die emma tru jedeent hauden,
un aul dee waut die ut Ieaforcht emma jerespakjtieet hauden,
dee woascht du aula beloonen, eendoont woo jerinj ooda groot see sent.
Oba de Weltmenschen, waut de Welt bloos enne Grunt brinjen wullen,
woascht du gaunz venichten."
19 Un aus de 24 Ooms Gott soo aus dit hauden aunjebät, dan sach ekj em Himmel, woo de Daären von Gott sien Tempel opjinjen. Un aus ekj em Tempel nen kjikjt, dan kunn ekj dän Kaustenc seenen, wuarenn Gott sien Buntd wia, un daut blizt, un donnad, un rummeld, un ekj hieed woo Stemmen lud jerät hauden, un dan wia doa een Ieedbäben, un väl Hoagel.